काठमाडौं- संस्कृति, पर्यटन तथा नागरिक उड्डयन मन्त्री प्रेमबहादुर आलेले नेपाली वायु सेवा कम्पनीहरुले यात्रुलाई घण्टौं विमानस्थलमा कुराउने गरेको भन्दै चर्को आलोचना गरेका छन्।
शुक्रबार पर्यटन मन्त्रालयद्वारा गठित पर्यटन पुनरुत्थान प्राविधिक समितिले तयार पारेको प्रतिवेदन बुझ्ने क्रममा मन्त्री आलेले ८ बजे यात्रुहरुलाई बोलाएर ११/१२ बजे जहाज उडाउने काम ठीक नभएको बताए।
'जति बजे जहाज उडाउने हो यात्रुहरुलाई त्यही अुनसार बोलाउनोस्' उनले भने, 'अहिले समयमै घरेलु उडान नहुने समस्या देखिएको छ। त्यसैले हामीले राति १२ बजेसम्म पनि विमानस्थल खुला राख्ने व्यवस्था मिलाएका छौं।'
मन्त्री आलेले वायु सेवा कम्पनीहरुलाई नेपालभित्र उडान गर्ने पर्यटकहरुलाई नेपाली सरह शुल्क लिन पनि सुझाव दिए।
उनले त्रिभुवन अन्तर्राष्ट्रिय विमानस्थलमा पर्यटकहरुलाई सुविधा दिलाउने बारेमा आफूले प्रधानमन्त्री, गृहमन्त्री र अर्थ मन्त्रीसँग पनि कुरा गरेको तर अझै समन्वय हुन नसकेको बताए।
नेपाली कम्पनीले अन्तर्राष्ट्रिय विमानस्थलस्थित विमानस्थलको शौचालय सफा राख्न नसके विदेशी कम्पनीलाई जिम्मा दिनेबारे पनि सरकारले सोचिरहेको उनले बताए।
प्राविधिक समितिले बुझायो प्रतिवेदन
पर्यटन मन्त्रालयमा आयोजित समारोहमा प्रतिवेदन बुझाउँदै पर्यटन पुनरुत्थान प्राविधिक समितिका संयोजक राजा राम गिरीले कोभिड–१९ का कारण समग्र पर्यटन क्षेत्र एकदमै अप्ठ्यारो अवस्थामा पुगेको बेला उक्त समिति गठन गरिएको बताए। उनले झन्डै अढाइ महिना लगाएर पर्यटन व्यवसायी तथा विज्ञहरुसँग छलफल गरी प्रतिवेदन तयार गरिएको बताए।
उक्त अवसरमा व्यवासयी भास्करराज राजकर्णिकारले नीतिगत सुधारका बारेमा, क्याप्टेन सुरज भण्डारीले यातायात तथा नागरिक उड्डयनको बारेमा, यांकिला शेर्पाले नयाँ पर्यटन गन्तव्य प्रवर्द्धनका बारेमा, सुम्निमा उदासले अन्तर्राष्ट्रिय पर्यटन तथा ब्रान्डिङका बारेमा र सुरेश सिंह बुडालले पर्यटन प्रवर्द्धन सम्बन्धी प्रस्तावित कार्यक्रमबारे बताएका थिए।
पर्यटन सचिव महेश्वर न्यौपानेले कोभिड–१९ का कारण पर्यटन क्षेत्रमा परेको असरलाई न्यूनीकरण गर्न विशेष प्याकेज ल्याउने उद्देश्यले पर्यटन पुनरुत्थान निर्देशक समिति तथा पर्यटन पुनरुत्थान प्राविधिक समिति गठन गरिएको बताए।
उनले आउँदो आर्थिक वर्षमा नेपालको आर्थिक वृद्धिमा उल्लेख्य सुधार हुने अपेक्षा गरिएको बताउँदै पर्यटन क्षेत्रको पनि सँगसँगै वृद्धि होस् भनेर नेपाल सरकारले काम गरि रहेको बताए।
पर्यटन पुनरुत्थान प्राविधिक समितिले तयार पारेको प्रतिवेदनमा नेपालमा सबैभन्दा बढी पर्यटक पठाउने शीर्ष १० मुलुकहरुस्थित नेपाली दूतावासहरुमा पर्यटन अधिकारीहरु नियुक्त गर्ने, पर्यटन सेवा प्रदायकहरु र पर्यटनसँग सम्बन्धित सबैबाट कुनै पनि आपत्कालीन मामिलाहरुको जवाफ दिन हप्ताको सातैदिन र २४ सै घण्टा उपलब्ध एक प्रशिक्षित, द्रुत र समर्पित (क्विक रेस्पन्स टिम) को अवधारणामा एउटा पर्यटन टोली मन्त्रलयमै व्यवस्था गर्ने, बढ्दो पर्यटन बजारभित्र आतिथ्य र सेवा क्षेत्रमा आवश्यक पर्ने प्रशिक्षित जनशक्ति तयार गर्न नेपाल पर्यटन तथा होटेल व्यस्थापन एकेडेमी (एनएटीएचएम) को सहकार्यमा सातवटै प्रदेशमा पर्यटन तालिम केन्द्रहरुको स्थापना गर्ने लगायतका सुझावहरु दिइएका छन्।
त्यसैगरी, प्रतिवेदनले नेपालका धेरै दर्शक र अनुयायी भएका व्यक्तित्वहरुलाई विभिन्न देशहरुमा पर्यटन सद्भावना दूत नियुक्त गर्ने, नेपाललाई अन्तर्राष्ट्रियस्तरमा प्रवर्द्धन गर्न विगतमा योगदान पुर्याएका शीर्ष सेलिब्रेटीहरु, पर्वतारोहीहरु, खेलाडीहरुलाई नेपाल आमन्त्रण गर्ने, अन्तरक्रियात्मक वेबसाइट र एप डिजाइन गर्ने, अन्तर्राष्ट्रिय र घरेलु विमानस्थलहरुका सबै आगमन विन्दुहरुमा प्रशिक्षित र मैत्रीपूर्ण स्वयंसेवकहरु नियुक्त गर्ने सुझाव दिएको छ।
यस्तै, स्वच्छ, सफा हरियाली नेपालको अवधारणामा स्थानीय निकायहरुसँग सहकार्य गरी देशभरिका पर्यटकीय स्थलहरुमा सरसफाइमा ध्यान दिनका लागि राष्ट्रिय सरसफाइ अभियान सञ्चालन गर्ने जस्ता सुझावहरु दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
