काठमाडौं- राजनीतिमा पटक-पटक मौका निकै कमले पाउने गर्छन्। केशव स्थापित त्यस्तो नाम बनेको छ, जो आफ्नै 'मति'ले विस्थापित हुन्छन् 'परिस्थिति'ले पुनर्स्थापित गरिरहन्छ। २०७६ कात्तिकमा मुख्यमन्त्री डोरमणि पौडेलसँग विवाद गरेर बागमतीको भौतिक पूर्वाधार मन्त्रीबाट राजीनामा दिएपछि स्थापित राजनीतिमा सदाका लागि विस्थापित हुने आम अनुमान तीन वर्षमै चिर्न सफल भएका छन्।
स्थापित २० वर्षपछि फेरि महानगरको राजनीतिमा फर्केका छन्। स्थापितको राजनीतिक प्रतिस्पर्धा २०४९ को स्थानीय चुनावमा उपमेयरको उम्मेदवारीबाट सुरु भएको हो। एमालेबाट उपमेयर उठेका उनी कांग्रेसका नवीन्द्रराज जोशीसँग पराजित भए।
नेकपा एमालेका अध्यक्ष केपी शर्मा ओली अध्यक्ष भएको राष्ट्रिय युवा संघका महासचिव बनेका उनी त्यसपछि अध्यक्ष भए। २०५१ सालको नेकपा एमालेको सरकारमा राष्ट्रिय खेलकुद परिषद्को सदस्यसचिव बन्ने अवसर पाए। २०५४ सालको स्थानीय चुनावमा काठमाडौं महानगरपालिकाको मेयर जिते।
महानगरपालिकाको मेयर जितेपछि उनले आमजनका आँखामा पर्ने केही राम्रा काम गरे। सडक अतिक्रमण गरेर बनाइएका बजार भत्काए। आकाशे पुलहरु थपे। सडकहरु विस्तार गरे। तर, त्यसको केही समयमै पार्टी विभाजन भयो। उनी बामदेव गौतमले नेतृत्व गरेको मालेमा पुगे।
मालेमा पुगेपछि उनले नेकपा एमालेमै रहेका उपमेयर बिदुर मैनालीलाई लेखनाथ नगरपालिकामा काज सरुवा गरिदिए। आफू विदेश गएका बेला कार्यवाहक मेयर नपाउन् भने उनले यस्तो 'उद्दण्ड' गरेका थिए। यो घटना स्थापितको मनमौजी शैलीको पुनरावृत्ति थियो।
स्थापित कहिल्यै लयमा बग्न खोजेनन्। उतारचढाव रोजिरहे। तत्कालीन अवस्थालाई लिएर सनकमा निर्णय लिइहाल्ने उनको राजनीतिक लय २०५९ सालमा फेरि भत्कियो। तत्कालीन राजा ज्ञानेन्द्रसँग हिमचिम गरेर २०६० सालमा उनी काठमाडौं महानगरपालिकाको मेयर 'स्थापित' भए। त्यहीँबाट उनको राजनीतिक विस्थापन सुरु भयो।
राजालाई रिझाएर मेयर बनेका उनी त्यहाँ पनि इमान्दार देखिएनन्। उनलाई मेयरबाट हटाइयो। उनी प्रजा परिषद् पुनगर्ठित गर्दै फेरि राजनीतिमा आउने कोशिसमा लागे। त्यो सफल भएन।
त्यसपछिका १० वर्ष उनी झण्डै-झण्डै निष्क्रिय बने। यही बीचमा बाबुराम भट्टराई प्रधानमन्त्री हुँदा उनलाई काठमाडौं उपत्यका विकास प्राधिकरणको प्रमुख बनाइयो। त्यहाँ पनि उनको स्वभावले लामो समय टिकाएन। माओवादीसँग निकट पुगिसकेका उनले एमालेमै फर्किएको घोषणा गरे र २०७० को निर्वाचनमा काठमाडौं ६ मा टिकटको दाबी गरे। एमालेले नपत्याएपछि उनी समाजवादी फोरमबाट उम्मेदवार बने।
राजनीतिबाट विस्थापनको बाटोतर्फ लागेका उनी २०७० पछि फेरि एमालेमा फर्किएर संगठन निर्माणमा सक्रिय भए। २०७४ को स्थानीय निर्वाचनसम्म आइपुग्दा उनी विद्यासुन्दर शाक्यसँगै मेयरका बलिया दाबेदार बनिसकेका थिए।
एमाले अध्यक्ष केपी शर्मा ओलीसँग राष्ट्रिय युवा संघमा एकसाथ काम गरेको नाताबाट अति निकट बनिसकेका थिए। तर, त्यो समय काठमाडौं महानगर कमिटी, काठमाडौं जिल्ला कमिटी र एमाले केन्द्रीय कमिटीमै उनको विरोध भयो। शाक्यले मेयरको टिकट पाए।
शाक्यलाई जिताउन उनले आफ्नो ठाउँमा मरिमेटे। त्यसको पुरस्कार उनले २०७४ मंसिरमा भएको प्रदेश सभाको निर्वाचनमा पाए। प्रदेश सभा सदस्य मात्रै होइन, मन्त्री समेत बने।
मन्त्रीबाट पनि 'स्थापित शैली'ले नै विस्थापित भए। एकातिर मुख्यमन्त्री पौडेलसँगको विवादले उनलाई संकटमा पारिरहेकै थियो। त्यहीबेला काठमाडौं महानगरको मेयर हुँदा त्यहाँ कार्यरत कर्मचारीले आफूमाथि स्थापितले यौन दुर्व्यवहार गरेको आरोप लगाइन्। त्यसपछि उनी मन्त्रीमा टिकिरहन सकेनन् र बिदा भए।
नेकपा एमाले यतिबेला काठमाडौंमा दोहोरो संकट झेलिरहेको छ। एकातिर सत्ता गठबन्धनले दिएको चुनौती, अर्कातिर विद्यासुन्दर शाक्यमाथि सार्वजनिक रुपमा उठिरहेका प्रश्नले एमालेलाई काठमाडौं जोगाउन सामान्य विकल्पले पुग्ने भएन।
फेरि अध्यक्ष केपी शर्मा ओलीका आँखामा आइपुगे उही ४० वर्ष पहिलेका सहकर्मी स्थापित। काठमाडौंको नेवार समुदायमा राम्रो पकड भएका र चुनावका लागि फन्डा गर्न सक्ने स्थापित यसपल्ट सफल भए भने राजनीतिमा पुनर्स्थापित हुनेछन्, असफल भएमा विस्थापित।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
