काठमाडौं- नेत्रविक्रम चन्द ‘विप्लव’नेतृत्वको नेपाल कम्युनिस्ट पार्टी (नेकपा) असन्तुष्ट पक्षले स्थानीय तहको निर्वाचनमा पार्टीको तर्फबाट उम्मेदवारी दिएकाहरूलाई फिर्ता लिन निर्देशन दिएको छ।
स्थानीय तहको निर्वाचनको विपक्षमा रहेका सचिवालय सदस्य धर्मेन्द्र बास्तोला ‘कञ्चन’पक्षले विज्ञप्ति जारी गर्दै उम्मेदवारी फिर्ता लिन निर्देशन दिएको हो।
नेता वास्तोलाले एक विज्ञप्ति जारी गर्दै निर्देशन दिएका हुन्। ‘कतिपय कमरेडहरूले विभिन्न पदहरूमा मनोनयन दर्ता गरेका समाचार सार्वजनिक रुपमा प्रकाशित भएकाले पार्टीको नीति अनुशरण गर्ने कमरेडहरुलाई नीति विपरित देखिने उम्मेदवारीको मनोनयन फिर्ता लिनका लागि सचिवालय हार्दिक अनुरोध गर्दछ’ विज्ञप्तिमा भनिएको छ।
नेपाल कम्युनिस्ट पार्टीको आठौं केन्द्रीय समितिको १२ औं बैठकले पार्टी दर्ता नगर्ने र चुनावमा भाग नलिने निर्णय गरेको थियो।
‘देशभक्त, जनवादी, एमसीसीविरोधी उम्मेदवारलाई समर्थन गर्न सकिने, पार्टीका सदस्यहरू उठ्न चाहेको अवस्थामा स्वतन्त्र हैसियतमा उठने नीति पारित भए बमोजिम पार्टीले चुनाव उपयोग नगर्ने नीतिको तात्पर्य स्वाभाविक रूपले न्यूनतम् मूल्यमा केन्द्रीय समितिका सदस्य र जिल्लाका पदाधिकारी उम्मेदवारमा नउठ्ने मान्यताका विपरीत रहेको छ,’ विज्ञप्तिमा भनिएको छ। उक्त पार्टीले स्थानीय चुनावका लागि आफ्नो प्रभाव भएको क्षेत्रहरूमा उम्मेदवारी दिएको छ। पार्टी निर्वाचन आयोगमा दर्ता नभएका कारण उक्त पार्टीको तर्फबाट नेता–कार्यकर्ताले स्वतन्त्र हैसियतमा उम्मेदवारी दर्ता गराएका छन्।
रोल्पाका १० पालिकामध्ये ९ पालिकामा सबै पदाधिकारी, वडाध्यक्ष र सदस्यमा विप्लव समूहका नेताहरूले उम्मेदवारी दिएका छन्। लिवाङ नगरपालिकामा भने वडा नम्बर १० को वडाध्यक्षमा मात्रै उम्मेदवारी दिएका छन्। विप्लव नेतृत्वको नेकपा माओवादीका कार्यकर्ताले कतिपय ठाउँमा एक्लै उम्मेदवारी दिएका छन् भने कतिपय ठाउँमा अन्य पार्टीसँग मिलेर उम्मेदवारी दिएका छन्।
नेकपा भित्र महासचिव विप्लव, खड्गबहादुर विश्वकर्मा लगायतका नेताहरु चुनावको पक्षमा थिए भने वास्तोला लगायतका नेताहरु विपक्षमा थिए।
आयोगले दल दर्ता गरेर निर्वाचनमा भाग लिन पाउने दलको सूची सार्वजनिक गरिसकेपछि पनि नेता विश्वकर्मा निर्वाचन आयोग पुगेर दल दर्ता गर्न सकिने/नसकिने विषयमा छलफलसमेत गरेका थिए। उनले प्रधानमन्त्रीसहित अन्य राजनीतिक दलका नेताहरुसँग पनि यस विषयमा छलफल गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
