काठमाडौं- आगामी स्थानीय तह निर्वाचनमा जनकपुर उपमहानगरपालिकाको मेयर जनता समाजवादी पार्टी (जसपा)लाई दिएको बिरोधमा शुक्रबार नेपाली कांग्रेसका नगर सभापति मनोजकुमार साहले पदबाट राजीनामा दिएका छन्।
उनले शुक्रबारकै मितिबाट आफू स्वतन्त्र भएको र स्वतन्त्र रुपमा निर्वाचन लड्ने बताएका छन्। ‘जसपाको उम्मेदवार नराम्रो मानिस आउने भएकाले हामीले सहयोग गर्दैनौं’, उनले भने, ‘यो नेपाली कांग्रेसको उर्वर क्षेत्र हो। तर, नेपाली कांग्रेसलाई पाखा लगाउने काम केन्द्रबाट भएको छ।’
उनले नगर सभापति र पार्टी सदस्यबाट अहिलेलाई राजीनामा दिएको पत्रकार सम्मेलनमार्फत् घोषणा गरे। वैशाख ११ र १२ गतेसम्म पनि पार्टीले निर्णय सच्याएन भने आफू स्वतन्त्र उम्मेदवार उठ्ने उनले साहले घोषणा गरे।
‘आजबाट मैले नगर सभापति र साधारण सदस्यबाट राजीनामा दिएका छु’, उनले भने ‘हामीले अहिले केही समयका लागि राजीनामा दिएका छौं। तर, पार्टीले निर्णय नसच्चाएर हामी अलग नै हुन्छौं।’ २०७२ को स्थानीय निर्वाचनमा जनकपुर उपमहानगरमा साहले दोस्रो धेरै मत ल्याएका थिए। उनीसँगै नगर सचिव लालबाबु मिश्र, कोषाध्यक्ष वीरेन्द्र यादव, वडा १५ का सभापतिले समेत राजीनामा घोषणा गरेका छन्।
भरतपुर महानगरपालिका यसपल्ट कुनै पनि हालतमा माओवादी केन्द्रलाई दिन नहुने माग राखिरहेका चितवनका कांग्रेस नेता कार्यकर्ताहरुको असन्तुष्टि मत्थर हुने सकेको छैन।
शुक्रबार असन्तुष्ट कांग्रेस नेता–कार्यकर्ताले चितवन जिल्ला सभापति राजेश्वर खनालको कार्यकक्षमा ताला लगाएका छन्। कांग्रेस केन्द्रीय सदस्य दिनेश कोइराला, पूर्वसांसद जगन्नाथ पौडेल, टेकप्रसाद गुरुङको नेतृत्वमा सभापति खनालको कार्यकक्षमा तालाबन्दी गरिएको हो। एक पक्षले स्वतन्त्र उम्मेदवारी दिनेसम्मको धम्की दिइरहेको छ।
नेकपा एकीकृत समाजवादीको भागमा परेको हेटौंडा उपमहानगरमा पनि नेपाली कांग्रेसका नेता-कार्यकर्ता असन्तुष्ट छन्। पार्टीभित्र विरोध व्यापक हुन थालेपछि नेपाली कांग्रेस मकवानपुर जिल्ला कार्यसमितिले पार्टी नेता र कार्यकर्ताको भावनालाई रायका रूपमा लेखेर प्रदेश समितिमा पठाएको छ। जिल्लामा नेता, कार्यकर्तालको विरोध थेग्न नसकेपछि उनीहरूको गुनासो प्रदेश समितिमा पठाइएको बताइएको छ।
दाङको घोराही उपमहानगरपालिकामा कांग्रेसका भुपबहादुर डाँगीले मेयरको तयारी गरेका थिए। र डाँगीलाई उम्मेदवार बनाउने सर्बसम्मत निर्णय समेत भइसकेको थियो। तर केन्द्रीय गठबन्धनले उक्त पालिका माओवादी केन्द्रको भागमा पार्यो। गत निर्वाचनमा तेस्रो स्थानमा रहेको माओवादी केन्द्र यसपल्ट थप कमजोर रहेको स्थानीय कांग्रेस नेता-कार्यकर्ताको आंकलन छ। आफ्नै भोटले मात्रै जिताउन मुश्किल हुने भन्दै उनीहरुले निर्णय सच्याउन पहल गरिरहेका छन्।
