काठमाडौं– स्थानीय तहको निर्वाचनमा आफन्तहरू नै चुनावी मैदानमा उत्रिएका छन्। श्रीमान्–श्रीमतीदेखि दाजुभाइसम्म निर्वाचनको प्रतिस्पर्धामा छन्।
चारवटा उपमहानगरपालिका रहेको लुम्बिनी प्रदेशको बाँके जिल्लाको नेपालगञ्ज उपमहानगरपालिकामा दाजुभाइबीच चुनावी प्रतिस्पर्धा हुँदैछ। उपमहानगरपालिका–१ मा फरक–फरक पार्टीबाट दाजुभाइले उम्मेदवारी दर्ता गराएका छन्।
१ नम्बर वडाध्यक्षका लागि नेपाली कांग्रेसको तर्फबाट विनोद रिजाल र नेकपा (एमाले)को तर्फबाट प्रमोद रिजालले उम्मेदवारी दिएका छन्। नेपाली कांग्रेसबाट उम्मेदवारी दिएका विनोदले २०४६ देखि विद्यार्थी राजनीति सुरु गरेका हुन्। उनी हाल तरुण दल बाँकेको सचिव छन्।
त्यस्तै, बाँकेकै कोहलपुर नगरपालिकामा पनि दुई सहोदर दाजुभाइबीच प्रतिस्पर्धा हुने भएको छ। नगरपालिकाको वडा नम्बर ३ मा अध्यक्षका लागि दाजु तारकेश्वर रिजाल र भाइ माधव रिजाल प्रतिस्पर्धामा छन्। दाजु तारकेश्वर नेकपा माओवादी केन्द्रबाट र भाइ माधवले नेकपा एमालेबाट उम्मेदवारी दर्ता गराएका छन्। तारकेश्वर २०७४ सालको चुनावमा भाइ माधवसँग ६५ मतले पराजित भएका थिए।
बर्दिया जिल्लामा पनि स्थानीय तहको निर्वाचनमा ससुरा–बुहारी र श्रीमान–श्रीमती उम्मेदवार बनेका छन्। गेरुवा गाउँपालिकाको उपाध्यक्षमा बुहारी र वडाध्यक्षमा ससुरा उम्मेदवार बनेका हुन्। गाउँपालिकाको उपाध्यक्षमा लक्ष्मी चौधरीले नेपाली कांग्रेसबाट उम्मेदवारी दर्ता गराएकी छन्। त्यस्तै, लक्ष्मीका ससुरा बलबहादुर थारुले गेरुवा गाउँपालिका–३ को वडाध्यक्षका लागि उम्मेदारि दर्ता गराएका छन्। बलबहादुरले नेकपा माओवादी केन्द्रको तर्फबाट उम्मेदवारी दिएका छन्।
बर्दियाकै राजापुर नगरपालिकामा एउटै पार्टीबाट श्रीमान र श्रीमती मेयर र उपमेयरमा उम्मेदवार बनेका छन्। राप्रपाबाट नगरपालिकाको मेयरमा राममणि उपाध्याय र उपमेयरमा उनकी श्रीमती सम्झना उपाध्यायले उम्मेदवारी दर्ता गरेका छन्।
बाजुराको बडिमालिका नगरपालिका–२ मा ज्वाइँ–जेठानबीच प्रतिस्पर्धा हुने भएको छ। वडाध्यक्षका लागि जेठान गोपाल कार्की र ज्वाइँ डम्मर महतको उम्मेदवारी परेको छ। कार्कीले नेपाली कांग्रेस र महतले नेकपा एमालेबाट उम्मेदवारी दर्ता गरेका छन्।
यो प्रतिस्पर्धा अघिल्लो स्थानीय तहको निर्वाचन २०७४ सालदेखिको हो। त्यतिबेला जेठान–ज्वाइँबीच नै प्रतिस्पर्धा भएको थियो। कार्की ६ मतले पारजित भएका थिए। पहिलो निर्वाचनमा डम्मरले २ सय ४२ मत पाएका थिए भने गोपालले २ सय ३६ मत ल्याएका थिए।
मत परिणामलाई लिएर जेठान–ज्वाइँको मुद्दा उच्च अदालत दिपायलसम्म पुगेको थियो। कार्की नेपाली कांग्रेस बडिमालिका नगर सभापति हुन् भने डम्मर नेकपा एमालेको जिल्ला कमिटी सदस्य तथा बडिमालिका नगर इन्चार्ज हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
