धनगढी-एमाले महासचिव शंकर पोखरेलले कसैले एमाले कमजोर बनाउने सोचेको भए त्यो सम्भव नभएको बताएका छन्। एमालेलाई घेराबन्दीमा पारेर गरिएको स्थानीय तह चुनावले एमाले कमजोर नभएको पुष्टि गरेको उनकाे भनाइ छ।
एमालेको कैलाली जिल्ला कमिटीले बुधबार धनगढीमा आयोजना गरेको जिल्लास्तरीय अगुवा कार्यकर्ता भेलामा बोल्दै महासचिव पोखरेलले स्थानीय तहको चुनावबाटै एमालेलाई कसैले हराउन नसक्ने प्रमाणित भइसकेको बताए। 'सत्तारुढ पाँच दलीय गठबन्धनले घेराबन्दी गरेर हराउन खोज्दा पनि एमालेले सबैभन्दा बढी ३४ प्रतिशत मत ल्याउन सफल भयाे,' उनले भने।
पोखरेलले एमालेले गठबन्धनका कारण ८९ सीट गुमाए पनि जनताको मत जित्न सकेको बताए। उनले माधव, झलनाथ र बामदेव नहुँदा पनि एमालेको जीतमा फरक नपरेको चर्चा गरे।
उनले नेकपा (एकीकृत समाजवादी) पार्टीका रुपमा चल्न नसक्ने पनि बताए। '०५६ सालमा बामदेवको माले पार्टीले छ प्रतिशत मत ल्याउदा पनि पार्टी चलाउन सकेन यसपटक माधव नेपालको पार्टीले चार प्रतिशत मत मात्रै पाएकोले झन् कसरी चल्न सक्छ,' उनले भने। समाजवादीमा नेता मात्रै रहेको स्थानीय चुनावको परिणामले देखाएको उनले बताए।
उनले अहिले पनि कम्युनिष्ट एकताको अनुहार एमालेभित्र रहेको चर्चा गर्दे त्यस्तो अवस्था माओवादी र एकीकृत समाजवादीमा नभएको बताए। काँग्रेसको सरकार छोडेर आए र विगतका कमजोरीमा गल्ती भएको महसुस गरे मात्र माओवादी र समाजवादीसित चुनावी एकता हुनसक्ने उनको भनाइ थियो। संसद विघटन नेकपाभित्रैको संघर्षको कारण भएको भन्दै उनले त्यसमा अध्यक्ष ओलीलाई मात्रै दोष नमिल्ने बताए।
उनले पदका लागि भन्दा पार्टीलाई जिताउन लाग्न कार्यकर्तालाई निर्देशन दिए। 'सरकारका गलत कामको विरोध गरेर भण्डाफोर गर्दा एमाले जित्छ, जनता एमालेसंग रिसाएका छैनन् जनतालाई गठवन्धन सरकार र ती पार्टीहरुका बारे बुझाउन जरुरी छ' उनले भने।
उनले एमालेले नजिते समाज अझै पछाडि पर्ने भन्दै एमाले जिताउनका लागि लाग्न कार्यकर्तालाई निर्देशन दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
