काठमाडौं– स्थानीय तह निर्वाचनका लागि महानगरपालिका र उपमहानगरपालिकामा नेपाली कांग्रेसका उम्मेदवार छान्ने जिम्मा पार्टी सभापति शेरबहादुर देउवाले पाएका छन्।
आइतबार पार्टी कार्यालय सानेपामा बसेको केन्द्रीय कार्यसम्पादन समितिको बैठकले संसदिय बोर्ड गठन गरेर अनुमोदन गरेपछि उम्मेदवारको टुंगो लगाउने जिम्मा सभापति एवम् प्रधानमन्त्री देउवालाई सुम्पेको हो।
उपसभापति पूर्णबहादुर खड्काले भोलि (सोमबार)सम्म मनोनयन गर्नुपर्ने भएकाले पार्टी सभापतिलाई नाम तय गर्ने जिम्मा दिइएको बताए।
बैठकले महानगरपालिकाको टिकट वितरणका लागि १४ सदस्यीय संसदीय समिति गठन गरेको थियो। तर, देउवालाई नै टिकट वितरणको अधिकार प्रत्यायोजन गरिएपछि शेखर कोइराला पक्षले विरोध गरेको छ।
नेता अर्जुननरसिंह केसीले वैठकमा आफूहरुले असहमति राखेको बताए। महानगरको संसदीय बोर्ड र उपमहानगरपालिकाको टिकट प्रदेश संसदीय बोर्डले वितरण गर्ने वैधानिक व्यवस्था भएकामा त्यो अधिकार पनि देउवामा प्रत्यायोजित गरिएकोमा आफूहरुको विरोध रहेको केसीले बताए।
उपसभापति खड्काले भने अब देउवाले पार्टीका तर्फबाट लड्ने मेयर तथा उपमेयरको उम्मेदवार नेताहरूसँगको परामर्शको आधारमा टुंगो लगाउने बताए।
सत्ता गठबन्धनमा भएको सहमतिअनुसार कांग्रेसले काठमाडौं, ललितपुर र विराटनगर महानगरपालिकामा मेयर पदमा भाग पाएको छ। वीरगन्ज, भरतपुर र पोखरामा उपमेयर पदमा उम्मेदवार पाएको छ।
यस्तै, उपमहानगरतर्फ धरान, इटहरी, कलैया, बुटवल, तुल्सीपुर, नेपालगन्ज र धनगढीमा मेयर उम्मेदवार उठाउने छ। यसैगरी जितपुर सिमरा, घोराही र हेटौँडामा उपमेयर भाग पाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
