कैलालीः नवनिर्वाचित जनप्रतिनिधिले सम्हाले जिम्मेवारी, कसको कस्तो प्रतिवद्धता?

स्थानीय निर्वाचन

नेपाल लाइभ सोमबार, जेठ ९, २०७९ २०:५३

धनगढी- धनगढी उपमहानगरपालिकासहित कैलालीका १३ वटै स्थानीय तहमा नवनिर्वाचित जनप्रतिनिधीहरुले पद तथा गोपनियताको शपथ लिएका छन्।

सोमबार जिल्ला अदालतको सभाहलमा चार स्थानीय तहबाहेकका स्थानीय तहमा नवनिर्वाचित जनप्रतिनिधीहरुलाई मुख्य निर्वाचन अधिकृत जयानन्द पनेरुले पद तथा गोपनियताको शपथ ग्रहण गराएका हुन्।

कैलालीका गोदावरी नगरपालिका, बर्दगोरिया, चुरे र कैलारी गाउँपालिकामा नवनिर्वाचित जनप्रतिनिधीहरुले शुक्रबारनै कार्यभार सम्हालिसकेका थिए। सोमबार बाँकी स्थानीय तहमा नवनिर्वाचित जनप्रतिनिधिहरुले पद तथा गोपनियताको शपथ लिएको मुख्य निर्वाचन अधिकृत पनेरुले बताए।

पद तथा गोपनियताको शपथ लिए पनि कैलालीका केही पालिकामा नवनिर्वाचित जनप्रतिनिधीहरुले पदभार भने गरेका छैनन्। कैलालीको दुर्गम मानिएको मोहन्याल गाउँपालिकाका नवनिर्वाचित जनप्रतिनिधीहरुले पद तथा गोपनियताको शपथ गरे पनि पदभार भने गरेका छैनन्।

जानकी गाउँपालिकामा सोमबार पदभार ग्रहण गर्ने भनिए पनि हुन सकेको थिएन। सो गाउँपालिकाका अध्यक्ष गणेश चौधरीले पद तथा गोपनियताको शपथ गरे पनि मंगलबारदेखि कार्यभार सम्हाल्ने जनाइएको छ।
जोशीपुर गाउँपालिकाका अध्यक्ष चित्रबहादुर थारुले पनि मंगलबार कार्यभार सम्हाल्ने बताए।

सोमबार सुदूरपश्चिम प्रदेशकै एकमात्र उपमहानगरपालिकामा स्वतन्त्रबाट निर्वाचित नगर प्रमुख गोपाल हमालले पनि पद तथा गोपनियताको शपथ लिएका थिए। सोमबार बिहान पद तथा गोपनीयताको शपथ लिएपछि उपमहानगरपालिकाको मेयरका रुपमा पद्भार सम्हालेका हुन्।

हमालले धार्मिक विधिअनुसार पूजापाठ र मन्त्रोच्चारण गर्दै पदभार सम्हालेका हुन्। पदभार सम्हाल्दा स्वस्तिवाचनसहित पूजा गरिएको थियो।

हमालले धनगढीको योजनावद्ध विकास गर्न पहिलो पञ्चवर्षीय योजना बनाइ अघि बढ्ने प्रथम निर्णय गरेका छन्।
पदभार सम्हालेसँगै उनले प्रमुख प्रशाशकीय अधिकृत रामलाल श्रेष्ठले पेस गरेको फाइलमा हस्ताक्षर गर्दै सो निर्णय गरेका हुन्।

‘...सीमित स्रोत–साधनलाई प्रभावकारी ढंगबाट परिचालन गरी लक्ष्य हासिल गर्ने उद्देश्यका साथ योजनावद्ध विकासको थालनी गर्न आगामी आव २०७९/०८० देखि ०८३/०८४ सम्मको पहिलो पञ्चवर्षीय आवधिक योजना (विकास प्रशासनको प्रमुख आधारल रुपमा रहने) बनाइ कार्यान्वयनमा लैजाने...,’ सो निर्णयमा भनिएको छ।
हमालले उद्घाटन तथा स्वागत सम्मान जस्ता काममा आफूलाई नअल्झाउन धनगढीवासीलाई आग्रह गरे । आफूले प्राप्त गर्नुपर्ने सम्मान जति चुनावमा धगढीवासीले दिएको मतबाट गरिसकेको भन्दै अब आफूलाई काम गर्ने वातारण सिर्जना गरिदिन पनि उनले फेसबुकमार्फत आग्रह गेरका हुन्।

