धनगढी-सुदूरपश्चिम प्रदेश सभाको बजेट अधिवेशन तीन साता भइसक्दा पनि अघि बढ्न सकेको छैन।प्रदेश सरकारको कमजोरी र सत्तारुढ दलहरुबीचको असन्तुष्टिका कारण बैठक अघि बढ्न नसकेको हो।
सरकारको लापरबाहीका कारण बजेटमाथिको छलफल अघि बढ्न नसकेको सत्तापक्षकै सांसदहरुको आरोप छ।
‘अहिले बजेटमाथिको छलफल अघि बढ्न सकेको छैन। सरकारलेनै छलफल अघि बढाएको छैन’ प्रदेश सभा सदस्य दुर्गा विकले भनिन् –‘हामी सबै सहमत छौं तर, बजेट परिकृष्त भएर आउनुपर्छ।’
प्रदेश सभा सदस्यमात्र नभई आर्थिक मामिला मन्त्री प्रकाश रावलले सरकारकै कमजोरीका कारण सभा अघि बढ्न नसकेको बताए। उनले भने ‘हामी सबै केन्द्रीय सदस्यहरु काठमाडौं छौं। बजेटमाथिको छलफल कसरी अघि बढ्छ।’ उनले नेकपा माओवादी केन्द्र र एकीकृत समाजवादी पार्टीका केन्द्रीय सदस्य धनगढी पुगेपछि छलफल अघि बढ्ने बताए।
‘सम्भवत असार २४ देखि २५ गतेभित्र बजेटमाथिको छलफल अघि बढ्छ। सरकारको कमजोरी भएको छ। तर, केही प्रदेश सभा सदस्य पनि असन्तुष्ट रहेको बुझिएको छ। मिलाउँदै अघि बढिन्छ’ रावलले भने। उनले कसैलाई पनि असन्तुष्ट हुन नदिन बजेट पुस्तिका हेरफेर गरिने बताए।
प्रतिपक्षमात्र होइन, सत्तापक्षकै सदस्यहरुले बजेट संशोधन गर्नुपर्ने माग गरिरहेका छन्। तर प्रदेश सरकारले असन्तुष्ट सांसदहरुसँग छलफल गरेर संसदमा बजेटमाथिको छलफल सुरु गर्ने प्रयास गर्न नसक्दा बैंठक अनिश्चित बनेको छ।
सांसदहरु असन्तुष्ट भएपछि उनीहरुलाई मनाउनका लागि भनेर तीन पटक संसदको बैठक स्थगित भइसकेको प्रदेशसभा सचिवालयले जनाएको छ।
असार अन्तिमतिर आइपुग्दा पनि बजेटमाथिको छलफल अनिश्चित बनिरहेकै बेला संसद् बैठक अनिश्चितकालका लागि स्थगित गरिएको छ।
गत असार ८ गते बजेटमाथिको छलफलका लागि बोलाइएको पहिलो बैठकअघि कार्यव्यवस्था परामर्श समितिको बैठकमा सरकारको नेतृत्व गरिरहेको नेकपा माओवादी केन्द्रसहित सत्तारुढ नेकपा एकीकृत समाजवादी र नेपाली कांग्रेस तथा प्रमुख प्रतिपक्षी नेकपा एमालेका सदस्यले बजेट संशोधन हुनुपर्ने अडान राखेपछि बैठक स्थगित गरिएको थियो।
विचौलियाको प्रभावमा परेर सरकारले मनपरी र हचुवा ढङ्गले आर्थिक अनुशासन विपरीत योजनाहरु बजेटमा भन्दै प्रदेश सांसदहरु आक्रोशित छन्।
त्यसैले सरकारले असन्तुष्ट सांसदसँग छलफल गरेर संसदमा बजेटमाथिको छलफल अगाडि बढाउने वातावरण नबनाउँदा बैठक अनिश्चित बनेको नेपाली कांग्रेसका प्रदेशसभा सदस्य भरतबहादुर खड्काले बताए। उनले असार मसान्तभित्रै बजेट पारित गरिसक्नुपर्ने संवैधानिक व्यवस्था रहेकोले सरकारले जतिसक्दो चाँडो संसदमा बजेटमाथि छलफल हुने वातावरण निर्माण गर्नुपर्ने बताए।
एकीकृत समाजवादीका अधिकांश सांसद पनि बजेटको विपक्षमा उभिएका छन्। उनीहरू पनि बजेट संशोधन नभई कुनै पनि हालतमा पास हुन नदिने अडानमा छन्। तर समाजवादीका संसदीय दलका नेता तथा भौतिक पूर्वाधार विकास मन्त्री दीर्घ सोडारी बजेट संशोधन हुन नसक्ने भन्दै जस्ताको त्यस्तै पास हुने दाबी गर्छन्।
एकीकृत समाजवादीका प्रदेशसभा सदस्य पूर्णा जोशीले संशोधन नभई बजेट पास हुन नसक्ने बताइन्। सुदूरपश्चिम सरकारले आर्थिक वर्ष २०७९/८० का लागि ल्याएको ३६ अर्बको बजेटको आधा हिस्सा अर्थात् १८ करोड रुपैयाँ भन्दा बढी रकम भौतिक पूर्वाधार विकास मन्त्रालयमा विनियोजन भएको छ।
सुदूरपश्चिम प्रदेशका आर्थिक मामिला तथा योजनामन्त्री प्रकाश रावलले असार १ गते प्रदेश सभाको बैठकमा आगामी आर्थिक वर्ष २०७९/०८० का लागि रु ३६ अर्ब ७४ करोड ६४ लाख ६५ हजारको राजस्व र व्ययको वार्षिक अनुमान (बजेट) प्रस्तुत गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786602170.png)
-1786513116.png)
