काठमाडौं– मन्त्रिपरिषद्मा आफ्नो तर्फबाट पठाइएकाहरुको जिम्मेवारी हेरफेर गर्ने एकीकृत समाजवादीको निर्णयले पार्टीमा विवाद चर्किएको छ। छापामार शैलीमा आफूलाई हटाइएको भन्दै मन्त्रीहरुले फिर्ता हुन आनाकानी गरेका हुन्। उनीहरुले प्रधानमन्त्री शेरबहादुर देउवालाई समेत भेटेर बजेट अधिवेशन चलिरहेको समयमा आफूहरु फिर्ता नहुने बताएका छन्।
एकीकृत समाजवादीका तर्फबाट स्वास्थ्य तथा जनसंख्यामन्त्री विरोध खतिवडाले आफूलाई फिर्ता बोलाउने निर्णय भएको भनेर सञ्चारमाध्यमबाट जानकारी पाएको बताए। मन्त्रीबाट फिर्ता हुने विषयमा कुराकानी गर्दै उनले भने, 'सञ्चारमाध्यमबाट जानकारी पाएका हौं। हल्ला होला। बजेट अधिवेशन चलिरहेको समयमा जिम्मेवार नेताहरुले यस्तो निर्णय गर्नुहुन्छ होला जस्तो लाग्दैन।'
आफूहरुसँग अध्यक्ष माधवकुमार नेपालले समेत यस विषयमा कुनै औपचारिक छलफल समेत नगरेको अर्का एक मन्त्रीले बताए। उनले भने, 'निर्णय भएपछि अध्यक्षज्युले हामीसँग कुरा गर्नुहुन्थ्यो होला। अहिलेसम्म हामीसँग कुरा गर्नुभएको छैन।'
शनिवार नै भएको थियो निर्णय
एकीकृत समाजवादीको शनिबार बसेको सचिवालय बैठकले नै मन्त्रीहरु हेरफेर गर्ने निर्णय गरेको बुझिएको छ। 'सचिवालयमा ११ जना उपस्थित थियौं। सवैले ६ महिना पुगेका मन्त्रीहरु फिर्ता बोलाउनुपर्छ भनेपछि शनिबार नै निर्णय भएको हो,' एकीकृत समाजवादीका एक सचिवालय सदस्य भन्छन्।
उनका अनुसार आइतबार दिउँसो उपमहासचिव विजय पौडेल र अर्का एक नेताले अध्यक्ष नेपालको हस्ताक्षर गराएर बालुवाटारमा नयाँ मन्त्रीको नाम बुझाएका हुन्। बालुवाटारमा नयाँ मन्त्रीको सूची पुगेपछि मन्त्रीहरुलाई पार्टी कार्यालयमा बोलाइएको थियो।
एक मन्त्रीका अनुसार दिउँसो १ बजेर पाँच मिनेट जाँदा विरोध खतिवडालाई फोन गरेर पार्टी कार्यालयमा आउन मन्त्रीहरुलाई भनिएको थियो। 'चुनावी समीक्षा बैठक भनिएको थियो। त्यसैले हामी पनि त्यही बैठकका लागि बोलाइएको होला भनेर गएका थियौं। मन्त्री परिवर्तनको कुरा पनि कसैले हामीसँग गर्नुभएन,' एक मन्त्री भन्छन्।
चैतमै थियो चर्चा
एकीकृत समाजवादीका केही नेताहरुले चैतदेखि नै मन्त्रीहरुको कार्यकाल ६ महिना पुगे/नपुगेको सोधखोज गरेका थिए। श्रम, रोजगार तथा सामाजिक सुरक्षा मन्त्री किसन श्रेष्ठलाई एक आकांक्षीले 'तपाईंहरुको ६ महिना पुगेन?' भन्दै सोधेका थिए। श्रेष्ठले चारपाँच महिना मात्रै भएको भन्दै जवाफ फर्काएको अर्का एक मन्त्रीले बताए।
आफूलाई हटाएर मन्त्री बन्न एक समूह सक्रिय रहेको संकेत मन्त्रीहरुले त्यतैबेलै पाएपछि अध्यक्ष नेपाललाई भेटेका थिए। 'किसनजीलाई त्यसरी सोधिएको जानकारी भएपछि हामी चारैजना मन्त्रीले अध्यक्षज्यूलाई भेटेका थियौं,' एक मन्त्रीले भने, 'चुनावमा जानुपर्ने भएकाले हतियार खोसेको सेनाको अवस्था नबनाइदिनुहोला। फिर्ता हुनैपर्ने भए केही समयअघि नै जानकारी पाउँ भनेर अध्यक्षलाई भनेका थियौं।'
