काठमाडौं– सोमबार सरकार र धुनिबेसी तथा ककनीका जनप्रतिनिधिबीच भएको सहमति नमान्ने भन्दै स्थानीयवासीले बन्चरेडाँडामा फोहोर फाल्न रोक लगाएका छन्। ल्याण्डफिल्डसाइड बन्चरेडाँडाका स्थानीयले फोहोर फाल्न पुनः रोक लगाएका हुन्।
जेठ १४ गतेदेखि काठमाडौं उपत्यकामा थुप्रिएको फोहोर मंगलबारदेखि उठाउन थालिएको थियो। सहरी विकास मन्त्रालय, काठमाडौं महानगरपालिका, नुवाकोटको ककनी गाउँपालिका र धादिङको धुनिबेसी नगरपालिकाका प्रतिनिधिहरुबीच सोमबार भएको सहमति अनुसार मंगलबार फोहोर लिएर पुगेका गाडीलाई स्थानीयवासीले अवरोध गरेका हुन्।
उनीहरुले उक्त सहमति नमान्ने भन्दै फोहोर बिसर्जन गर्न नदिएको काठमाडौं महानगरपालिकाकाले जनाएको छ। अहिले स्थानीयवासीसँग सहमतिको प्रयास भइरहेको बुझिएको छ।
लामो समयदेखि फोहोर नउठ्दा काठमाडौं उपत्यकाका सडक दुर्गन्धित बनेका छ्न्। ठाउँ–ठाउँमा फोहोर थुप्रिएको छ।
सोमबार भएको सहमतिपत्रमा सहरी विकास मन्त्रालयका तर्फबाट बन्चरेडाँडा फोहर व्यवस्थापन आयोजनाका निर्देशक रविन्द्र बोहरा, काठमाडौं महानगरपालिकाका प्रमुख प्रशासकीय अधिकृत लोकनाथ पौडेल, धुनिबेसी नगरपालिकाका तर्फबाट प्रमुख प्रशासकीय अधिकृत हरिदत्त कँडेल र ककनी गाउँपालिकाका तर्फबाट गीताकुमारी शर्माले हस्ताक्षर गरेका थिए।
सहरी विकासमन्त्री रामकुमारी झाँक्री, काठमाडौं महानगरका मेयर बालेन्द्र शाहसहित प्रभावित क्षेत्रका प्रमुख, उपप्रमुख तथा वडाध्यक्षहरुको रोहबरमा यो सहमति भएको थियो।
सहमतिअनुसार फोहोरलाई स्रोतमै छुट्याउने प्रक्रिया सुरु गर्दै हाल उपत्यकामा थुप्रिएका फोहोरलाई अहिलेकै अवस्थामा बढीमा असार मसान्तसम्म उठाई लैजानका लागि मंगलबारदेखि नै उठाउने र माटोले फोहोर छोप्ने व्यवस्था मिलाउने भनिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
