काठमाडौं- नेपाली कांग्रेसका महामन्त्री गगन थापाले पछिल्ला दिनहरुमा निरन्तर उठाइरहेका छन्- ३६ लाखभन्दा धेरै नयाँ मतदाता थपिएका छन्। पहिलोपल्ट मतदान गर्दा अर्कै चिह्नमा छाप हान्न प्रोत्साहित गर्यौं भने हामी सधैं डरमा रहनुपर्छ।
केही समयअघि बसेको नेपाली कांग्रेसको केन्द्रीय कार्यसमिति बैठकमा उनले गठबन्धन गर्दाको जोखिम औंल्याउँदै यसलाई उठाएका थिए। बुधबार प्रधानमन्त्रीनिवास बालुवाटारमा गठबन्धनबीच सहमति हुँदै गर्दा पनि उनले दोहोर्याए, 'नेपाली कांग्रेस पार्टीसँग ३०/३२ लाख मतदाता छन्। हामीहरु यतिमै चित्त बुझाउने हो, मतदाता बढाउने हिम्मत नगर्ने हो भने कुनै न कुनै रुपमा कम्युनिस्ट पार्टीको डरमा बाँच्नुपर्ने हुन्छ।'
२०७४ सालको निर्वाचनमा नेपाली कांग्रेसले ३१ लाख २८ हजार ३८९ मत हासिल गरेको थियो।
यस दृष्टिले हेर्दा यसपल्ट मतदाता नामावलीमा थपिएका ३६ लाख ५९ हजार २ सय ९९ मतदाता २०७४ सालको ठूलो पार्टी एमालेभन्दा पनि ठूलो शक्ति हो। एमालेले ३१ लाख ७३ हजार ४ सय ९४ मत पाएको थियो।
अरुलाई छाडेको नगरमै बढी मतदाता नयाँ
कांग्रेस महामन्त्री थापाको कोणबाट विश्लेषण गर्दा नेपाली कांग्रेसले नयाँ मतदातालाई पहिलो चिह्न अर्थात् मेयरमा रुखमा भोट हाल्न प्रेरित गर्ने ठूलो अवसर गुमाएको छ। गठबन्धन गर्दा नेपाली कांग्रेसले छाडेका दुई महानगरमै यसपल्ट मतदाताको संख्या थपिएको छ।
पोखरा महानगरपालिकाको मेयर एकीकृत समाजवादीले पाएको छ। यसपल्ट सबैभन्दा धेरै मतदाता थपिएको यही महानगरमा हो। ३९ हजार ६४३ मतदाता जना थपिएकोमा नयाँ महिला मतदाता १९ हजार ९५५ र पुरुष १९ हजार ६८९ छन्।
पोखरापछि चितवनको भरतपुर महानगरपालिकामा मतदाता बढेका छन्। उक्त महानगरपालिका पनि कांग्रेसको भागमा छैन। नेकपा माओवादी केन्द्रले पाएको भरतपुरमा ३५ हजार ४७८ मतदाता नयाँ छन्।
२०७४ सालमा महिला ७९ हजार ९२ र पुरुष ७१ हजार १८१ गरी कूल एक लाख ५० हजार २७४ मतदाता थिए। २०७९ सालसम्म आइपुग्दा यो संख्या बढेर एक लाख ८५ हजार ७५२ पुगेको छ।
निर्वाचन आयोगले दिएको विवरण अनुसार वैशाख ३० गते हुने निर्वाचनमा भरतपुर महानगरपालिकामा ९६ हजार ८६७ महिला र ८८ हजार ८८४ पुरुषले भोट हाल्न पाउँछन्। यो तथ्यांकले भरतपुर महानगरपालिकामा पाँच वर्षको अवधिमा मतदाता बढेको देखाउँछ।
जनता समाजवादी पार्टीको भागमा परेको वीरगञ्जमा पाँच वर्षको अवधिमा १६ हजार १४६ जना मतदाता थपिएका छन्। वीरगञ्जमा २०७४ सालमा महिला ४६ हजार ८३२ र पुरुष ६१ हजार ६६६ गरी जम्मा एक लाख आठ हजार ५०१ मतदाता थिए। अहिले बढेर महिला ५३ हजार ८३३ र पुरुष ७० हजार ८१० गरी कूल एक लाख २४ हजार ६४७ पुगेका छन्।
यी तीनै महानगर गरी ९१ हजार दुई सय ७६ जना मतदाता पहिलो चिह्न रुखमा मतदान गर्न नपाउने भएका हुन्।
