भरतपुर– संविधान जारी भएपछि पहिलोपटक स्थानीय तहको चुनाव हुँदाको जस्तै, यसपटक पनि राजनीतिक चर्चा र चासोको केन्द्रमा छ, चितवनको भरतपुर महानगरपालिका। नेपाली कांग्रेसको साथ पाएर अघिल्लोपटक भरतपुरको मेयर निर्वाचित भएकी रेणु दाहाल फेरि चुनावी मैदानमा उत्रिएकी छन्।
२०७४ सालको जस्तै यसपटकको स्थानीय चुनावमा पनि रेणुलाई जिताउन उनको पार्टी नेकपा माओवादी केन्द्रसँगै नेपाली कांग्रेस (नेतृत्व तह) जोडतोडका साथ लागिरहेको छ। माओवादी केन्द्रका अध्यक्ष पुष्पकमल दाहाल (प्रचण्ड)की छोरीका लागि 'सहज वातावरण' बनाइदिन माओवादीभन्दा कांग्रेसका नेताहरु सक्रिय भएर लागेका छन्, यसपटक पनि।
तर, अवस्था २०७४ को जस्तो सहज छैन। यसपटक कांग्रेस कार्यकर्ताहरुले चितवनमा 'विद्रोह'को घोषणा गरेका छन्। र, विद्रोहको नेता बनेका छन्– कांग्रेसका पुराना नेता तथा पूर्वसांसद जगन्नाथ पौडेल। पौडेलले भरतपुरको मेयरमा स्वतन्त्र उम्मेदवारी दर्ता गराएका छन्।
चितवनमा कांग्रेससहित सत्ता गठबन्धनका दलहरुको समर्थनमा माओवादी केन्द्रबाट रेणु भरतपुरको साझा मेयरकी उम्मेदवार हुन्। तर, पौडेलको उम्मेदवारी गठबन्धन लागि चुनौती बनेको छ।
पौडेलको उम्मेदवारी फिर्ता गराउन भन्दै अहिले कांग्रेसका 'प्रभावशाली' नेताहरु चितवन दौडाहमा छन्। गृहमन्त्री बालकृष्ण खाण र राज्यमन्त्री उमेश श्रेष्ठ प्रधानमन्त्री एवम् कांग्रेस सभापति शेरबहादुर देउवाको 'दूत' बनेर चितवन पुगेका छन्। उनीहरुले पौडेलसँग विभिन्न चरणमा छलफल गरेका छन्।
प्रधानमन्त्री देउवाले समेत फोन गरेर पौडेललाई काठमाडौं बोलाएका छन्।
सोमबार भएको मनोनयनमा पौडेलले भरतपुरको मेयरमा उम्मेदवारी दिएपछि माओवादी केन्द्रका अध्यक्ष प्रचण्ड मंगलबार सुटुक्क चितवन पुगेका थिए। त्यहाँ उनले पौडेलको उम्मेदवारी फिर्ता गराउने विषयमा छलफल गरे।
प्रचण्ड मंगलबारै फर्किए। बुधबार गृहमन्त्री खाण चितवन पुगे। खाणपछि राज्यमन्त्री श्रेष्ठ पनि चितवन पुगे। पौडेललाई फकाउनकै लागि भनेर खाण काठमाडौं नफर्कि उतै बास बसे। तर, पौडेलले उम्मेदवारी फिर्ता लिन मानेका छैनन्।
पूर्वसांसद पौडेल चितवनको राजनीतिमा 'स्वच्छ छवि' भएको नेताका रुपमा चिनिन्छन्। मतदाताबीच पनि राम्रो प्रभाव भएका पौडेलले कांग्रेसको धेरै मत 'काट्ने' आकलन छ।
स्थानीय तह निर्वाचनको मिति घोषणा भएदेखि नै भरतपुरको मेयर छाड्न नसकिने बताउँदै आएका कांग्रेसका जिल्ला तहका र केन्द्रमा समेत प्रतिनिधि गर्ने कांग्रेस नेताहरुले पनि पौडेललाई साथ दिएका छन्। 'संगठन जीवित राख्न पनि' यसपटक भरतपुरको मेयर छाड्न नसकिने बताउँदै आएका नेताहरुले गठबन्धन गर्ने पार्टी केन्द्रको निर्देशन पालना त गरेका छन्, तर स्वीकार गरेका छैनन्। चितवन कांग्रेसका अधिकांश नेताले औपचारिक रुपमा नबोले पनि भित्री रुपमा भने पौडेललाई सहयोग गरिरहेका कार्यकर्ताहरुको भनाइ छ।
चितवनमा खाणको दौडादौड!
