काठमाडौं–नेकपा (एमाले) महासचिव शंकर पोखरेलले ७० प्रतिशतभन्दा बढी नयाँ मतदाता आफ्नो पार्टीको पक्षमा उभिने दाबी गरेका छन्। अध्यक्ष केपी ओलीको राष्ट्र निर्माणको भिजनबाट धेरैजसो नयाँ मतदाता आफ्नो पार्टीको पक्षमा उभिने अवस्था आएको तर्कसमेत उनले गरे।
स्थानीय तह निर्वाचनलाई केन्द्रित भएर पार्टीको सम्पर्क समन्वय कमिटीले मंगलबार काठमाडौंमा गरेको एक कार्यक्रममा बोल्दै उनले ओलीको राष्ट्र निर्माणको भिजनले छोएकै कारण मतदाताहरुले ‘आई लभ यू केपी बा’ भन्ने गरेको बताए। अब आउने स्थानीय निर्वाचनसहितका तीन वटै तहको निर्वाचनबाट आफ्नो पार्टीले सरकार बनाउने समेत महासचिव पोखरेलले दोहोर्याए।
महासचिव पोखरेलले भने, ‘करिब ३५-३६ लाख नयाँ मतदाताहरु थपिएका छन्। उनीहरुका बीचमा एउटा सर्वेक्षण गर्यौं हामीले। त्यो सर्वेक्षणको नतिजा के आयो त भन्दाखेरि करिब ७० प्रतिशत एमालेप्रति झुकाव राख्ने मतदाताको रुपमा प्रकट भएको छ।’
उनले सत्तारुढ काँग्रेस आफ्नो पार्टीसँग चुनावी प्रतिस्पर्धा गर्न नसक्ने अवस्थामा पुगेको दाबी पनि गरे। काँग्रेससहितका सत्तारुढ दलहरुले आफ्नो पार्टीसँग एक्लै चुनाव लड्ने आँट गर्न नसकेको उनको भनाइ थियो। सत्तारुढ दलहरुले स्थानीय तह निर्वाचनमा उम्मेदवारी मनोनयन गर्दा नै निराशा प्रदर्शन गरेको उनले बताए। अब नेपालमा सबभन्दा ठूलो पार्टी र राष्ट्रिय शक्तिको रुपमा एमाले आएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
