काठमाडौं- वैशाख ३० गतेको स्थानीय तह निर्वाचनमा मनोनयन दर्ता गरेका १५ जनाको उम्मेदवारी खारेज भएको छ।
निर्वाचन आयोगले विगतका निर्वाचनमा समानुपातिकतर्फको बन्दसूचीमा नाम रहेका तर स्थानीय निर्वाचनका लागि उम्मेदवारी दिएकाहरुको उम्मेदवारी खारेज गरिएको जनाएको छ।
प्रतिनिधि सभा र प्रदेश सभा सदस्यको समानुपातिकतर्फ उम्मेदवार रहेका व्यक्ति स्थानीय निर्वाचनमा समेत उम्मेदवार भएपछि निर्वाचन अधिकृतको कार्यालयले ती व्यक्तिको उम्मेदवारी खारेज गरेको आयोगका प्रवक्ता शालिकराम शर्माले बताए।
निर्वाचन आयोगले आगामी निर्वाचनका लागि तोकेको समयमा उम्मेदवारी दर्तापछि भोलिपल्ट वैशाख १४ गते अस्वीकृत भएको जानकारी निर्वाचन अधिकृतको कार्यालयबाट उनीहरुलाई दिइएको थियो। कतिपय स्थानमा कुन दलले समानुपातिकको सूचिमा राखेको हो जानकारी नपाएका कारण फिर्ता लिने प्रक्रिया नगर्दा उनीहरुले उम्मेदवार हुने मौका गुमाएका आयोगले जनाएको छ।
वैशाख ११ र १२ गते निर्वाचन अधिकृतको कार्यालयले उम्मेदवारी लिएको थियो तर पछि सफ्टवेयरमा परीक्षण गर्दा उनीहरुको नाम समानुपातिको सूचीमा भएको पाइएपछि खारेज गरिएको आयोगले जनाएको छ।
प्रतिनिधि सभा र प्रदेश सभा निर्वाचन २०७४ मा राजनीतिक दलले समानुपातिकतर्फ बुझाएको बन्दसूचीमा नाम रहेका व्यक्तिले स्थानीय निर्वाचनमा समेत भाग लिन खोज्दा उम्मेदवारी खारेज हुने कानुनी व्यवस्था छ। स्थानीय तह निर्वाचन निर्देशिका, २०७९ मा उम्मेदवारको अयोग्यता सम्बन्धमा उक्त व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
