काठमाडौं– फुटबल लिगका खेलहरु जति अन्तिम चरणमा पुग्छन्, उति नै रोचक हुने गर्छन्। एकको जित र अर्कोको हारले रेलिगेसन र प्रमोसनको गणित धेरै प्रभावित पार्छ। जारी सहिद स्मारक ‘सी’ डिभिजनको लिग पनि उस्तै रोचक मोडमा छ।
१२ खेलमा १० जित, १ बराबरी र १ हारसहित ३१ अंकका साथ झापा फुटबल क्लबले ‘बी’ डिभिजनको टिकट काट्दा अन्य दुई क्लब आरसी–३२ स्पोर्टस क्लब र प्लानिङ ब्वाइज युनाइटेडबीच चर्को प्रतिस्पर्धा छ।
लिगको नियमअनुसार सहभागी १४ क्लबमध्ये दुई क्लबमात्रै ‘बी’ डिभिजनमा उक्लिने प्रावधान छ। सोहीअनुसार ‘सी’ डिभिजन लिग डेब्यूमा गत वर्ष बढुवा नजिक पुगेर पनि अड्किएको झापाले यसपालि एक खेल बाँकी छँदै ‘बी’ डिभिजनको यात्रा तय गरिसकेको छ।
प्रशिक्षक अंकुरकुमार खड्गीले सम्हालेको झापा १२औं चरण समाप्तीमा शीर्षस्थानमा रहँदा बढुवाको होडमा रहेका प्लानिङ ब्वाइज र आरसी–३२ समान २८ अंक जोडेर दोस्रो र तेस्रो स्थानमा छन्। त्यसैले यी दुई टोलीमध्ये कुन ‘बी’ डिभिजनमा उक्लिने हुन्, त्यो अन्तिम खेलबाट नै टुङ्गो लाग्ने छ। आरसी–३२ ले स्पोर्टस् एकेडेमी र प्लानिङ ब्वाइजले ओसिस क्लबविरुद्ध अन्तिम खेल खेल्दा रोचक प्रतिश्पर्धा हुने आकलन गर्न सकिन्छ।
तर, जारी प्रतियोगितामा रेलिगेसन–प्रमोसन भइरहँदा खेल मिलेमतोको प्रसंग पनि उठ्न थालेको छ। खेल मिलेमतोको विषय सोमबार आरसी–३२ का प्रमुख रविन्द्र चन्दले सार्वजनिक रुपमा सामाजिक सञ्जाल फेसबुकमा उठाएका हुन्। यसैवर्ष मात्र ‘सी’ डिभिजन लिग छनोट प्रतियोगितामा सफलता हासिल गर्दै डिभिजन लिगको सबैभन्दा तल्लो श्रेणीको हैसियत हासिल गरेको आरसी–३२ का चन्दले एन्फाको वर्तमान नेतृत्वप्रति आक्रोश पोख्दै फेसबुकमार्फत् जारी प्रतियोगितामा खेल मिलेमतोको आरोप लगाएका छन्।
उनले लेखेका छन्, ‘जारी एन्फा सी डिभिजन लिगका धेरै खेलहरुमा मिलेमतो भइरहेको जानकारी हुँदाहुँदै पनि यो निकम्मा एन्फाले केही गर्न नसक्नु कतिसम्म लाजमर्दो कुरा हो। तिमीहरूको पो केही जाँदैन, हाम्रो त एक एक मेहनत गरेर जोडेको पैसाको लगानी छ यसमा! खेलको भावनामा खेलवाड गर्ने अधिकार तिमीहरुलाई छैन। एउटा सी डिभिजन लिग त व्यवस्थित तरिकाले चलाउन सक्दैनौ तिमीहरु, अझ विश्वकपको १० वटा खेल नेपालमा गराउँछौं भन्न कुन मुखले सकेको होला!’
