काठमाडौं- नेकपा एकीकृत समाजावादीका अध्यक्ष माधवकुमार नेपालले आफूहरु अपमान सहन नजन्मिएको बताएका छन्। जिल्ला-जिल्लाका तालमेलको सन्दर्भमा आफ्नो पार्टीलाई अपमानपूर्ण व्यवहार गरिएको भन्दै उनले यस्तो असन्तुष्टि जनाएका हुन्।
कतिपय ठाउँमा सहमति भइरहेको र कतिपय ठाउँमा गाह्रो भइरहेको उनको भनाइ छ। 'सबै पार्टीले आफ्नो पार्टीको अति मूल्यांकन गर्दै अर्को शक्तिको अवमूल्यन गर्दै अलि अपमानपूर्ण ढंगले व्यवहार पनि गर्दै चल्नुभएको छ भन्ने रिपोर्ट पनि आइरहेको छ', उनले भने।
मंगलबार स्थानीय तहको निर्वाचनको लागि पार्टी केन्द्रको तर्फबाट घोषणापत्र सार्वजनिक र नेकपा गौरवशाली पार्टीसँग एकता कार्यक्रममा सम्बोधन गर्दै उनले आफ्नो पार्टी अपमानको विरुद्धमा विद्रोह गरेर जन्मिएको बताए। 'हामीलाई आफ्नो शक्ति र सामर्थ्यमा विश्वास छ। र हामीले आफ्नो शक्तिको अति मूल्यांकन पनि गर्नु हुँदैन', उनले भने।
उनले पाँच दलबाहेक अरुसँग सहमति नगर्ने सहमति गरिसकेको बताए। 'सहमति हुन सकेन भने मित्रतापूर्ण प्रतिस्पर्धाको आधारमा जाने पनि टुंगो लगाएका छौँ। त्यस सन्दर्भमा हामी फेरि छलफल गर्छौं', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
