काठमाडौं– सिन्धुपाल्चोकको चौतारा साँगाचोकगढी नगरपालिकाका प्रमुख अमानसिं तामाङले पदबाट राजीनामा दिएका छन्।
मेयर तामाङले उपमेयर जानुका पराजुलीलाई बिहीबार राजीनामा बुझाएका हुन्। उनी अघिल्लो निर्वाचनमा नेकपा माओवादी केन्द्रबाट निर्वाचित भएका थिए। यसपटक पनि उनीसहितका नेताहरूको नाम सिफारिस भएको छ। सोही नगरपालिकाको मेयरका लागि सभामुख अग्नि सापकोटाका भाइ कृष्णप्रसाद सापकोटाको नाम पनि सिफारिस भएको छ।
तामाङले मेयरका लागि नाम सिफारिस भएको र निर्वाचन आयोगले राजीनामा दिनुपर्ने व्यवस्था आचारसंहितामा गरेकाले आफूले पदबाट राजीनामा दिएको बताए। तामाङले पदबाट राजीनामा दिँदै नगरपालिकाबाट सुविधाको रुपमा लिँदै आएको गाडी, आवास तथा मोबाइल फोन समेत फिर्ता गरेका छन्।
निर्वाचन आयोगले स्थानीय तहको निर्वाचनका लागि जारी गरेको आचार संहितामा जनप्रतिनिधिहरुले राजीनामा दिएपछि मात्रै उम्मेदवारी दिन पाउने व्यवस्था छ।
आचारसंहिताको उक्त प्रावधानविरुद्ध सिन्धुपाल्चोककै हेलम्बु गाउँपालिकाका अध्यक्ष निमा ग्याल्जेन शेर्पाले सर्वोच्च अदालतमा रिट दायर गरेका थिए। सर्वोच्चले प्रारम्भिक सुनुवाइ गर्दै आचारसंहितामा भएको उक्त व्यवस्था कार्यान्वयन नगर्न अन्तरिम आदेश जारी गरेको थियो।
सर्वोच्चको अन्तरिम आदेशविरुद्ध निर्वाचन आयोगले भ्याकेटको निवेदन दिएको थियो। सर्वोच्चले शेर्पा र आयोगको निवेदनलाई सँगै राखेर सुनुवाइ थालेकोमा न्यायाधीश तेजबहादुर केसी र तिलप्रसाद श्रेष्ठको संयुक्त इजलासले मंगलबार (वैशाख ६ गते) रिट निवेदन खारेज हुने फैसला सुनाएको थियो।
सर्वोच्चले रिट खारेज हुने फैसला गरेसँगै आचारसंहितामा भएको व्यवस्था स्वत: कार्यान्वयनमा आएको हो।
नेकपा माओवादी केन्द्र, चौतारा साँगाचोकगढी नगर समितिले तामाङसहित हालकी उपप्रमुख जानुका पराजुली, केन्द्रीय सदस्य कृष्ण सापकोटा, जिल्ला अध्यक्ष गोविन्द पराजुली र प्रदेश सदस्य श्यामसुन्दर श्रेष्ठको नाम पनि सिफारिस गरेको थियो।
तामाङले आफ्नो दाबेदारीमा लचक नहुँदा पार्टीमा उम्मेद्वारी टुंग्याउन सकस भएको छ। माओवादी केन्द्र यसपटक सापकोटालाई मेयर बनाउने तयारीमा रहेको थियो। मेयर पदकै अर्की दाबेदार उपप्रमुख पराजुलीले भने राजीनामा दिएकी छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
