काठमाडौं–सरकारले आगामी आर्थिक वर्षका लागि ल्याएको बजेट सकारात्मक रहेको व्यवसायीहरुले बताएका छन्। बजेटमा उद्योगी तथा व्यवसायीहरुले दिएका माग पनि समेटिएको उनीहरुकाे भनाइ छ।
उद्योग वाणिज्य महासंघका अध्यक्ष शेखर गोल्छाले उत्पादन र कृषिमा जोड दिइएकाले बजेटबाट आफूहरु उत्साहित भएको बताए। भने, ‘हामी उत्साहित छौं किनभने उत्पादनलाई बढी प्रोत्साहन गर्ने भनिएको छ। हामीले उठाइरहेका धेरै विषय समेटिएका छन्।’
उनले बजेटको सैद्धान्तिक पक्ष कहिल्यै नकारात्मक नहुने बताउँदै कार्यान्वयन हेर्नुपर्ने समेत उल्लेख गरे। आफूहरुले उठाउँदै आएका साना उद्योगीलाई सरल कर्जा, ठूला उद्योगीलाई जग्गाको हदबन्दीका कुरा, कृषि उत्पादन र बजारीकरण, चिस्यान केन्द्र, रेमिट्यान्स पठाउनेलाई आइपिओ, विदेशी नागरिकले अपार्टमेन्ट किन्न पाउने कुरा र निर्यातमा जोडजस्ता विषय समेटिएको बताए।
यसैगरी, नेपाल उद्योग परिसंघका अध्यक्ष विष्णु अग्रवालले सरकारले ल्याएको बजेट स्वागतयोग्य भएको बताए। उनले भने, ‘बजेटमा जग्गा हदबन्दीसम्बन्धी कुरा उठेको छ। हामीले बजेटमा राखेका अधिकांश सुझाव सम्बोधन भएका छन्।’
अग्रवालले बजेट उद्योगकेन्द्रित भएको र आयात प्रतिस्थापनमा जोड दिएको बताए। उद्योगको जग्गा हदबन्दीसम्बन्धी व्यवस्था पुनरावलोकन गर्ने घोषणासमेत स्वागतयोग्य रहेको उनको भनाइ छ। यसका साथै रुग्ण उद्योगमा रहेको समस्या समाधान गर्नेतर्फ बजेट केन्द्रीत भएको अग्रवालले बताए।
उनले वैदेशिक लगानीसम्बन्धी ५ करोडको सीमा घटाएर २ करोड रुपैयाँमा ल्याइनु राम्रो विषय भएको बताए। यसका साथै निर्यातमा अनुदान दिने व्यवस्था र निर्यातयोग्य उद्योगलाई विद्युत महसुलमा छुट दिने नीति पनि स्वागतयोग्य रहेको उनले बताए। बजेट घोषणा उत्कृष्ट भए पनि कार्यान्वयनमा चुनौती रहेको उनले औंल्याए।
नेपाल उद्योग वाणिज्य संघकी पूर्वअध्यक्ष एवम् व्यवसायी भवानी राणाले बजेट कार्यान्वयनको पक्ष चुनौतीपूर्ण हुने बताएकी छन्। ‘बजेटमा निजी क्षेत्रले उठाएका केही विषय समेटिएका छन्। तर, कार्यान्वयनको पक्ष नै महत्वपूर्ण हो,’ उनले भनिन्, ‘कार्यान्वयन भएमा त्यो राम्रो नै हुनेछ। नत्र त यसअघि पनि यी विषय समेटिदै आएका थिए।’
स्वदेशी उत्पादनलाई प्रबन्धन गर्नेदेखि जग्गाको हदबन्दीलगायतका विषयमा केही विषय समेटिएको भन्दै उनले निजी क्षेत्रले उठाएका विषय केही समेटिएको बताइन्।
नेपाल उद्योग वाणिज्य महासंघका वरिष्ठ उपाध्यक्ष चन्द्र ढकालले सरकारले ल्याएको नयाँ बजेट समग्रमा राम्रो भएको बताए। बजेटपछि सञ्चारकर्मीलाई संक्षिप्त प्रतिक्रिया दिँदै ढकालले स्वदेशी उत्पादन र उद्योग प्रवद्र्धन, पर्यटन पूर्वाधार विकासमा बजेटले राहत दिने उनले बताए।
‘कृषि उत्पादन वृद्धि, स्वदेशी उत्पादन संरक्षण र उद्योग प्रवर्द्धन, पर्यटन पूर्वाधार विकासमा राम्रो बजेट आयो,’ ढकालले भने, ‘निजी क्षेत्रको माग धेरै हदसम्म राम्रो भयो,’ उनले उद्योगको जग्गा हदबन्दीजस्ता बजेटले सम्बोधन गरेको विषय निकै सराहनीय भएको बताए।
यसैगरी, उद्योगी एवं नेपाली काग्रेसका सांसद विनोदकुमार चौधरीले बजेट सकारात्मक भएको दावी गरेका छन्। उनले बजेटमा धेरै महत्वाकांक्षी कार्यक्रमसमावेश नभएको र कार्यान्वयन गर्न सकिने कुराहरु नै समेटिएकाले यसले परिर्वतन गर्ने बताए। ‘विदेशीले अपार्टमेन्ट खरिद गर्न पाउने कुरा सकारात्मक छ’ उनले भने ‘रोजगारमा वृद्धि गर्ने लक्ष्य लिएको छ। यसलाई कार्यान्वयन गर्न सक्ने हो भने राम्रो हुने छ।’
बजेट धेरै महत्वाकांक्षी नभएको भन्दै चौधरीले नियन्त्रण गर्नुपर्ने खर्च नियन्त्रण गरिएको, कर संकलनलाई फराकिलो पारिएको र दायरा वढाउने प्रयास पनि भएको दावी गरे। ‘बजेट नयाँ सोच र अहिलेको समयअनुकूल बनाउने प्रयास भएको छ’ उनले भने, ‘यो कार्यान्वयन हुने हो निकै सकारात्मक परिर्वतन हुन्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
