काठमाडौं– वैशाख ४ गते बुढानीलकण्ठ नगरपालिका वडा नम्बर २ को पार्टी कार्यालय उद्घाटन कार्यक्रममा गगन थापाले सहभागी नेता तथा कार्यकर्तालाई भने- 'मैले यहाँ वडा नम्बर १ को उम्मेदवार साथीहरु देखिरहेको छु। चुनावमा जम्मा २०/२२ दिन बाँकी रहेको बेलामा कांग्रेसले गरेको कार्यालय उद्घाटनमा आएर आफ्नो समय खेर नफाल्न म आग्रह गर्छु।'
चुनाव नजिएको बेलामा प्रत्येक दिनको कति महत्त्वपूर्ण छ र नेता तथा कार्यकर्ताले त्यसको कसरी सदुपयोग गर्नुपर्छ भन्ने सन्देश थापाको अभिव्यक्तिले दिन्छ। त्यसैले उनले भनेका थिए, 'यो बेलामा दुई चारवटा भए पनि त्यहाँको मतदाता भेट्ने हो, उहाँहरुसँग कुराकानी गर्ने हो।'
तर थापा समेतले नेतृत्व गर्ने दल नेपाली कांग्रेसको समग्र समय भने उनले अपेक्षा गरे जसरी बितिरहेको छैन। नेपाली कांग्रेसले नेतृत्व गरिरहेको सत्ता गठबन्धनका दलहरु दैनिक जसो बालुवाटारमा जम्मा भएर किचलो गरिरहेका छन्। बैठकको मुख्य विषय छ, गठबन्धनका दलहरुको तर्फबाट साझा रुपमा प्रतिस्पर्धी बनाइने महानगरपालिका/उपमहानगरपालिकाको मेयरको उम्मेदवार कुन दलको हुने?
भागबण्डा नटुंगिँदा सोमबार मात्रै गठबन्धनको बैठक दुईपटक बसेको थियो। मंगलबार पनि बैठक बस्दैछ। महानगरपालिका र उपमहानगरपालिकाको भागबण्डा टुंग्याएपछि पनि अन्य कैयौँ पालिकाहरुको भागबण्डा टुंग्याउन उनीहरुले ऊर्जा खर्च गर्नुपर्ने निश्चित जस्तै छ।
दैनिकजसो भागबण्डा केन्द्रित बैठककै कारण सत्ता गठबन्धनमा आबद्ध दलका शीर्ष नेताहरु चुनाव केन्द्रित कार्यक्रममा सहभागी हुन सकेका छैनन्। जबकि सत्ता गठबन्धनको प्रमुख प्रतिस्पर्धी नेकपा एमालेका अध्यक्ष केपी शर्मा ओली भने देश दौडाहामा छन्। दैनिकजसो विभिन्न जिल्ला पुगेर सभाहरुमा सहभागी भइरहेका छन्। अर्कोतिर, विभिन्न पालिकाको उम्मेदवार पनि सो दलले टुंगो लगाइसकेको छ। कतिपयमा लगाउने क्रममा छ।
समयमै उम्मेदवार चयन गर्न नपाउँदा आफूहरुलाई अप्ठ्यारो परेको नेकपा एकीकृत समाजवादीका उपमहासचिव जगन्नाथ खतिवडा बताउँछन्। 'गठबन्धनले चाँडोभन्दा चाँडो आफ्नो अभियानलाई सञ्चालन गरेर सम्पूर्ण राजनीतिक दलहरुलाई एकसाथ हिँडाउनुपर्ने हो, उसले चाँडै निर्णय गर्नुपर्थ्यो। त्यो गर्न नसकेर हामी अप्ठ्यारोमा छौँ', नेपाल लाइभसँग उनले भने।
सत्ता गठबन्धनमा सहमति नभएकाले रणनीतिक महत्त्व राख्ने पालिकाहरुमा समेत गठबन्धनका दलहरुले आफ्नो अजेण्डा अघि सार्न सकेका छैनन्। आफ्नो उम्मेदवार उठ्ने निश्चित भएको भए मतदाता भेट्ने, घोषणापत्र तयार गर्ने, मातहतका कार्यकर्तालाई परिचालन गर्ने लगायतका काम गर्न उनीहरु व्यस्त भइसकेका हुन्थे। अन्य रणनीति पनि अख्तियार भइरहेको हुन्थ्यो। तर, कुन पार्टीले उम्मेदवार पाउने निश्चित नहुँदा यस किसिमको तयारी हुन सकेको छैन।
गठबन्धनकै नयाँ दल एकीकृत समाजवादीलाई थप प्रचारको आवश्यक पर्ने स्वभाविक छ। गठबन्धनमा भागबण्डा मिलेको भए पहिल्यै मतदाताकहाँ पुग्ने र आफ्नो कुरा भन्ने समय उसलाई उपलब्ध हुन्थ्यो। तर, समय उपलब्ध नहुँदा उसमा चिन्ता थपिएको छ। 'हामीले समयमा प्रचार गर्न नपाउँदा मतदाता शिक्षाको लागि पर्याप्त समय नपाउने भएका छौँ। जसले गर्दा गठबन्धनमा आश्वस्त हुनुपर्ने जति मत आउँदैन भनेर चिन्तित छौँ', खतिवडा भन्छन्।
यद्यपि गठबन्धन आबद्ध दलहरुले कैयौँ जिल्लाहरुमा यसअघि नै सहमति जुटाएर भागबण्डा निश्चित पनि गरिसकेका छन्। त्यस्ता ठाउँमा आवश्यक तयारी भइरहेको नेपाली कांग्रेसका सहमहामन्त्री जीवन परियार बताउँछन्।
पार्टीले चुनाव केन्द्रित आफ्नो पूर्वतयारीलाई पहिल्यैदेखि नै निरन्तरता दिँदै आएको उनको भनाइ छ। 'उम्मेदवारको मनोनयन गर्ने दिन वैशाख ११ र १२ गते हो। त्यसैले त्यसभन्दा अगाडि नै हामीले उम्मेदवार निश्चित गर्न सक्नु राम्रो कुरा हो', उनी भन्छन्, 'विभिन्न परिस्थितिले गर्दा कुनै पनि दलको उम्मेदवारी तय भइसकेको जस्तो छैन। तैपनि, पूर्वतयारी गर्ने कुरा स्वभाविक हो। पार्टीले त्यस्तो तयारी गर्दै आएको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
