बागी उम्मेदवारी दिएका नेपाली कांग्रेस नेता एवम् पूर्व सांसद जगन्नाथ पौडल।
भरतपुर– चितवनको भरतपुर महानगरपालिकामा स्वतन्त्र (बागी) उम्मेदवारी दिएका नेपाली कांग्रेस नेता एवम् पूर्व सांसद जगन्नाथ पौडलको उम्मेदवारी फिर्ता लिन गठबन्धनले पहल गरिरहेको छ।
गृहमन्त्रीसमेत रहेका प्रधानमन्त्री शेरबहादुर देउवाका विश्वासपात्र बालकृष्ण खाण पौडेलको उम्मेदवारी फिर्ताको 'पहल गर्न' भरतपुरमै रहेका बेला अर्का मन्त्री पनि चितवन आएका छन्। प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठ बिहीबार बिहान भरतपुर आएका हुन्।
भरतपुर आएलगत्तै राज्यमन्त्री श्रेष्ठ बागी उम्मेदवार पौडेललाई भेट्न उनको निवास पुगेका छन्। भरतपुर-७ कृष्णपुरस्थित निवासमा राज्यमन्त्री श्रेष्ठले पौडेलसँग छलफल गरेका हुन्।
श्रेष्ठले उम्मेदवारी फिर्ता लिन आग्रह गरेको भए पनि पौडेलले भने चितवनमा कांग्रेस बचाउन आफ्नो उम्मेदवारी रहेको र फिर्ता लिन नसक्ने बताएको स्रोतको भनाइ छ।
यसअघि देउवाको 'दूत' बनेर चितवन आएका खाणले असन्तुष्टलाई सम्झाउन आफू चितवन आएको बताएका थिए।
‘बागीलाई मिलाउन मैले प्याकेज त ल्याएको छैन। मन ल्याएर आएको छ। म उहाँहरूलाई सम्झाउँछु। उहाँहरूले केन्द्रको निर्णय मान्नुहुन्छ,’ खाणले भने।
सत्ता गठबन्धनको शीर्ष तहमा भएको सहमतिअनुसार भरतपुरको मेयर माओवादी केन्द्रले पाएको थियो। माओवादी केन्द्रकी रेनु दाहालले मेयरको उम्मेदवारी दर्ता गराइसकेकी छन्।
गठबन्धनप्रति असन्तुष्टि जनाउँदै कांग्रेस नेता पौडेलले पनि भरतपुरको मेयरमा उम्मेदवारी दर्ता गराएका छन्। पौडेलले उम्मेदवारी दर्ता गराएपछि माओवादी केन्द्रका अध्यक्ष एवम् भरतपुरको मेयरकी उम्मेदवार रेनुका बुवा पुष्पकमल दाहाल (प्रचण्ड) मंगलबार चितवन पुगेका थिए।
चितवन पुगेर प्रचण्डले कांग्रेसबाट बागी उम्मेदवारी दिएका पौडेललाई समेत भेटेका थिए।
यसैबीच, सत्ता गठबन्धनमा आबद्ध पाँच दलको बुधबार बसेको बैठकले पार्टी मातहतका कमिटीलाई विभिन्न सात बुँदे निर्देशन दिएका छन्। उनीहरूले स्थानीय निर्वाचनका लागि परेका बागी उम्मेदवारी फिर्ता लिन भनेका छन्। '६ महानगर र ११ उप-महानगरपालिकामा गठबन्धनको निर्णय विपरीत गठबन्धन भित्रका दलको तर्फबाट दर्ता भएको उम्मेदवारी सम्बन्धित दलले फिर्ता गर्ने,' निर्देशनको पहिलो बुँदामा भनिएको छ।
त्यस्तै, गठबन्धनभित्रका दलका सदस्यले स्वतन्त्र हैसियतमा दर्ता गरेका उम्मेदवारीहरू फिर्ता गराउन सम्बन्धित दलले आवश्यक कार्य गर्ने भनिएको छ। ६ महानगर र ११ उप-महानगरपालिकामा गठबन्धनको प्रदेश र जिल्ला संयन्त्रको बैठक आजै (बुधबार) राखेर वडाका विभिन्न पदहरूमा गठबन्धनभित्रका दलहरूका बिचमा सिट बाँडफाँटको सम्झदारी गर्ने निर्देशन पनि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
