काठमाडौं- नेपाली कांग्रेसले हेटौंडा उपमहानगरपालिका नेकपा एकीकृत समाजवादीलाई दिने गरि गठबन्धनमा सहमति भएकोप्रति आपत्ति जनाउँदै एकल रुपमा चुनावी प्रतिस्पर्धामा सहभागी हुने चेतावनी दिएको छ।
कांग्रेसको हेटौंडा उपमहानगरपालिका समितिले एक विज्ञप्ति जारी गर्दै पार्टीका कार्यकर्ता तथा शुभेच्छुकहरु समेतको मनोभावनामा ठेस पुग्ने गरी गठबन्धनले निर्णय गरेको आरोप लगाएको छ।
'गठबन्धन दलहरुबीच हेटौंडा उपमहानगरको प्रमुख, उपप्रमुख तथा वडा अध्यक्षहरुको भागबण्डाको विषयमा छलफल चलिरहँदा पार्टीको केन्द्रीय कार्यसमितिका पदाधिकारीज्यूहरुलाई हेटौंडा उपमहानगरपालिकाको बस्तुगत अवस्थाबारे यसअघि नगर समितिको तर्फबाट गएको प्रतिनिधिमण्डलले लिखित जानकारी गराउँदासमेत त्यसको मर्म र भावनालाई बेवास्ता गर्दै आम पार्टीका कार्यकर्ता तथा शुभेच्छुकहरु समेतको मनोभावनामा ठेस पुग्ने गरी उक्त सहमति भएको हाम्रो बुझाइ छ' हेटौंडा उपमहानगर समितिका सभापति उत्सव इटेनीले जारी गरेको विज्ञप्तिमा उल्लेख गरिएको छ।
नगरको गठबन्धनमा आबद्ध दलहरुमध्ये सबैभन्दा ठूलो पार्टी नेपाली कांग्रेसको नेतृत्वमा चुनावमा सहभागी हुन गठबन्धनका दलहरुसमेत तयारी रहेको अवस्थामा केन्द्रीयस्तरबाट भएको भागबण्डाले गठबन्धनको आवश्यकता र औचित्यसमेत पूरा गर्न नसक्ने विज्ञप्तिमा जनाइएको छ।
यस निर्णयलाई पुनरावलोकन गरी गठबन्धनको वास्तविक आवश्यकता र औचित्यसमेत पुष्टि गर्ने गरी कांग्रेसले मेयर पद पाउने गरी गठबन्धन दलहरुबीच सहमति, सहकार्य र एकताको साथ अघि बढ्ने वातावरण तयार गर्न उपमहानगर समितिले पार्टी नेतृत्वसमक्ष माग गरेको छ।
हेटौंडा एकीकृत समाजवादीलाई दिने निर्णयको पुनरावलोकन नभएमा वैशाख ६ गते बसेको नगर समितिका पदाधिकारी तथा नगरका सबै १९ वडाका सभापतिहरुको निर्णयअनुसार सत्तासाझेदार गठबन्धनका दलहरुसँग मित्रवत् प्रतिस्पर्धाको आधारमा नेपाली कांग्रेस एकल नेतृत्वमा चुनावी प्रतिस्पर्धामा सहभागी हुने विज्ञप्तिमा जनाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