नेपालको घरेलु फुटबलमा मिलोमतोको विषय उठेको यो पहिलो पटक होइन। प्रत्येक वर्ष विभिन्न डिभिजनका लिगमा मिलेमतो गरेको आरोप लाग्ने गर्छ। गत वर्षपनि ‘सी’ डिभिजन छनोटमा धादिङको शुभारम्भ क्लब र सिन्धुलीको दुधौली क्लबले खेल मिलेमतो भएको भन्दै छानबिनका लागि नेपाली फुटबलको सर्वोच्च निकाय एन्फा सचिवालयमा पत्र बुझाएको थियो।
उक्त उजुरीउपर कुनै छानबिन नगरिकनै ‘खेल मिलोमतो गरेको तथ्य फेला पर्न नसकेको’ भन्दै सामसुम बनाएको थियो। तर, निर्देशक सञ्जिव मिश्रा भने खेल हार्ने परिस्थिति सिर्जना भएपछि मिलोमतो भएको कुरा उठ्ने गरेको बताउँछन्। ‘प्रायः खेल हारेपछि या महत्त्वपूर्ण खेलमा चुकेपछि मिलोमतो भयो भनेर कुरा उठ्ने गरेको छ। गत वर्षपनि ‘सी’ डिभिजन छनोटमा धादिङको शुभराम्भले धादिङकै लगनशील युवा क्लब र ललितपुरको इमाडोल क्लबबीच तथा दुधौलीले दक्षिणकाली परोपकार क्लब र मध्यपुर जागरुग युवा क्लबबीच खेल मिलोमतो भयो भनेर उजुरी गरेका थिए। तर, मिलोमतो भएकै भनेर कुनै शंका गर्ने ठाउँ थिएन र पुष्टि पनि भए,’ उनले भने।
‘सी’ डिभिजनमा आरसी–३२ र प्लानिङ ब्वाइजबीचको जस्तो प्रतिस्पर्धा गत साता इङ्लिस प्रिमियर लिगको उपाधि होडमा पनि नदेखिएको होइन। एक अंकले अगाडि रहेको म्यान्चेस्टर सिटीलाई उपाधि जित्न बराबरी मात्रै होइन, स्पष्ट जितको आवश्यक थियो। यता, लिगको दोस्रो स्थानमा रहेको लिभरपुललाई पनि उपाधि दाबेदारको रुपमा हेरिएको थियो।
सिटी एस्टन भिल्लासँग बराबरीमा रोकिएको भए र लिभपुलले वल्भ्समाथि ३–१ कै जित निकालेको भए उपाधि उचाल्ने निश्चित थियो। तर, ७८औं मिनेटसम्म दुई गोलले पछि रहेको सिटीले करिब पाँच मिनेटमै ३ गोल गर्दै एस्टन भिल्लामाथि ३–२ को जित निकाल्यो र समग्रमा ३८ खेलमा ९३ अंकसाथ सिटी उपाधि जोगाउन सफल रह्यो।
अहिले यस्तै चर्को प्रतिस्पर्धा आरसी–३२ र प्लानिङ ब्वाइजबीच छ। झापाले अन्तिम खेलमा स्वयम्भुविरुद्ध हार बेहोरे पनि त्यसले उसको ‘बी’ डिभिजन यात्रालाई रोक्ने छैन। किनभने, अन्तिम खेलमा प्लानिङ ब्वाइजले ओएसिस र आरसी–३२ ले स्पोर्ट्स एकेडेमी साँगालाई पराजित गर्दै अंक बराबरी गरे पनि झापा ‘हेड टु हेड’बाट शीर्ष दुईमा रहने पक्का छ। झापाले प्लानिङ ब्वाइज र आरसी–३२ विरुद्ध बराबरी खेलेको थियो भने प्लानिङ ब्वाइजले आरसी–३२ लाई पराजित गरेको थियो। त्यसैले यी तीन टिमबीचको प्रतिस्पर्धाका आधारमा ‘हेड टु हेड’मा झापा शीर्ष दुईमै रहनेछ। बाँकी दुई क्लबमध्ये एकले बाजी मार्ने निश्चित छ।
यी क्लबबीच मैदानमा अंकको लागि तीव्र प्रतिश्पर्धा भए पनि दुवै क्लबका प्रमुख पदाधिकारीबीच गाढा मित्रता छ। यी दुई क्लबका मालिक आसन्न एन्फा निर्वाचनमा अध्यक्ष पदको उम्मेदवारी दिएका पंकजविक्रम नेम्वाङ निकटका हुन्। आरसी–३२ सुर्खेत एन्फाका अध्यक्ष रविन्द्र चन्दको हो भने प्लानिङ ब्वाइज एन्फा केन्द्रीय सदस्य दावा लामाको हो। लामाले आसन्न निर्वाचनको लागि नेम्वाङ समूहबाट उपाध्यक्षमा उम्मेदवारी दिएका छन् भने चन्दले सदस्यमा।
यी दुई पात्र विवादबाट पनि मुक्त छैनन्। ‘बी’ र ‘सी’ डिभिजन क्लबको निर्वाचन प्रतिनिधि छनोट प्रक्रिया स्थगन गरिएपछि लामाले सातदोवाटोस्थित एन्फा मुख्यालयको निर्वाचन समितिको कक्षमा तोडफोड गरेका थिए।