उनले लेखेका छन्, ‘यहाँहरुको अमूल्य मतबाट धनगढीको अभिभावकको जिम्मेवारीमा पुगाइसकेपछि अब मैले निर्वाह गर्नुपर्ने जिम्मेवारी पूरा गर्न मेरो सम्पूर्ण समय आजैदेखि लगाउने भएको हु“दा कृपया धनगढीवासी र यहाँका संघसंस्थाहरुलाई अति आवश्यक काम बाहेक उद्घाटन, सभा सेमिनार, स्वागत, सम्मान कार्यक्रम आदिमा नअल्झाई मलाई जनताको काम गर्ने वातावरण बनाइ सहयोग गरिदिनहुन हार्दिक अनुरोध गर्दछु ।’
यस्तै, लम्की चुहा नगरपालिकाकी नगर प्रमुख शुशिला शाहीले पदभारग्रहण गर्दै पार्टीको घोषणापत्र नविर्सिइ काम गर्ने बताएकी छिन्। ‘हामीले पहिलाकाले के गरे भन्ने तिर जा“दैनौ । हामीले के गर्ने भन्ने तिर लाग्ने हो’ उनले भनिन् –‘हामीले सुन्दर, समृद्ध, नगरपालिका हामीले बनाउने हो। यो नगरपालिका नेपालकै उत्कृष्ट नगरपालिका बनाउने गरि काम गर्ने छौं।’

उनले भ्रष्टाचार मुक्त नगरपालिका नभएसम्म विकास सम्भव नहुने बताइन्। ‘नगरपालिकालाई भ्रष्टाचारमुक्त बनाउने छु। मेरो जिम्मेवारी के हो म त्यही अनुसार काम गर्छु। यदि कोही कर्मचारीले भ्रष्टाचार गरेको थाहा पाए ठाउँका ठाउँ कारबाही गर्ने छु’ उनले भनिन्।

उनले नगरभित्र रहेका सामाजिक विकृति हटाउन पनि पहल गर्ने बताइन्। ‘यहाँका युवाहरु लागु औषधमा फसेका छन्, नगरपालिकालाई भ्रष्टाचारमुक्तसंगै लागुऔषधरहित नगरपालिका बनाउनेमा मेरो प्रयत्न रहनेछ’ उनले भनिन्।

उनले नगरपालिकामा छोरी जन्माउने आमालाई एक हजार रुपैयाँ उपलब्ध गराउने कार्यक्रम पनि लागु गर्ने बताइन्।

कैलालीको घोडाघोडी नगरपालिकाको नवनिर्वाचित नगर प्रमुख खडक बहादुर रावतले पदभार सम्हालेका छन्। सोमबार जिल्ला अदालत कैलालीमा मुख्य निर्वाचन अधिकृत जयानन्द पनेरूबाट पद तथा गोपनियताको शपथ लिएपछि घोडाघोडी नगरपालिकाको कार्यकक्षमा पुगेर पदभार सम्हालेका हुन्। उनी नगरपालिका पुग्दा कर्मचारीहरुले भव्य स्वागत गरेका थिए। रावतले आर्थिक वर्ष भित्रै भूमिहीन सुकुम्वासी, भूमिहीन दलितहरूलाई जग्गा उपलब्ध गराउन तथा अव्यवस्थित बसोबासीहरुलाई व्यवस्थापन गर्ने प्रस्ताव सदर गर्दै पदभार सम्हालेका छन्।

खडक बहादुर रावत समक्ष प्रमुख प्रशासकीय दिपक कुमार आचार्यले पेश गरेको प्रस्तावमा अगामी आर्थिक वर्ष २०७९ देखि लागु हुने गरी भूमि सम्बन्धी समस्या समाधान आयोग, लागत संकलन इकाईबाट भूमिहीन, दलित, सुकुम्वासी, अव्यवस्थित बसोबासीहरुको लागत संकलन गर्ने कार्य सम्पन्न भई तथ्यांक प्रविष्ट कार्य भई रहेकाले उक्त कार्यलाई तोकिएको समयमै सम्पन्न गर्ने गरी आवश्यक कार्य अगाडि बढाइने जनाइएको छ।

टीकापुर नगरपालिकाका रामप्रसाद डंगौरा थारुले पनि पदभार सम्हालेका छन्। सोमबार पद तथा गोपनियताको शपथ गरेसँगै उनले टीकापुरमा नगर प्रमुखको जिम्मेवारी सम्हालेका हुन्।

पदभार गर्दै उनले कार्यकक्षमा टीकापुर वैगचाको टीकापुर शहर बनाउने, चक्रपथको बाटो सञ्चालनमा ल्याउने र गुणस्तरिय शिक्षाका लागि नियमित अनुगमन गर्ने निर्णय गरेका छन्। पदभार पछि बोल्दै उनले नगरपालिकामा शिक्षा क्षेत्रका कर्मचारीहरुको लापरवाही रहेकाले विद्यालयमा १० बजेभित्र उपस्थित नहुने शिक्षकलाई विद्यालयमा निषेध गर्ने बताए। उनले भने –‘खाली ठाउँ जति पनि व्यक्तिको घरदेखि सार्वजनिक ठाउँमा विरुवा रोप्ने छौं।’

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

सम्मेलनमा सहभागी हुन परराष्ट्रमन्त्री राणा जापान प्रस्थान

जुम्लामा मार्सीधान रोपाइँ सुरु

आरके शर्माको संयोजकत्वमा एनआरएनए न्यायिक तथा मेलमिलाप समिति गठन