कांग्रेसले मेयर पाएको काठमाडौं, विराटनगर र ललितपुर महानगरमा क्रमश: २० हजार ९३३, १९ हजार ३८१ र ९ हजार ९ सय ६८ मतदाता बढेका छन्।
उपमहानगरमा पनि उस्तै
दाङको घोराही उपमहानगरपालिकामा ३४ हजार पाँच सय मतदाता बढेका छन्। जहाँको मेयर भागबन्डामा माओवादी केन्द्रको भागमा परेको छ।
लुम्बिनी प्रदेशमा रहेको घोराहीमा २०७४ मा ३७ हजार ७८७ पुरुष र ४० हजार ६४० महिला गरी कूल ७८ हजार ४२७ मतदाता थिए। अहिले बढेर पुरुष ५४ हजार २२१ र महिला ५८ हजार ७०६ गरी जम्मा एक लाख १२ हजार ९२७ पुगेका छन्।
बागमती प्रदेशको हेटौंडा उपमहानगरपालिका २० हजार ८३४ मतदाता बढेका छन्। जुन एकीकृत समाजवादीले पाएको छ। माओवादीले नै पाएको जितपुर–सिमरा उपमहानगरपालिकामा १३ हजार ४०४ मतदाता नयाँ छन्।
जनता समाजवादी पार्टी पाएको धनुषाको जनकपुरधाम उपमहानगरपालिकामा ११ हजार १७५ जना मतदाता बढेका छन्।
कांग्रेसले पाएको लुम्बिनी प्रदेशको तुलसीपुर उपमहानगरपालिकामा ३० हजार ७८४ मतदाता, रुपन्देही जिल्लाको बुटवल उपमहानगरपालिकामा २३ हजार ४०२, बाँकेको नेपालगञ्जमा १९ हजार ३९७, सुनसरीको इटहरी उपमहानगरपालिकामा २६ हजार ९२९, धरान उपमहानगरपालिकामा २१ हजार ३४, धनगढीमा १६ हजार ७२१ र बारा कलैया उपमहानगरपालिका १३ हजार ८६६ जना नयाँ मतदाता छन्।
गगनको डरमै प्रहार
माथिको तथ्यांक केलाउँदा महामन्त्री थापाको डरमै प्रहार भएको छ। थापा भन्छन्, '३० औं लाख नयाँ मतदाता आएका छन्। उनीहरुलाई हाम्रो पार्टीसँग जोड्नुपर्छ। अरु पार्टीबाट विरक्तिएका मतदाता थपेर हामीले हाम्रो पार्टीलाई ४० देखि ४५ प्रतिशत मतभार लिनुपर्छ। त्यसपछि कुनै पनि कम्युनिस्ट पार्टीसँग डराउनुपर्दैन।'
तर, चुनावी तालमेलका कारण कांग्रेसले नयाँ मतदातालाई आफ्नो पार्टीमा जोड्ने विशेष अभियान छेड्न असफल भएको छ। गठबन्धनलाई नै मत माग्नुपर्ने भएकाले रुख बाहेकका चिह्नमा समेत भोट माग्नुपर्ने भएको छ।
थपिएका ३६ लाखमा आफ्नो हिस्साका नयाँ मतदाता एमालेले आफूतिर आकर्षित गर्नेछ। बाँकी रहेका नयाँ मतदाता कांग्रेसले सँगै गठबन्धनमा सामेल दुई कम्युनिस्ट पार्टीहरुसँग भागबन्डा गर्नुपर्नेछ।
तीन कम्युनिस्ट पार्टी बलिया रहिरहँदासम्म थापाले भनेजस्तै कांग्रेसले लिने नीति हो- कम्युनिस्ट पार्टी नमिलुन्। उनी भन्छन्, 'हामी सधैं डराउने भयौं। अहिले सँगसँगै लिएनौं भने अर्को पार्टीसँग मिल्छ कि भनेर डराउने भयौं। फेरि चुनाव जितेपछि ती पार्टीले समर्थन दिने हो कि होइन? भनेर डराउने भयौं। हामीसँग अहिले भएका मतले पुग्दैन, थप्नुपर्छ भन्ने कोणबाट सोच्यौं भने बल्ल हामी ठीक ठाउँमा उभिएका हुनेछौं। तर, अहिलेका लागि उनीहरु नमिलुन् भन्ने सोच्ने कुरा पनि अन्यथा होइन।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
