प्रतिकात्मक तस्बिर
काठमाडौं– स्थानीय तह निर्वाचनका लागि महानगर र उपमहानगरपालिका प्रमुख तथा उपप्रमुख पदका उम्मेदवार टुंग्याउन नेपाली कांग्रेसका शीर्ष नेताहरु छलफलमा जुटेका छन्।
प्रधानमन्त्रीको सरकारी निवास बालुवाटारमा शीर्ष नेताहरुको बैठक जारी रहेको कांग्रेसका एक केन्द्रीय सदस्यले जानकारी दिए।
बैठकमा प्रधानमन्त्री एवम् पार्टी सभापति शेरबहादुर देउवासहित शीर्ष नेताहरु सहभागी छन्।
नेपाली कांग्रेसले महानगर र उपमहानगरपालिकाका उम्मेदवारहरु टुंग्याउन शनिबार केन्द्रीय कार्यसम्पादन समितिको बैठक बोलाएको थियो। नेताहरुबीच पहिल्यै 'सहमति' जुटाएर कार्यसम्पादन समितिबाट निर्णय गराउने तयारी छ।
शीर्ष नेताहरुबीच सहमति जुट्न नसक्दा शनिबार बिहान ११ बजे बोलाइएको केन्द्रीय कार्यसम्पादन समितिको बैठक सर्दै आएको छ। बिहान ११ बजे बस्ने भनिएको बैठक दिउँसो २ बजे सरेको थियो। २ बजे पनि बस्न नसकेपछि दिउँसो ३ बजे सारिएको थियो।
अब भने शीर्ष नेताहरुबीच सहमति जुटेपछि मात्रै पार्टी मुख्यालय सानेपामा केन्द्रीय कार्यसम्पादन समितिको बैठक बस्ने जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
