काठमाडौं- सत्ता गठबन्धनले वैशाख ३० को स्थानीय तह निर्वाचनका लागि गठबन्धनका उम्मेदवारविरुद्ध बागी मनोनयन दर्ता गरेकाहरुलाई आज साँझ पाँच बजेसम्म उम्मेदवारी फिर्ता लिन अन्यथा कारबाहीको भागिदार बन्न चेतावनी दिएको छ।
सत्ता गठबन्धनले तालमेलको निर्णयको विपक्षमा उम्मेदवारी दर्ता गरेका बागी उम्मेदवारहरुलाई शुक्रबार साँझ पाँच बजेसम्म उम्मेदवारी फिर्ता लिन लिन निर्देशन जारी गर्दै अन्यथा त्यस्ता उम्मेदवारलाई कारबाही गर्न सम्बन्धित पार्टीलाई निर्देशन जारी गरेको हो।
शुक्रबार अपराह्न ५ बजेभित्र उम्मेदवारी फिर्ता लिन बागी उम्मेदवारलाई आग्रह गरिएको र फिर्ता नलिए पार्टीले कारबाही गर्नुपर्ने निर्णय भएको गठबन्धन अन्तर्गतको कार्यदलका एक सदस्यले बताए। कांग्रेस नेता रामचन्द्र पौडेल नेतृत्वमा रहेको स्थानीय तह अनुगमन एवं चुनावी तयारी संयन्त्रले यस्तो निर्णय गरेको हो।
'उम्मेदवारी फिर्ता नलिने उम्मेदवारलाई आ-आफ्नो दलबाट कारबाहीका लागि सिफारिस गर्ने निर्णय भएको छ,' समितिका एक सदस्यले भने, 'आधिकारिक उम्मेदवारविरूद्ध स्वतन्त्र उम्मेदवारी दिनेलाई सम्बन्धित पार्टीले कारबाहीको निर्णय कानुन सम्वत गर्छ।'
मुख्य निर्वाचन अधिकृत कार्यालय र निर्वाचन अधिकृत कार्यालय पुगेर निर्वाचन आयोगले दिएको समयभित्रै उम्मेदवारी फिर्ता नलिने बागी उम्मेदवारलाई कारबाही गर्ने ती सदस्यले बताए।
गठबन्धनको चुनावी तयारी तथा अनुगमन समिति बैठकले बागी उम्मेदवारलाई पार्टीको अनुशासन र निर्णय पालना गर्न अन्तिम पटक सत्ता गठपन्धनका तर्फबाट आग्रह गर्ने निर्णय पनि गरेकाे छ।
'अन्तिम पटक बागी उम्मेदवारी फिर्ता लिन आग्रह गर्ने र अटेर गरेमा पार्टीले कारवाही गर्छ' ती सदस्यले भने, 'पार्टी अनुशासन र निर्णय विपरित गएको अभियोगमा साधारण सदस्य समेत नरहने गरि कारबाहीसम्मको निर्णय हुनसक्छ।'
वैशाख ११ र १२ गते दिएको उम्मेदवारीमा वैशाख १६ गते साँज पाँच बजेसम्म फिर्ता लिनसक्ने निर्वाचन आयोगको कार्यतालिका रहेको छ।
सत्ता गठबन्धनका लागि खासगरी भरतपुर, पोखरा र जनकपुर लगायत क्षेत्रमा नेपाली कांग्रेसका वागी उम्मेद्वारले तनाव थपेको छ। भरतपुरमा बागीको उम्मेदवारी फिर्ता गराउनका लागि गृहमन्त्री वालकृष्ण खाण लगायत सक्रिय छन्। बागी उम्मेदवारलाई भेट्न उनी चितवन पुगेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
