काठमाडौं- श्रीलंकाका प्रधानमन्त्री रानिल विक्रमसिंघेले अर्थव्यवस्था पूर्णरुपमा पतन भएको बताएका छन्। आगामी दिन अझ कष्टकर हुनसक्ने उनको भनाइ थियो।
उनले श्रीलंका अब केवल इन्धन, ग्यास, बिजुली र खानाको कमी अधिक गम्भीर स्थितिको सामना गर्नु परिरहेको बताए। बुधबार संसदमा सम्बोधन गर्दै उनले सबै भन्दा पहिला विदेशी मुद्रा भण्डारको संकटलाई समाधान गर्न आवश्यक रहेको बताए।
श्रीलंकाका प्रधानमन्त्री रानिल विक्रमासिंघले बुधबार संसदलाई अन्तर्राष्ट्रिय मौद्रिक कोष (आईएमएफ) सँग कर्मचारी स्तरीय सम्झौता र जुलाईको अन्त्यसम्ममा जमानत प्याकेजको कार्यक्रम तय गरिने कुरा बताएका छन्। प्रधानमन्त्रीले आईएमएफसँग पहिलो पटक प्रत्यक्ष सम्बाद आगामी सोमबारबाट सुरु भएको र १० दिनसम्म चल्ने बताए।
विक्रमासिंघेले भने, 'श्रीलंकाका लागि एक मात्र सुरक्षित विकल्प भनेको अन्तर्राष्ट्रिय मुद्रा कोषसँग छलफल गर्नु हो। साँच्चै भन्ने हो भने, यो हाम्रो एक मात्र विकल्प हो। हामीले यो बाटो अपनाउनु पर्छ।' उनले सार्वजनिक वित्त, अर्थतन्त्र, कर्जा व्यवस्थापन, बैंकिङ क्षेत्रको स्थायित्व र सामाजिक सुरक्षाको जालोबारे आईएमएफसँग प्रारम्भिक छलफल भएको बताए।
श्रीलंकाले २०२६ सम्ममा कूल २५ अर्ब डलर ऋण तिर्नुपर्ने छ। श्रीलंकाको कूल विदेशी ऋण ५१ अर्ब डलर पुगेको छ।
तेलसमेत किन्न नसक्ने अवस्था
प्रधानमन्त्री विक्रमसिंघेले देश आयातित तेल किन्न असमर्थ रहेको बताए। उनले श्रीलंकाको तेल निगममाथि ठूलो ऋण रहेको कारण पैसा दिएर पनि तेल किन्न समस्या रहेको बताए।
'अहिले सिलोन पेट्रोलियम कर्पोरेशन ७० करोड डलर ऋणमा छ। परिणामस्वरूप विश्वका कुनै पनि देश या संगठन हामीलाई इन्धन दिन चाहँदैनन्। यहाँ सम्मकि नगद दिँदा समेत उनीहरु तेल दिन हिचकिचाइरहेका छन्।'
श्रीलंकामा गम्भीर आर्थिक संकटका कारण भएको ठूलो बिरोध प्रदर्शन पछि विक्रमसिंघेलाई प्रधानमन्त्री बनाइएको थियो। बुधबार विक्रमसिंघेले पूर्ववर्ती सरकारमाथि समयमा सही कदम नउठाएको आरोप लगाए।
'यदी शुरुआतमा अर्थव्यवस्था पतनको रफ्तारलाई कम गर्नका लागि कदम उठाइएको भए आज यस्तो अवस्था आउने थिएन। तर हामीले यो अवसर गुमाएका छौं। अब हामी अर्थव्यवस्था धराशायी भएको संकेत देखिरहेका छौं।'
श्रीलंका १९४८ को स्वतन्त्रतापछि सबैभन्दा ठूलो आर्थिक संकटको सामना गरिरहेको छ। जसका कारण श्रीलंकामा खाना, दवा, ग्यास, औषधि, पेट्रोलियम पदार्थ लगायतका अत्यावश्यक बस्तुको चरम अभाव रहेको छ। पैसा भएकाहरुले समेत सामान खरिद गर्न नसक्ने अवस्था बनेको छ।
कोलम्बो जाँदै भारतीय टोली
आर्थिक संकटसँग जुधिरहँदा श्रीलंकाले भारतसँग सहयोग मागेको छ। प्रधानमन्त्री विक्रमसिंघेले भारतले दिने वित्तीय सहयोले नपुग्ने भन्दै त्यसका लागि एक योजना हुन आवश्यक रहेको बताएका छन्।
यसैबीच भारतीय रिजर्व बैंक (आरबीआई) का शीर्ष अधिकारीहरुको एक टोली आज कोलम्बो पुग्दैछ। स्थानीय आर्थिक स्थितिको आकलन गर्नका लागि उक्त टोली श्रीलंका जान लागेको हो। त्यस्तै आगामी सोमबार अमेरिकी ट्रेजरी विभागको एक टिम पनि श्रीलंका आउँदै छ।
त्यसका साथै अन्तर्राष्ट्रिय मुद्रा कोषका साथ यस साल जुलाईसम्म आधिकारिक रुपमा समझौता हुने आशा गरिएको प्रधानमन्त्री विक्रमासिंघेले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
-1786513116.png)