उम्मेदवारी फिर्ताको अन्तिम समय जति नजिकिँदै छ, गठबन्धनका नेताहरुको चितवन दौडधुप पनि त्यति नै बढ्दो छ। बुधबार चितवन पुगेका खाणले कांग्रेसका प्रभावशाली नेताहरुलाई भेटेर पौडेलको उम्मेदवारी फिर्ता लिने वातावरण बनाइदिन आग्रह गरेका छन्।
खाणले बुधबार सुरुमा पूर्व जिविस सभापति कृष्णलाल सापकोटालाई भेटे। सापकोटा पौडेलको प्रस्तावक रहेका थिए। राजनीतिमा पौडेलका समकालीन भएकाले पनि उनको उम्मेदवारी फिर्ता लिने वातावरण बनाउन सापकोटासँगको भेट उपलब्धिमूलक हुने खाणको विश्वास थियो। तर, सापकोटाको जवाफ अपेक्षा गरेजस्तो आएन।
सापकोटापछि खाणले चितवन कांग्रेसका पुराना नेता भीमबहादुर श्रेष्ठलाई पनि उनकै घरमा पुगेर भेटे। श्रेष्ठले पनि संगठन र पार्टीलाई बचाउनका लागि हरेकपटक अरु पार्टीलाई मत हाल्न नसकिने जवाफ दिए।
दुवैजना सँगको भेटपछि गृहमन्त्री खाण उम्मेदवार पौडेललाई भेट्न उनको निवासमा पुगेका थिए। कृष्णनगरस्थित पौडेल निवासमा भएको छलफलमा पौडेलले आफ्नो उम्मेदवारीको विषयमा आफूले मात्रै निर्णय गरेर नहुने जवाफ दिए। भरतपुरका समग्र कांग्रेस नेता र कार्यकर्ताको आग्रहपछि मात्रै आफू उम्मेदवार बनेको उनको भनाइ छ।
अहिले सत्ता गठबन्धन आवश्यक भएकाले, यसलाई बचाउनका लागि पनि कार्यकर्ताहरु तयार हुनुपर्ने भएकाले, पार्टीले नचाहेर भरतपुर गुमाउनु परेको तर्क गरेका थिए। तर, पौडेल आफ्नो अडानमा कायम रहेपछि फेरि छलफल गर्ने भन्दै खाण निस्केका थिए।
पौडेललाई मनाउन पूर्वप्रधानन्यायाधीश पनि सक्रिय
पौडेलको उम्मेदवारी फिर्ता गराउने विषयमा नेताहरु मात्रै होइन, पूर्वप्रधानन्यायाधीश समेत सक्रिय भएका छन्। पौडेललाई मनाउन पूर्वप्रधानन्यायाधीश गोपाल पराजुली पनि भरतपुरको कृष्णनगर पुगेका छन्।
चितवन काग्रेसका नेतासँग पुरानो सम्वन्ध भएका पराजुलीको पौडेलसँग पनि राम्रो सम्बन्ध भएको बताइन्छ। पौडेल सँगको सम्बन्धकै कारण प्रधानमन्त्री देउवाको आग्रहमा पराजुली कृष्णनगर पुगेका हुन्।
पराजुलीले भने पौडेलसँग व्यक्तिगत सम्बन्ध भएको र व्यक्तिगत सम्बन्धकै विषयमा छलफल गर्न भेट भएको बताएका छन्। पौडेलसँगको आफ्नो भेटलाई राजनीतिक अर्थ दिएर अतिरञ्जित नगरिदिनु पराजुलीले आग्रह गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