छापामार शैलीमा हटाउँदा आफ्नो करियरमा समेत समस्या आउने भएकाले छलफल चलाएर फिर्ता बोलाउन आफूहरुले माग गरेको उनीहरुको दाबी छ। तर, आइतरबार नयाँ मन्त्रीको नाम समेत तय गरिसक्दा मन्त्रीहरुले आफूहरु हट्न लागेको जानकारी नपाएको बताउँछन्।
निर्णय प्रक्रियामै प्रश्न
मन्त्रीहरुले निर्णय प्रक्रियामै प्रश्न उठाएका छन्। पार्टीको सचिवालय बैठकले मन्त्री पठाउने र बोलाउने तहको निर्णय गर्न नसक्ने ती मन्त्रीको दाबी छ। 'कम्तीमा स्थायी कमिटीको बैठक बोलाएर निर्णय लिनुपर्थ्यो। छलफल प्रक्रियामा हामीलाई सहभागी गराउनु पर्थ्यो,' उनले भने, 'केपी ओलीको यही रबैयालाई चुनौती दिएर अर्को पार्टी बनाएका हौं।'
सचिवालयलाई निर्णय गर्ने नभइ निर्णय कार्यान्वयन गर्ने अधिकार मात्रै विधानमा तोकिएको उनको भनाइ छ। 'विधानको धारा २८ मा ६ वटा अधिकार छन्। कहाँनेर छ निर्णय गर्ने अधिकार?' उनले भने।
ओलीले मनोमानी ढंगले पार्टी चलाएपछि लोकतान्त्रिक निर्णय प्रक्रियाका लागि विद्रोह गरेर नयाँ पार्टी गठन गरेको ती मन्त्रीको भनाइ छ। अहिलेको निर्णयले आफ्नो उक्त विद्रोहलाई नै चुनौती दिएको ती मन्त्री बताउँछन्।
देउवालाई भेटेर नहटाउन माग
मन्त्रीमण्डलमा हेरफेर गर्ने निर्णय भएपछि एकीकृत समाजवादीका तर्फबाट मन्त्री बनेकाहरुले प्रधानमन्त्री शेरबहादुर देउवालाई भेटेर उक्त निर्णय कार्यान्वयन नगरिदिन माग गरेका छन्। बजेट अधिवेशन चलिरहेका बेला सांसदहरुको प्रश्नको उत्तर दिनुपर्ने भन्दै तत्काल निर्णय कार्यान्वयन नगर्न उनीहरुले माग गरेका हुन्।
'हामीले बजेटमा आफ्नो योजना प्रस्तुत गरेका छौं। त्यसमाथि सांसदहरुले जिज्ञासा राख्नुमभएको छ। त्यसको जवाफ दिनुपर्नेछ,' ती मन्त्रीले भने, 'त्यसकारण अहिल्यै कार्यान्वयन नगर्ने गरी पार्टी अध्यक्षसँग समन्वय गर्न माग गरका हौं।'
मन्त्रीहरुको असन्तुष्टपछि नयाँ मन्त्रीलाई शपथ गराउन प्रधानमन्त्री देउवाले पनि रुचि देखाएकका छैनन्। बजेट अधिवेशन चलिरहेको बताउँदै तत्काल मन्त्रीमण्डल हेरफेर गर्न देउवाले अरुचि देखाएपछि एकीकृत समाजवादीको निर्णय कार्यान्वयन हुनेमा आशंका उब्जिएको छ।
एकीकृत समाजवादीका तर्फबाट मन्त्रीका लागि नाम सिफारिस भएका मध्य एक मेटमणि चौधरीले शपथकका लागि कुनै जानकारी नआएको बताए। सोमबार लागि शपथको तयारी गरिएको थियो। विवादका कारण अन्योल बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772284174.png)
-1764146706.png)
-1772271039.png)