यता, पुल्चोक स्पोर्टस् क्लबसँग २–२ गोलको बराबरी खेलेसँगै चन्दसहित आरसी–३२ का खेलाडी र अफिसियल म्याच रेफ्री र अफिसियलविरुद्ध हातपातमा उत्रिएका थिए। त्यसपछि एन्फाको अनुशासन कमिटिले आरसी–३२ लाई १ लाख ५० हजार जरिवाना गरेको थियो। यस घटनामा संलग्न खेलाडी अनिश श्रेष्ठलाई दुई वर्षको प्रतिबन्ध लगाएको छ। त्यस्तै खेलाडीद्वय विदुर रिजाल र प्रविन राईलाई एक वर्षको प्रतिबन्ध लागेको छ।
एन्फाले चन्दलाई फुटबल गतिविधिमा एक वर्षको प्रतिबन्ध लगाएको थियो। अहिले एन्फा हाँकिरहेका कर्माछिरिङ शेर्पा र वरिष्ठ उपाध्यक्ष नेम्वाङ दुई विपरित ध्रवमा छन्। निर्वाचनको मिति जतिजति नजिकिँदै छ, यी दुई पनि आफू अनकूल नतिजा निकाल्न कम्मर कसेर लागेका छन्। यस्तो स्थितिमा जिल्ला बाहिरका क्लबका मतदातालाई प्रभावित पार्न नेम्वाङले ‘चन्द कार्ड’ चालेका हुन् कि भन्ने आशंका छ।
अर्कोतर्फ चन्द स्वयमले यसबारे उजुरी नदिनुले पनि मिलेमतोको प्रसंग उठाएर चुनावी फन्डा निकालेको आरोप लाग्नु गलत नहोला। यसबारे नेपाल लाइभसँग लिग निर्देशक मिश्रले मिलेमतोको उजुरी नपरेको जानकारी दिए। ‘उहाँ (चन्द)ले सामाजिक सञ्जालमा लेखेको कुरा थाहा छ। तर, कुन खेलमा मिलेमतो भएको हो भन्ने खुलाउनु भएको छैन र उजुरी पनि दिनु भएको छैन। उहाँले कुन खेलमा भयो, कहाँ भयो र कहिले भयो त भन्नु पर्योी नि,’ उनले भने,‘उजुरी आए हामीले छानबिन गर्ने हो। उजुरी नै नआए के–को आधारमा छानबिन गर्नु?’ उनले भने।
अहिले एन्फाले हरेक खेल लाइभ गर्ने गरेको छ। यसअघि पनि एन्फाले ‘सी’ डिभिजन छनोटको लाइभ दिएको थियो। सकेसम्म खेललाई निश्पक्ष बनाउनका लागि एन्फाले सिमित स्रोत र साधनको उपयोग गर्दै खेललाई मिलोमतोरहीत बनाउन लागि परेको मिश्र बताउँछन्। ‘पहिला हामीसँग टेक्नोलोजी भएन। क्यामेरा थिएन, केही नै थिएन। अहिले हरेक खेल रेकर्ड गरिएको छ। कसैले खेल जितिरहँदा कुरा नउठाउने र अन्ततिर पुगेपछि मिलेमतो भयो भनेर भन्छ भने आउनूस् भिडियो छ छानबिन गरौं। कता भएछ, के भएछ हामी हेर्छौं,’ उनले भने।
विगतमा ‘ए’ डिभिजन लिगमा मछिन्द्र क्लब, बौद्ध फुटबल क्लब, न्युरोड टिम (एनआरटी) र च्यासल युवा क्लबले मिलेमतो गरेको तथ्य पनि छ। तर, अनुगमन गर्ने निकाय नहुनु र एन्फामा सोही क्लबका प्रतिनिधिको हालिमुहाली हुनुले त्यस्ता घटना सामसुम बनाइने गरेका थिए।
अहिले तथ्य परिवर्तन नभए पनि एन्फा जागरुक बनेको लिग निर्देशक मिश्र दाबी गर्छन्। ‘विगतभन्दा अहिले खेललाई निश्पक्ष बनाउन अनुगमन गर्ने निकाय बनाएका छौं। हामीसँग इन्टीग्रिटी विभाग छ। त्यसैले उजुरीको आधारमा छानबिन गर्छ र कारबाहीको प्रक्रिया अगाडि बढाउँछ। बिनाआधार होइन, आधार लिएर आउनुपर्छ,’ उनी भन्छन्।
उनले जे सुकै दाबी गरे पनि २०६२ सालयता भने मिलेमतोको विषय जोडतोडले उठिरहेको छ। तर, खेल हुँदासम्म चुपचाप बस्ने र अन्तिममा नतिजालाई नै फरक पार्ने स्थिति आएपछि भने सामाजिक सञ्जालमार्फत् असन्तुष्टि पोख्ने प्रवृत्ति एन्फा राजनीतिको प्रभाव हो कि बाध्यता बस् हो त्यो आरसी–३२ र चन्दले जवाफ दिनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787905632.jpeg)
-1786602170.png)
-1786513116.png)
-1788425345.png)
