चितवन–नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले मंगलबार गृहजिल्ला चितवनका पाँच दलीय गठबन्धनका नेताहरूसँग भेट गरेका छन्।
उनले नेपाली कांग्रेस र नेपाल कम्युनिष्ट पार्टी (एकीकृत समाजवादी) का नेताहरूसँग भेट गरेका हुन्। छोटो समयका लागि चितवन आएका दाहालले नेपाली कांग्रेस चितवनका सभापति राजेश्वर खनाल र भरतपुर महानगरपालिकाका उपप्रमुखका उम्मेदवारसमेत रहेका नगर सभापति चित्रसेन अधिकारीसँग भेट गरेका हुन्।
उनले समाजवादीका केन्द्रीय सदस्य कृष्ण खनालसँग पनि भेट गरेका थिए। भेटपछि कांग्रेस सभापति अधिकारीले गठबन्धनलाई सशक्त बनाएर अघि बढाउने विषयमा छलफल भएको बताए। वडा तहसम्म मिलाएर लैजानुपर्नेमा दाहालको जोड थियो। नेपाली कांग्रेसका नेता जगन्नाथ पौडेलले प्रमुख पदमा बागी उम्मेदवारी दिएको विषयमा पनि छलफल भएको जनाइएको छ।
दाहाललाई भेटेपछि बागमती प्रदेशका मन्त्रीसमेत रहेका समाजवादीका नेता कृष्ण खनालले आफूसँगको भेटमा दाहालले वडा तहसम्म मिलाउन र असन्तुष्टलाई सम्झाउन आग्रह गरेको बताए। ‘विस्तृत छलफल १६ गतेपछि गर्ने विषयमा कुराकानी भएको छ,’ खनालले भने।
दाहालले चितवनमा रहँदा माओवादी केन्द्रका नेता कार्यकर्तासँग समेत भेटघाट गरेका थिए। दाहालको उपस्थितिमा पार्टीको निर्वाचनसँग सम्बन्धित योजना निर्माणका विषयमा छलफल भएको थियो। छलफलमा पार्टीका केन्द्रीय सदस्य, जिल्ला र महानगरका पदाधिकारी सहभागी भएको पार्टीले जनाएको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
