काठमाडौं– सुदूरपश्चिमको एकमात्र उपमहानगरपालिका रहेको धनगढी उपमहानगरपालिकामा स्वतन्त्र उम्मेदवार गोपाल हमालले अग्रता बढाउदै लगेका छन्। उनी गठबन्धनका उम्मेदवारभन्दा ११ हजार मतले अगाडि छन्।
पछिल्लो मतपरिणाम अनुसार हमालले २२ हजार ५४१ मत प्राप्त गर्दा गठबन्धनका तर्फबाट नेपाली कांग्रेसका उम्मेदवार नृपबहादुर वडले ११ हजार ५४४ मत प्राप्त गरेका छन्। नेकपा एमालेका उम्मेदवार रणबहादुर चन्दले भने ६ हजार ४२३ मत प्राप्त गरेका छन्।
उपप्रमुखमा भने गठबन्धनकी उम्मेदवारलाई पछि पार्दै नेकपा एमालेकी उम्मेदवार कन्दकलाकुमारी रानाले अग्रता लिएकी छन्। रानाले १० हजार ८८० मत प्राप्त गरेकी छन् भने गठबन्धनका तर्फबाट नेकपा माओवादी केन्द्रकी उम्मेदवार शान्तिकुमारी अधिकारी क्षेत्रीले १० हजार ७०२ मत प्राप्त गरेकी छन्।
गणना हुन बाँकी मत संख्या कम रहेकाले धनगढीमा स्वतन्त्रबाट उम्मेदवार रहेका हमालले प्रमुखमा जित हासिल गर्ने निश्चित जस्तै देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
