बाढीले विद्युतका पोल ढालेपछि उदयुपरका दुई नगरपालिका चार दिनदेखि बिजुलीविहीन

समाज

रासस मंगलबार, असार २१, २०७९ १०:२०

उदयपुर– त्रियुगा र चौदण्डीगढी नगरपालिका क्षेत्रमा गत शनिबार आएको बाढीले विद्युतका पोल ढालेपछि ती नगर क्षेत्रसहित अन्य गाउँ अन्धकारमय बन्न पुगेका छन्।

त्रियुगा –२ लुहालेखोलामा आएको बाढीले विद्युत् पोल ढालेपछि अहिले नगरको वडा नम्बर १ जोगीदह, २ को खैजनपुर र ३ को मोतीगडा, चाप, भुल्के गाउँ अन्धकारमय बन्न पुगेका छन्।

भुल्केका स्थानीय ईश्वरीप्रसाद भट्टराईले पटक–पटक विद्युत् प्राधिकरणलाई ध्यानकर्षण गराउँदा पनि अहिलेसम्म पोल मर्मत नभएको गुनासो गरे।

शनिबारकै वर्षाको कारण बाढीले चौदण्डीगढी–१ र २ तथा ५, ९ र १० वडा जोड्ने विद्युत् पोल ढालेको थियो। चौदण्डीगढी–२ रानीवासका स्थानीय तेजेन्द्र कार्की भन्छन्, 'चार दिनदेखि निरन्तर अन्धकारमा बस्दै आएका छौँ। विद्युत् प्राधिकरणलाई पटक–पटक पोल मर्मत गर्न अनुरोधसमेत गरेका छौँ। तर, अहिलेसम्म बिजुली बलेको छैन।'

विद्युत् प्राधिकरण गाईघाटका इञ्जीनियर सत्यनारायण साह भन्छन्, 'बाढीले धेरै पोल ढालेर क्षति पुर्‍याएको छ। दिनरात थोरै जनशक्तिले खटेर तीव्ररूपमा काम गरिरहेका छौँ।'