काठमाडौं– प्रधानमन्त्री एवं नेपाली कांग्रेसका सभापति शेरबहादुर देउवाले आफ्नो पार्टीका शीर्ष नेताहरूको बैठक बोलाएका छन्।
स्थानीय तहको निर्वाचनमा सत्ता गठबन्धनबीच तालमेल गरेर जाने निर्णय भएसँगै पार्टीभित्र देखिएको असन्तुष्टिका विषयमा छलफल गर्न देउवाले शीर्ष नेताहरुसँग छलफल गर्न लागेका हुन्। प्रधानमन्त्रीको सरकारी निवास बालुवाटारमा दिउँसो ३ बजे बस्ने गरी बैठक बोलाइएको हो।
देउवानिकट स्रोतका अनुसार महानगर र उपमहानगरमा पार्टीका तर्फबाट उम्मेदवारहरुको चयन गर्न नेताहरुसँग छलफल गर्न लागिएको हो। बैठकमा देउवाले संस्थापनइतर पक्षका नेताहरुलाई पनि बोलाइएको छ।
कांग्रेस वरिष्ठ नेता रामचन्द्र पौडेल, नेताहरू डा. शेखर कोइराला, प्रकाशमान सिंह, शशांक कोइराला, विमलेन्द्र निधि, कृष्णप्रसाद सिटौलालगायत सहभागी हुने बताइएको छ।
त्यस्तै, पदाधिकारीहरुमा उपसभापतिद्वय पूर्णबहादुर खड्का र धनराज गुरूङ, महामन्त्रीद्वय गगन थापा र विश्वप्रकाश शर्मालाई पनि बैठकमा बोलाइएको छ।
सत्ता गठबन्धन दलबीच बुधबार महानगर र उपमहानगरमा भागबन्डाको टुंगो लागिसकेको छ। शीर्ष नेताहरुको बैठकबाट नेपाली कांग्रेसले पाएको क्षेत्रमा क–कसलाई उम्मेदवार बनाउने भन्ने विषयमा निर्णय हुने बताइएको छ।
देउवाले पार्टीभित्र शक्ति सन्तुलन मिलाएर टिकट वितरणको तयारी थालेका हुन्। नेपाली कांग्रेसको विधानअनुसार महानगरको मेयर र उपमेयर केन्द्र, उपमहानगरको मेयर र उपमेयर प्रदेश समितिले टुंगो लगाउने भन्ने व्यवस्था छ।
तर, प्रदेशमा सहमति हुन नसक्ने देखिएको भन्दै उपमहानगरको हकमा पनि केन्द्रले नै टुंगो लगाउन खोजेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770957149.png)
-1764146706.png)
-1770562345.jpg)