स्थानीय तहको गत निर्वाचनमा एमालेका मेयर नरुलाल चौधरीले २२ हजार ३० मत प्राप्त गरेका थिए भने उनका निकटतम प्रतिस्पर्धी कांग्रेसका डाँगीले १७ हजार ४८४ मत प्राप्त गरेका थिए। माओवादी केन्द्रका जीवन गौतमले जम्मा १२ हजार ८२ मत प्राप्त गरेका थिए। गौतमले केही दिनअघि मात्रै माओवादी केन्द्र परित्याग गरेका छन्।
माओवादीलाई सघाउनै पर्ने अवस्थाका लागि उपमहानगरका १९ वटा वडामध्ये १६ वटा वडा कांग्रेसले पाउनुपर्ने शर्त स्थानीय नेताहरुले तेर्स्याएका छन्।
वीरगञ्ज महानगरपालिका जसपालाई दिने निर्णय कांग्रेसका स्थानीय नेता कार्यकर्ताले अझै स्वीकारेका छैनन्। गएको निर्वाचनमा कांग्रेसका उम्मेदवार अजय द्विवेदीले दोस्रो धेरै मत ल्याएका थिए।
जसपाबाट जितेका मेयर अजय सरावगी एमालेमा प्रवेश गरिसकेका कारण यसपल्ट कांग्रेसको पल्लाभारी रहेको बताउँदै कांग्रेस महानगर समितिले गठबन्धनको निर्णय सच्याउन माग गरिरहेको छ।
पोखरा महानगरपालिका एकीकृत समाजवादीलाई दिने निर्णय कांग्रेसका स्थानीय नेता समितिहरुले औपचारिक रुपमा स्वीकार गरेका छन्। केन्द्रमा उम्मेदवार नाम पठाउँदा प्रदेश कार्यसमितिले उपमेयरको मात्रै पठाएको छ।
तर अझै स्थानीय नेता-कार्यकर्ताको आक्रोश भने मत्थर हुन सकेको छैन।
केन्द्रीय गठबन्धनको निर्णयपछि बुधबार पार्टी कार्यालयमा तालाबन्दी गरेका महानगर कार्य समितिका नेताहरुले अहिले अर्को शर्त तेर्स्याएका छन्- एकीकृत समावादीका मेयरले रुख चिह्नबाटै उम्मेदवार उठ्नुपर्छ। महानगरमा रहेको असन्तुष्टिका कारण अन्य पालिकाको भागबण्डामा समेत सकस परिरहेको छ।
स्थानीय तहको निर्वाचनमा गठबन्धन गर्ने निर्णयप्रति असन्तुष्टि जनाउँदै कैलालीमा कांग्रेस वडा सभापतिसहित ९१ जना क्रियाशील सदस्यले शुक्रबार सामूहिक राजीनामा दिएका छन्।
धनगढी उपमहानगरपालिका १८ का वडा सभापति भक्तबहादुर थापासहितका क्रियाशील सदस्यहरुले नगरसभापति यज्ञराज उपाध्यायसमक्ष सामूहिक राजीनामा दिएका हुन्। सामूहिक राजीनामा दिनेको सूचीमा कांग्रेसका पूर्वजिल्ला सदस्य लक्ष्मीप्रसाद देवकोटा, पूर्वक्षेत्रीय उपसभापति कुम्भराज गिरी, पूर्ववडाध्यक्ष सालीभान खड्कासमेत रहेका छन्।
वडा १८ मा सत्तारुढ गठबन्धनका तर्फबाट नेकपा माओवादी केन्द्रले उमेदवार उठाउने भएको छ। २०७४ सालमा भएको स्थानीय निर्वाचनमा माओवादी केन्द्रले जितेका कारण अहिले पनि माओवादी केन्द्रले नै पाउनेछ।
यसैगरी बझाङको तलकोट र थलारा गाउँपालिका प्रमुख एकीकृत समाजवादीका भागमा परेपछि कांग्रेस गाउँ कार्यसमितिका नेताहरु असन्तुष्ट छन्।
गठबन्धनको निर्णय नसच्यिए अध्यक्ष पदमा उम्मेदवारी दिने चुनौती दिइरहेका छन्। गएको निर्वाचनमा झिनो अन्तर कांग्रेस पराजित भएको तलकोटमा यसपल्ट एमाले फुटेकाले जित्ने भन्दै स्थानीय नेताहरुले उम्मेदवारीको तयारी गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
