काठमाडौं- नेपाली कांग्रेसका सभापति एवं प्रधानमन्त्री शेरबहादुर देउवाले पार्टीका चितवन जिल्ला सभापति राजेश्वर खनाललाई निर्णय सच्याउन निर्देशन दिएका छन्।
मंगलबार बिहान चितवन जिल्ला सभापति खनाललाई बालुवाटारमा बोलाएर भरतपुर , विराटनगर र काठमाडौं मध्ये एक माओवादी केन्द्रलाई दिनु पर्ने भन्दै देउवाले चितवन कांग्रेसले गरेको निर्णय बदल्न निर्देशन दिएका हुन्।
चितवन सभापति खनालले आफूले महानगरपालिका र जिल्ला कार्यसमितिको निर्णय र चितवन कांग्रेसको धारणा स्पष्टसँग सभापति देउवासँग राखेको जानकारी दिए।
'उहाँले तपाईंहरूको निर्णय बदल्नुपर्यो। तालमेल गर्ने भनेपछि सबै आफैंले मात्रै लिने भन्ने हुँदैन, भन्नुभयो' खनालले भने, 'मैले जवाफमा कार्यकर्ताको भावनाविपरीत मैले निर्णय गर्न सक्दिनँ भनें। उहाँले भरतपुर माओवादीलाई दिनुपरे पार्टी र मलाइ सहयोग गर्नुहोस् भन्नुभयो।'
माथिल्लो निकायबाट निर्णय भए तल्लो निकायको निर्णय स्वत: खारेज हुने उनले देउवालाई बताएको जानकारी दिए।
केन्द्रीय समितिको निर्णय मान्नु आफ्नो दायित्व भए पनि जिल्लाको परिस्थिति प्रतिकुल रहेको उनले देउवालाई 'ब्रिफिङ' गरे।
'केन्द्रीय समितिको निर्णय मान्नु मेरो दायित्व हो, तर परिस्थिति जिल्ला सभापतिको रूपमा एक्लै मैले थाम्न सक्ने अवस्था छैन' देउवासँग उनले भने। देउवाले आज बेलुकासम्म गठबन्धनको बैठकबाट निर्णय आउने भन्दै त्यसलाई मान्न तयार रहन आग्रह गरे।
'उहाँले बेलुकासम्म निर्णय आउँछ,मान्न तयार हुनुहोला भन्नुभयो। मै हवस्, जय नेपाल भन्दै हिँडे' उनले भने।
चितवन कांग्रेसले यसअघि भरतपुरको मेयरमा गठबन्धन गर्न नसकिने निर्णय गरेको थियो। तर, नेकपा माओवादी केन्द्रले भरतपुर महानगरमा दाबी गरेपछि समस्या भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
