काठमाडौं-संघ तथा प्रदेशको निर्वाचन मिति तय गर्ने विषयमा छलफल चलिरहेका बेला एकीकृत समाजवादीले चार मन्त्रीको जिम्मेवारी हेरफेर र एक मन्त्रीको बढुवा गरेको छ। आगामी चुनावी रणनीतिअन्तर्गत उक्त निर्णय लिएको पार्टीका एक सचिवालय सदस्यले जानकारी दिएका छन्।
उनका अनुसार गठबन्धन हुँदा पनि टिकट दिलाउन सकिने र जित्ने सम्भावना बलियो भएका नेताहरुलाई चुनावी सरकारको मन्त्री बनाइएको हो। आइतबार सचिवालयबाट मन्त्रीका लागि सिफारिस जीवनराम श्रेष्ठ, मेटमणि चौधरी, शेरबहादुर कुँवर, राज्यमन्त्रीबाट मन्त्रीमा बढुवा भएका भवानी खापुङ र राज्यमन्त्रीमा सिफारिस हिरा केसी जनाधार बलियो भएका नेताहरुमा पर्छन्।
'प्रतिनिधि सभामा प्रत्यक्ष निर्वाचित भएर प्रमाणित गरिसकेका नेताहरु भएकाले गठबन्धनमा उनीहरुका लागि टिकटको लबिङ गर्न सहज हुन्छ। बहालवाला मन्त्रीलाई नै टिकट दिने कुरामा सहयात्री दल र नेताहरुलाई मनाउन पनि सजिलो पर्छ,' एकीकृत समाजवादीका एक नेता भन्छन्।
जीवनराम श्रेष्ठ
खेल क्षेत्रमा लामो समय सक्रिय भएर राजनीतिमा पुगेका हुन् जीवनराम श्रेष्ठ। राजनीतिमा पनि उनी 'खेलाडी' बनेर निस्केका छन्। पहिलोपटक सांसद बनेका उनी मन्त्रीसमेत बन्ने सफलतानिकट छन्।
उनी राष्ट्रिय खेलकुद परिषद्का सदस्य-सचिव, नेपाल ओलम्पिक कमिटीका अध्यक्षसमेत बनेका उनी २०७४ सालमा काठमाडौं ८ बाट प्रतिनिधि सभामा प्रत्यक्ष निर्वाचित भए। उनले नेपाली कांग्रेसका उम्मेदवार नवीन्द्रराज जोशीलाई पराजित गरेका हुन्। २०७० सालको निर्वाचनमा भने उनी जोशीबाट यही क्षेत्रमा पराजित भएका थिए।
काठमाडौं ८ मा गठबन्धनका तर्फबाट श्रेष्ठको दाबी बलियो रहने एकीकृत समाजवादीको आंकलन छ। किनभने उक्त क्षेत्रका नेपाली कांग्रेसका प्रभावशाली नेता जोशीको निधन भइसकेको छ।
भवानी खापुङ
स्वास्थ्य मन्त्रीमा बढुवा भएका भवानी खापुङ तेह्रथुमबाट टिकट पाउने सम्भावना भएका नेता हुन्। दुईपटक निर्वाचित भइसकेका छन् उनी। २०६४ को संविधानसभा निर्वाचनमा पराजित खापुङ २०७० र ०७४ मा निर्वाचित भएका हुन्।
२०७४ मा तत्कालीन भौतिक पूर्वाधार राज्यमन्त्री सीता गुरुङलाई २ हजार २१ मतले पछि पार्दै विजयी भएका थिए। खापुङले २१ हजार ३ सय १५ मत प्राप्त गरेका थिए। गुरुङले १९ हजार ३ सय १४ मत पाएकी थिइन्।
गठबन्धनका तर्फबाट एकीकृत समाजवादीले पाउने कोटामा खापुङ बलिया उम्मेदवार हुन्। किनभने बहुदल पुन:स्थापनापछि तेह्रथुमबाट निर्वाचित हुनेमध्येबाट मन्त्री बनेका उनी पहिलो हुन्। त्यसपछि भएका ६ वटा निर्वाचनमा एमालेका विजय सुब्बा २ पटक, एमालेकै सुरेन्द्र फोम्बो र कांग्रेसका तुलसी सुब्बा १–१ पटक सांसद भए पनि मन्त्री हुन सकेनन्।
शेरबहादुर कुँवर
शेरबहादुर कुँवर अछाममा एमालेको संगठन बनाउने नेतामध्ये पर्छन्। अछाम एमालेका संस्थापकमध्येका उनी २०६४ सालमा नेकपा एमाले कमजोर बन्दासमेत अछाम १ बाट निर्वाचित हुन सफल भएका थिए।
माओवादी सबैभन्दा ठूलो दल बनेको उक्त समयमा भीम रावल समानुपातिक बसे। जनस्तरमा लोकप्रिय हुँदाहुँदै पनि उनले २०७० र २०७४ को निर्वाचनमा उक्त क्षेत्र भीम रावलका लागि त्याग गरे। एकपल्ट समानुपातिक र अर्कोपल्ट राष्ट्रिय सभामा गए।
२०४९ सालमा एमाले जिल्ला कमिटीको सचिवालय सदस्य, २०५४ सालमा उपसचिव, २०६२ मा सचिव हुँदै २०६९ देखि दुई कार्यकाल जिल्ला अध्यक्ष भइसकेका थिए। उनी एकीकृत समाजवादीतर्फ लागेपछि अछाममा ठूलो शक्ति उनीसँग गएको छ। अछामका दुई क्षेत्रमध्ये एउटामा कांग्रेसले दाबी गर्दा अर्कोमा स्वाभाविक रुपमा एकीकृत समाजवादीले दाबी गर्नेछ। एकीकृत समाजवादीको सहयोगविना अछाममा कांग्रेसले निर्वाचन जित्न सकस पर्छ।
