काठमाडौं– भक्तपुरको चाँगुनारायण नगरपालिकामा खहरे खोला मासेर प्लानिङको लागि सडक निर्माणको काम गरिएपछि स्थानीयहरु विरोधमा उत्रिएका छन्। जग्गा कारोबारी र जनप्रतिनिधिको मिलेमतोमा नगरपालिकाको समेत बजेट प्रयोग गरेर खोलो मिचेर बाटो बनाउन थालिएपछि स्थानीयहरु विरोधमा उत्रिएका हुन्।
चाँगुनारायण नगरपालिकाको वडा नम्बर ५ मा पर्ने भने खोलो मासेर सडक निर्माण गर्न थालिएको हो। खोलो पुरेर बनाउन लागिएको सडकको लागि ५ नम्बर वडा कार्यालयबाट ३० रुपैयाँ बजेट विनियोजन गरिएको छ।
जग्गा कारोबारीको प्लानिङलाई मात्र फाइदा पुग्ने सडक निर्माण गरिँदै छ। सडक निर्माणका लागि भने खोलो नै खनेर ढल निकासका लागि ह्यम पाइप हाल्न लागिएको छ। खोलो नै मासेर सडक तथा ढल निर्माण गर्दा बस्ती डुवानमा पर्ने स्थानीयको चिन्ता छ।
काठमाडौं उपत्यकामा प्लानिङ परमिट स्वीकृत गरेर मात्रै हाउजिङ, अपार्टमेन्ट र घडेरीहरु विकास गर्नुपर्ने हुन्छ। काठमाडौं उपत्यका विकास प्राधिकरणले प्लानिङ परमिट स्वीकृत गराउन पटक–पटक ताकेदा पनि गर्दै आएको छ। तर, चाँगुनारायण–५ मा भने स्वीकृती नै प्राप्त नगरेको प्लानिङका लागि खोलो पुरेर सडक निर्माण गर्न थालिएको छ।
चाँगुनारायण नगरपालिकामा वडा नम्बर ५ का सचिव राकेश बासुकलाले वडा कार्यालयको २०७८ जेठ २८ गते बसेको बैठकले बस्ती विकासको लागि भन्दै ३० लाख रुपैयाँ बजेट छुट्याएको जानकारी दिए। वडा कार्यालयको २८ जेठ २०७८ को बैठको निर्णयानुसार विनियोजित बजेट खोला पुरेर बनाउन लागिएको सडकमा समेत प्रयोग गरिएको छ।
स्थानीयले भने खोला पुरेर निर्माण गर्न लागिएको सडकमा सरकारी बजेट दुरुपयोग गरेर जनप्रतिनिधले 'भ्रष्टाचार' गरेको आरोप लगाएका छन्। उक्त खोलाको पानीबाट स्थानीयले सिँचाइमा समेत प्रयोग गर्दै आएका छन्। .
चाँगुनारायण–५ की स्थानीय कृष्णमाया चाँकतू खोला पुरेर सडक निर्माण गरिँदा आफूहरुको बस्ती नै डुवानमा पर्ने बताउँछिन्। वर्षौंदेखि सिँचाइका लागि प्रयोग गर्दै आएको खोलो पुरिँदा आफूहरुको जीविकामा समेत असर पर्ने उनको भनाइ छ।
खोला सीमाको दक्षिण र पूर्व भागमा करिव ४० घरपरिवारको चाँकतू बस्ती छ। सडक निर्माण हुँदा वस्तीलाई कुनै फाइदा भने हुनेछैन। जग्गा व्यवसायीले आफ्नो प्लानिङका लागि मात्रै उपयोग हुने गरी सडक बनाउन लागेका हुन्।
पछिल्लो समय भक्तपुरमा अवैध रुपमा प्लानिङ गर्ने कार्य धमाधम भइरहेको छ । प्लानिङका लागि सिधै अनुमति दिन नमिल्ने भएपछि घडेरी खार्ने बहानामा जग्गा व्यापारीहरुले जनप्रतिनिधि र कर्मचारीसँग सेटिङ गरी काम गर्ने गरेका र पूर्वधार विकासको नाममा कागजमा उपभोक्ता समिति गठन गरी सार्वजनिक सम्पतीमा कब्जा जमाउँदै आएको स्थानीयहरुको आरोप छ । चाँगुनारायण नगरपालीका वडा नं ५ कैै ढिकुरे पाटीमा पनि करिव १४ आना सरकारी जग्गामा प्लानिङको सडक निर्माण भएको समेत स्थानीयहरुको आरोप छ । भक्तपुर जिल्ला आयुक्तको कार्यालयले भक्तपुरका चारवटा नगरपालिकाका ९२ स्थानमा अवैध प्लानिङ भइरहेको भन्दै गत माघ ६ गते सूचि सार्वजनिक गरेको थियो । जसमध्ये चाँगुनारायण नगरपालिकामा मात्रै ८० स्थानमा अवैध प्लटिङ रहेको छ ।
'प्लानिङका लागि मात्रै प्रयोग गर्न मिल्नेगरी खोलो पुरेर सडक बनाउन लागिएको छ। अहिले दैनिक २ वटा डोजर र मजदुरहरु प्रयोग गरेर खोलो पुर्ने र सम्याउने काम भइरहेको छ। सडक बनाउने चर्चा चलेदेखि नै हामीले विरोध गरेका हौं। तर, हाम्रो कुरा सुन्दै नसुनी सडक बनाउन थालिएको छ,' अर्का स्थानीय श्रीभक्त चाँकतू भन्छन्।
आफूहरुसँग छलफल नै नगरी, जग्गाको साँध सीमाना नछुट्याइ जबरजस्ती रुपमा व्यक्तिगत लाभका लागि खोला पुर्न सुरु गरिएको स्थानीयको भनाइ छ। सिँचाइका लागि समेत उपयोग हुँदै अएको उक्त खोला यसअघि १० फिटको रहेकोले सो क्षेत्रफलमा खोला कायम राख्न स्थानीयको माग छ।
वडा कार्यालयका सचिव राकेश बासुकला भने उपभोक्ता समिति नै गठन गरेर सडक निर्माणको काम भइरहेकाले ठेकेदारलाई फाइदा पुग्नेगरी मात्रै सडक निर्माण भइरहेको भन्न नमिल्ने बताउँछन्।
'भक्तपुर–चाँगु सडकको पिचबाट छुट्टिएर दीप सरस्वती स्कूल हुँदै चाँकतू टोल जाने बाटो स्तरोन्नतिका लागि हाल दुईवटा उपोभोक्ता समितिमार्फत् काम भइरहेको छ। नगरपालिकाका इन्जिनियरले तयार पारेको डिजाइनका आधारमा खोलामा ह्युम पाइप राखेर ढल निकास खोल्ने काम हुन लागेको हो,' वडा सचिव बासुकलाले भने। –न्युज एजेन्सी नेपाल
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
