काठमाडौं– स्पेनिस टेनिस स्टार राफायल नाडाल, स्टेफानो सित्सिपस र निक किर्गियोस विम्बल्डन टेनिसको तेस्रो चरणमा प्रवेश गरेका छन्।
सेन्टर कोर्टमा बिहीबार राति सम्पन्न खेलमा लिथुनियाका रिकार्डस बेरान्किसलाई हराउँदै दोस्रो वरीयताका नाडालले तेस्रो चरणको यात्रा तय गरेका हुन्।
३६ वर्षीय नाडालले रिकार्डसमाथि ६-४,६-४,४-६ र ६-३ को सेटमा जित निकाले। नाडालको यो ३०७औं ग्रान्डस्लाम जित हो।
कीर्तिमानी २२औं पटकको ग्रान्डस्लाम विजेता नाडालले दुई पटक विम्बल्डनको उपाधि जितेका छन्।
बिहीबार नै सम्पन्न अर्को खेलमा विश्व नम्बर चार स्टेफानो सित्सिपस तेस्रो चरणमा प्रवेश गरेका छन्।
दोस्रो चरणको खेलमा अस्ट्रेलियन खेलाडी जोर्डन थम्प्सनलाई ६-२, ६-३ र ७-५ को सोझो सेटमा पराजित गर्दै सित्सिपस २०१८ पछि पहिलो पटक विम्बल्डनको तेस्रो चरणमा पुगेका हुन्।
सन् २०१७ को फ्रेन्च ओपनबाट ग्रान्डस्लाममा डेब्यू गरेका सित्सिपस २०१८ मा विम्बल्डनको चौंथो चरणसम्म पुगेका थिए।
प्रि–क्वार्टरफाइनल प्रवेशका लागि सित्सिपसले अब अस्ट्रेलियन खेलाडी निक किर्गियोससँग खेल्नेछन्।
किर्गियोस २६औं वरीयताका फिलिप क्राजिनोभिचलाई सोझो सेटमा पराजित गर्दै छैटौं पटक विम्बल्डनको तेस्रो चरणमा पुगेका हुन्।
८औं पटक विम्बल्डन खेलिरहेका किर्गियोसले बिहीबारको खेलमा सर्बियन खेलाडी क्राजिनोभिचलाई ६-२, ६-३, र ६,१ को सोझो सेटमा पराजित गरे।
बिहीबार नै भएको दोस्रो चरणको खेलमा लियाम ब्रोडीसँग ३-२ सेटमा पराजित हुँदै डिएगो स्वार्ट्जम्यान विम्बल्डनबाट बाहिरिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
