काठमाडौं– बैशाख ३० गते हुन गइरहेको स्थानीय तह निर्वाचनका लागि सोमबार पनि उम्मेदवारको मनोनयन दर्ता हुँदैछ। यसपटक निर्वाचन आयोगले दुई दिन आइतबार र सोमबार मनोनयन दर्ताको समय निर्धारण गरेको थियो।
पहिलो दिन केही स्वतन्त्र र साना राजनीतिक दलका तर्फबाट उम्मेदवारले मनोनयन दर्ता गरेका छन्। आइतबार प्रमुख राजनीतिक दलका तर्फबाट भने मनोनयन दर्ता नै भएन। उनीहरुले आज सोमबार मनोनयन दर्ताको तयारी गरेका छन्।
गठबन्धनमा रहेका दलहरुले केही जिल्लामा भागबन्डा गरेर सिट बाँडफाँड गरेका छन् भने केही स्थानमा मित्रवत प्रतिस्पर्धा गर्ने भएका छन्। प्रमुख प्रतिपक्षी दल नेकपा एमालेले सबै जसो क्षेत्रमा उम्मेदवारको टुंगो लगाएको छ। नेपाली कांग्रेसले महानगरपालिका र उपमहानगरपालिकामा आफ्नो भागमा परेका उम्मेदवारको टुंगो लगाइसकेको छैन।
आज दिउँसोसम्ममा उम्मेदवारको टुंगो लगाएर मनोनयन दर्ता गर्ने कांग्रेसको तयारी छ। नेकपा माओवादी केन्द्र, नेकपा एकीकृत समाजवादी र जनता समाजवादी पार्टी, राष्ट्रिय जनमोर्चा, राप्रपा लगायतका दलहरुले पनि उम्मेदवारको टुंगो लगाएका छन्। उनीहरुले पनि आजै मनोनयन दर्ताको तयारी गरेका छन्।
आयोगले बिहान १० बजेदेखि साँझ ५ बजेसम्म उम्मेदवारी मनोनयनका लागि समय छुट्ट्याएको छ। कानुनबमोजिम स्थानीय तह सदस्यको निर्वाचनमा उम्मेदवार बन्न योग्यता पुगेका कुनै पनि व्यक्तिले कुनै पनि समयमा सम्बन्धित निर्वाचन अधिकृतको कार्यालयमा उम्मेदवारको मनोनयन दर्ता गर्न सक्ने आयोगले जनाएको छ।
स्थानीय तहका अध्यक्ष, उपाध्यक्ष, प्रमुख र उपप्रमुख पदका लागि उम्मेदवारी दिने व्यक्तिले नेपाली नागरिकताको प्रमाणपत्रको प्रतिलिपि, धरौटी राखेको बैंक भौचर वा नगद रसिद, दलको उम्मेदवारको हकमा सो दलले प्रदान गरेको औपचारिक पत्र र सम्बन्धित स्थानीय तहको कुनै वडाको मतदाता नामावलीमा नाम समावेश भएको तथा वडाअध्यक्ष र वडा सदस्यले सम्बन्धित वडाको मतदाता नामावलीमा नाम समावेश भएको निस्सा तथा उम्मेदवारको स्वघोषणा पेस गर्नुपर्नेछ। दलित महिला वडा सदस्यले दलित समुदायको व्यक्ति भएको प्रमाणित हुने निस्सा पनि पेस गर्नुपर्ने आयोगले जनाएको छ।
स्थानीय तहको प्रमुख वा उपप्रमुखमा उम्मेदवार दिने व्यक्तिले धरौटीबापत रु एक हजार ५००, वडाध्यक्षले रु एक हजार र वडा सदस्यले रु ५०० धरौटी राख्नुपर्ने आयोगले जनाएको छ। महिला, दलित, विपन्न तथा अल्पसङ्ख्यक उम्मेदवारको हकमा धरौटी रकममा ५० प्रतिशत छुट हुनेछ।
सोमबार साँझ नै उम्मेदवारको अन्तिम नामावली प्रकाशन गरिनेछ। वैशाख १३ गते उम्मेदवारको विरोधमा उजुरी दिने, वैशाख १४ र १५ गते मनोनयन पत्र जाँच गर्ने तथा उजुरीमाथि जाँचबुझ गरी निर्णय गर्ने, वैशाख १५ गते मनोनयन भएका उम्मेदवारको नामावली प्रकाशन गर्ने, वैशाख १६ गते उम्मेदवारले नाम फिर्ता लिने र उम्मेदवारको अन्तिम नामावली प्रकाशन गर्ने तथा वैशाख १७ गते उम्मेदवारलाई निर्वाचन चिह्न प्रदान गर्ने कार्यतालिका छ। मनोनयनसँग सम्बन्धित सम्पूर्ण कार्य सम्बन्धित निर्वाचन अधिकृतको कार्यालयबाट हुने आयोगले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
