काठमाडौं– नेकपा एमालेले कैलालीको धनगढी उपमहानगरपालिकासहितका अन्य स्थानीय तहमा उम्मेदवारको टुंगो लगाएको छ।
धनगढी उपमहानगरपालिकाको मेयर र उपमेयरको टुंगो शनिबार बसेको पार्टीको केन्द्रीय सचिवालयको बैठकले नै लगाएको थियो भने अन्य स्थानीय तहको टुंगो प्रदेश कमिटीले लगाएको हो।
धनगढी उपमहानगरपालिकाको मेयरमा रणबहादुर रावल र उपमेयरमा कन्दकला रानालाई उम्मेदवार बनाउने निर्णय भएको छ। त्यस्तै, अन्य १२ स्थानीय तहमा पनि उम्मेदवारको टुंगो लगाइएको छ। धनगढीपछिको ठूलो नगरपालिका रहेको टीकापुरमा मेयरमा श्याम खत्री र उपमेयरमा अनुपा केसी उम्मेदवार बन्ने भएका छन्।
लम्की चुहा नगरपालिकामा महादेव बजगाईँ मेयरमा र उपमेयरमा जुना चौधरी उम्मेदवार बन्ने भएका छन्। घोडाघोडीमा ममता प्रसाद चौधरी मेयर र उपमेयरमा करुणा बम उम्मेदवार बन्ने भएका छन्। गौरीगङ्गामा पदम सिंगाल मेयर र शान्ति सिंह उपमेयरको उम्मेदवार बन्ने भएका छन्।
त्यस्तै, गोदावरी नगरपालिकामा गोकर्ण भट्ट मेयर र शारदा रोकाया उपमेयरको उम्मेदवार बन्ने भएका छन्। चुरे गाउँपालिकामा चक्रबहादुर बोगटी अध्यक्ष र दीपा साउद उपाध्यक्षको उम्मेदवार बन्ने भएका छन्।
मोहन्याल गाउँपालिका धर्म थापा अध्यक्ष र सरस्वती बिष्ट रावल उपाध्यक्षको उम्मेदवार बन्ने भएकी छन्। जानकी गाउँपालिकामा टेक बहादुर बम अध्यक्ष र गीता चौधरी उपाध्यक्षको उम्मेदवार बन्ने भएका छन्।
त्यस्तै, भजनी नगरपालिकामा हर्क बुढा मेयर र तुलसी चौधरी उपमेयरको उम्मेदवार बनाउने निर्णय भएको छ। जोशीपुर गाउँपालिकामा केशरबहादुर डगौरा अध्यक्ष र रमा देशी भुल उपाध्यक्षको उम्मेदवार बनाउने निर्णय भएको छ।
कैलारी गाउँपालिकामा झुमा चौधरी अध्यक्ष र जालुराम चौधरी उपाध्यक्षको उम्मेदवार बन्ने भएका छन् भने बर्दगोरी गाउँपालिकामा कर्ण कुँवर अध्यक्ष र इन्दु चौधरी उपाध्यक्षको उम्मेदवार बनाउने निर्णय भएको नेकपा एमाले सुदूरपश्चिम प्रदेश कमिटीले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771907752.png)
-1764146706.png)
