नयाँ भरतपुर २२० केभी सव–स्टेशनको निर्माण ८० प्रतिशत सम्पन्न

पूर्वाधार

नेपाल लाइभ आइतबार, असार ५, २०७९ १६:१२

काठमाडौं– चितवनको भरतपुर महानगरपालिका–११ आँपटारीमा निर्माणधीन नयाँ भरतपुर २२०÷१३२ किलोभोल्ट (केभी) सव–स्टेशनको निर्माण करिब ८० प्रतिशत सकिएको छ। सव–स्टेशन निर्माण दुई महिनाभित्रमा सम्पन्न गरी सञ्चालनमा ल्याउने गरी काम भइरहेको छ।

मर्स्याङ्दी करिडोर २२० केभी प्रसारण लाइन आयोजना अन्तर्गतका निर्माणधीन सव–स्टेशनको मुख्य सिभिल संरचनाको काम अन्तिम चरणमा छ। ‘ग्याँस इन्सुलेटेड सव–स्टेशन (जिआईएस)’ प्रविधिमा आधारित सव–स्टेशनका अधिकांश उपकरणहरू निर्माण स्थलमा ल्याइसकिएको छ।

अब ती उपकरणहरूको जडान मात्र बाँकी छ। सव–स्टेशनमा १६०÷१६० एमभीए क्षमताका दुई वटा पावर ट्रान्सफर्मर रहने छन्। पावर ट्रान्सफर्मरहरू राख्ने सिभिल संरचना निर्माण भइसकेको छ भने ट्रान्सफर्मरहरू जडान गर्न बाँकी छ।

नेपाल विद्युत प्राधिकरणका कार्यकारी निर्देशक कुलमान घिसिङले सव–स्टेशन निर्माणस्थलको भ्रमण गरी दुई महिनाभित्र काम सम्पन्न गर्न आग्रह गरेका छन्। आयोजना व्यवस्थापन र ठेकेदार कम्पनीसँग निर्माण प्रगति बेहोरिरहेको समस्यालगायतका विषयमा छलफल गरी दुई महिनाभित्र सव–स्टेशन सञ्चालनमा ल्याउन निर्देशन दिए।

आयोजना अन्तर्गत नयाँ भरतपुर र लमजुङको उदीपुरमा सव–स्टेशन निर्माणका लागि भारतीय कम्पनी एल एण्ड टीसँग करिब २ वर्षअघि ठेक्का सम्झौता भएको थियो। कोभिड–१९को महामारीका कारण सव–स्टेशन निर्माण प्रभावित भएको थियो। तनहुँमा निर्माणधीन १४० मेगावाटको तनहुँ जलविद्युत् आयोजना पनि नयाँ भरतपुर सव–स्टेशनमा नै जोडिने छ।

मर्स्याङ्दी र त्यसका सहायक नदीहरूबाट उत्पादन हुने विद्युत् राष्ट्रिय प्रसारण प्रणालीमा प्रवाहका लागि मर्स्याङ्दी करिडोर २२० केभी प्रसारण लाइन आयोजना सुरु गरिएको हो। प्रसारण लाइनबाट करिब एक हजार ६ सय मेगावाट विद्युत प्रवाह गर्न सकिने छ। चितवनको भरतपुरदेखि मनाङको धारापानीसम्मको डबल सर्किट प्रसारण लाइनको लम्बाइ करिब ११३ किलोमिटर छ।

आयोजनालाई तीन प्याकेजमा विभाजन गरी काम भइरहेको छ। पहिलो प्याकेजअन्तर्गत उदीपुरबाट नयाँ भरतपुर सव–स्टेशनसम्मको करिब ६७ किलोमिटर प्रसारण लाइन निर्माण भइरहेको छ। दोस्रो प्याकेजअन्तर्गत नयाँ भरतपुर र उदीपुर सव–स्टेशन निर्माणधीन छन्।

तेस्रो प्याकेजअन्तर्गत खुदीबाट धारापानीसम्मको ४६ किलोमिटर प्रसारण लाइन र दुईवटा सव–स्टेशन निर्माण भइरहेको छ। यस प्याकेज अन्तर्गत खुदी र धारापानीमा सव–स्टेशन निर्माणधीन छन्।

नेपाल सरकारको लगानी र युरोपेली लगानी बैक (इआइबी)को सहुलितपूर्ण ऋणमा निर्माणधीन आयोजनाको अनुमानित लागत करिब १६ अर्ब रुपैयाँ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

एनसेल नेपाल सुपर लिगको लागि खल्ती र आइएमई पे आधिकारिक टिकेटिङ पार्टनर

परराष्ट्र मन्त्री राणा र भारतीय विदेश मन्त्री जयशंकरबीच भेटवार्ता

गाजा आक्रमण: ४ सयभन्दा बढी मारिए, सुरक्षित स्थानतर्फ जाँदै स्थानीय