मेटमणि चौधरी
२०७४ सालमा पहिलोपटक प्रतिनिधि सभाका लागि निर्वाचित भएका हुन् मेटमणि चौधरी। दाङ १ बाट निर्वाचित उनी आगामी निर्वाचनमा एकीकृत समाजवादीबाट जित्न सक्ने उम्मेदवारको सूचीको अग्रपंतिमा पर्छन्।
एमालेमा दाङकै अर्का नेता शंकर पोखरेलबाट 'पेलिएर' ओली गुटदेखि ओली विद्रोहीसम्म हुन पुगेका उनी प्रभावशाली नेता मानिन्छन्। लामो समय ओली समूहमा रहेका उनी नवौं महाधिवेशनअघि नेपाल समूह प्रवेश गरेका हुन्। सोही समूहबाट केन्द्रीय सदस्यमा निर्वाचित उनलाई एमाले अध्यक्ष केपी ओलीले २०७१ सालमा दाङ इन्चार्ज बनाएका हुन्।
गत निर्वाचनमा दाङ १ बाट चौधरीले ३७ हजार ९०८ मत प्राप्त गरेका थिए भने उनकी निकटतम प्रतिद्वन्द्वी नेपाली काँग्रेसकी सुशीला चौधरीले जम्मा २४ हजार ७० मत प्राप्त गरिन्। सत्ता गठबन्धनका अन्य दलबाट उक्त क्षेत्रमा प्रभावशाली नेतासमेत नभएकाले मेटमणिले टिकट पाउने सम्भावना बलियो रहेको एकीकृत समाजवादीको बुझाइ छ।
तीन क्षेत्र भएको दाङको क्षेत्र नं २ मा माओवादी केन्द्रले कृष्णबहादुर महराका लागि आफ्नो भागमा पार्न खोज्नेछ भने क्षेत्र नं ३ मा कांग्रेसका दीपक गिरी छन्।
फिर्ता बोलाइएकामाथि मूल्यांकन
एकीकृत समाजवादीले फिर्ता बोलाएका चार मन्त्रीको अवस्थाबारे पनि मूल्यांकन गरिएको छ। मूल्याकंन अनुसार श्रम, रोजगार तथा सामाजिक सुरक्षामन्त्री किसान श्रेष्ठले गठबन्धन हुँदा टिकट पाउने सम्भावना न्यून छ। किनभने उनी २०७४ मा नेपाली कांग्रेसका नेता रामचन्द्र पौडेललाई पराजित गरेर सांसद बनेका हुन्। सत्ता गठबन्धन समन्वय समितिका संयोजक समेत रहेका पौडेलको क्षेत्र किसानका लागि छाड्ने सम्भावना कमजोर छ।
पर्यटन, संस्कृति तथा नागरिक उड्डयनमन्त्रीको जिम्मेवारी खोसिएका प्रेम आलेले पनि गठबन्धन हुँदा टिकट पाउने सम्भावना निकै कमजोर छ। उनले २०७४ सालमा नेपाली कांग्रेसका वीरबहादुर बलायरलाई पराजित गरेका हुन्।
बलायर देउवाको विश्वास पात्रका साथै कांग्रेसका सुदूरपश्चिम प्रदेश सभापति हुन्। गठबन्धनबाट उम्मेदवार बनेका आलेसँग बलायर २ हजारभन्दा कम मतले पराजित भएका थिए।
यसैगरी स्वास्थ्यमन्त्रीबाट फिर्ता बोलाइएका विरोध खतिवडा मकवानपुर २ मा निर्वाचित हुन्। उनले २०७४ मा नेपाली कांग्रेस नेतृ महालक्ष्मी डिना उपाध्यायलाई पराजित गरेका हुन्। डिना अहिले कांग्रेस सहमहामन्त्री निर्वाचित भएकी छिन् र उनले समानुपातिकको लाभ नलिने घोषणासमेत गरेकी छिन्। प्रत्यक्ष निर्वाचित हुने डिनाको चाहनालाई तपसीलमा राखेर देउवाले खतिवडाका लागि छुट्याउने सम्भावना कम छ।
सहरी विकास मन्त्रालयबाट फिर्ता बोलाइएकी रामकुमारी झाँक्रीले हालसम्म प्रत्यक्ष संसदीय निर्वाचनको अनुभव हासिल गरेकी छैनन्।
गुल्मी २ की उनी विद्यार्थी राजनीतिबाट उदाएकी हुन्। भूगोलको राजनीतिमा सक्रिय हुन नपाएकी उनले टिकट पाउँदा एमाले सचिव गोकर्ण विष्टसँग प्रतिष्पर्धा गर्नुपर्ने हुन्छ। विष्टले गत निर्वाचनमा कांग्रेस उम्मेदवार चन्द्रबहादुर केसीलाई १४ हजार ४६१ मत अन्तरले पराजित गरेका हुन्। यसपल्टको स्थानीय तह निर्वाचनमा गुल्मीमा प्रभावशाली देखिएको कांग्रेसले झाँक्रीका लागि स्थान छाड्ने सम्भावना कमजोर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764170040.png)
-1764146706.png)
-1763721444.png)
-1763559424.jpg)
-1764080971.png)
