काठमाडौं– नेपाली कांग्रेसका नेता अर्जुननरसिंह केसीले सभापति शेरबहादुर देउवाले विधि मिचेर टिकट वितरण गर्न खोजेको आरोप लगाएका छन्।
यही वैशाख ३० गतेको निर्वाचनका लागि उम्मेदवार छनोट गर्न भनी कांग्रेस केन्द्रीय कार्यालय कार्यालय सानेमा बसेको बैठकमा विरोध जनाउँदै नेता केसीले आपत्ति जनाएका हुन्।
उनले पत्रकारसँग कुरा गर्दै टिकट वितरणदेखि गठबन्धन निर्माणसम्ममा गलत ढंगले काम भएको भन्दै आफूले आपत्ति प्रकट गरेर बैठकबाट हिँडेको बताए।
महानगर र उपमहानगरमा उम्मेदवार टुंग्याउने भन्दै सानेपामा बसेको शीर्ष नेताको बैठकमा उनले आपत्ति जनाउँदै बाहिरिएका हुन्। उनले यसअघि केन्द्रीय कार्यसमितिको निर्णय विपरीत पार्टी सभापतिले हस्तक्षेप गरेको आरोप लगाए।
‘गठबन्धनको विरोधमा आफू नभएको, तर के आधारमा दिने भन्ने निर्धारण हुनुपर्ने थियो त्यो भएन’, उनले भने, ‘पार्टीले तल्ला कमिटीहरुलाई निर्देशन दिन सक्छ। तर, पाँचवटा दलको गठबन्धनले निर्देशन दिन सक्दैन। यो सुपर पार्टी हैन।’
टिकट वितरणका विषयमा संसदीय समितिले छलफल गर्नुपर्ने र केन्द्रीय कार्यसम्पादन समितिमा आउनुपर्नेमा त्यो पनि नभएर एकैपटक शीर्ष नेताको बैठक बसेर हतार हतारमा निर्णय गर्न खोजेकाले त्यसमा आफ्नो आपत्ति रहेको उनले बताए।
‘खाली आफ्नो आफ्नो मान्छेलाई भागबन्डामा पार्नेगरि विभाजन गर्न थालियो। यसमा मेरो आपत्ति रहेको छ’, उनले भने, ‘जुन रुपमा अन्तिम समयमा नाम तय गर्ने प्रयास भयो। यसमा मेरो विरोध हो।’
उनले पार्टी सभापति देउवाले आफ्ना मानिसहरुलाई टिकट दिन अन्तिम दिनसम्म ल्याएको र अहिले हतार हतार निर्णय गर्न लागेको आरोप लगाए। भोलिसम्म मनोनयन दर्ता गर्नुपर्ने समय पारेर निर्णय गर्नु गलत हुने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771907752.png)
-1764146706.png)
