काठमाडौं– सत्ता गठबन्धन दलका आधिकारिक उम्मेदवारविरुद्ध बागी उम्मेदवार दिएकाहरुले आफ्नो उम्मेदवारी फिर्ता नलिए उनीहरुलाई सम्बन्धित पार्टीले कारबाही गर्ने भएका छन्। प्रधानमन्त्रीको सरकारी निवास बालुवाटारमा शुक्रबार बिहान बसेको गठबन्धनको बैठकमा बागी उम्मेदवारी फिर्ता नलिनेलाई सम्बन्धित दलले कारबाही गर्ने निर्णय गरेको हो।
शुक्रबारको बैठकमा सहभागी राष्ट्रिय जनमोर्चाका सचिव हिमलाल पुरीले आधिकारिक उम्मेदवारका विरुद्ध बागी उम्मेदवारी दिएकाहरुलाई फिर्ता गराउन लगाउने सहमति भएको बताए। फिर्ता नलिनेको हकमा सम्बन्धित पार्टीले अनुशासनको कारबाही गर्ने पुरीको भनाइ छ।
‘भरतपुरदेखि विभिन्न ठाउँमा गठबन्धनका आधिकारिक उम्मेदवारविरुद्ध बागी दिएकालाई फिर्ता गराउने भन्ने छलफल भएको छ,’ उनले भने, ‘फिर्ता नलिनेहरुको हकमा सम्बन्धित पार्टीले नै अनुशासनको कारबाही गर्नेछ।’
बैठकमा मुख्य रुपमा भरतपुर महानगरका गठबन्धनका आधिकारिक उम्मेदवार रेनु दाहालविरुद्ध बागी उम्मेदवारी दिएका नेपाली कांग्रेसका नेता जगन्नाथ पौडेलका विषयमा नै छलफल केन्द्रित रहेको अर्का एक नेताले जानकारी दिए।
पौडेललाई उम्मेदवारी फिर्ता गराउनका लागि नेपाली कांग्रेसको नेतृत्व नै लागेको छ। सभापति शेरबहादुर देउवाले आफ्नो विशेष दूतका रुपमा गृहमन्त्री बालकृष्ण खाण र प्रधानमन्त्री कार्यालयका राज्यमन्त्री उमेश श्रेष्ठलाई भरतपुर पठाएका थिए। तर, उम्मेदवारी दिएका पौडेलले आफूले फिर्ता नलिने अडान कायमै राखेका छन्।
नेपाली कांग्रेसले शुक्रबार नै एक विज्ञप्ति जारी गर्दै बागी उम्मेदवारी दिएका सबैलाई फिर्ता लिन र फिर्ता नलिए प्रस्तावक र समर्थक समेतलाई पार्टीको विधानअनुसार क्रियाशील सदस्य समेत नरहने गरी निष्कासन गरिने चेतावनी दिइसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
