काठमाडौं- नेपाली कांग्रेसले कास्कीमा नेकपा एकीकृत समाजवादीसँग तालमेल नगर्ने निर्णय गरेको छ।
कांग्रेस जिल्ला कार्यसमिति कास्कीका सचिवद्वय देवेन्द्र रानाभाट र भानुभक्त ढकालले सोमबार एक विज्ञप्ति जारी गर्दै वैशाख ३० गते हुन गइरहेको स्थानीय तह निर्वाचनमा गठबन्धन गर्नेबारे भएको छलफलमा एकीकृत समाजवादीको अस्वभाविक दाबीका कारण तालमेल गर्न नसकिने निर्णय गरिएको जनाएका छन्।
पाँच दलीय गठबन्धनका शीर्ष नेताहरुको बैठकको निर्णय र निर्देशन बमोजिम स्थानीय निर्वाचनका सन्दर्भमा सत्ता गठवन्धनमा रहेका दलहरुसँग पटक पटकको लामो छलफल र बहसका साथै सँगै तालमेल गरेर जाने सन्दर्भमा भरपुर प्रयत्न गरिएको कास्की कांग्रेसले जनाएको छ।
जिल्ला संयन्त्रबाट निर्वाचनका लागि तालमेल गर्ने सम्बन्धमा नेकपा एकीकृत (समाजवादी) सँग कास्की जिल्लामा व्यापक छलफल हुँदा एकीकृत समाजवादीको अस्वभाविक दाबीका कारणले निष्कर्ष निस्कन नसकेको विज्ञप्तिमा जनाइएको छ।
'पार्टीका मातहातका निकायहरुको राय सुझावलाई समेत मध्यनजर गरी अन्य गठवन्धनका दलहरुसँग तालमेलका लागि वार्ता र सम्बाद अगाडि बढाउने र नेकपा एकीकृत (समाजवादी) सँग स्थानीय निर्वाचनमा मैत्रीपूर्ण र स्वच्छ प्रतिस्पर्धा सहित जाने निर्णय गरियो' विज्ञप्तिमा भनिएको छ।
साथै पोखरा महानगर पालिकाको प्रमुख (मेयर) का सम्बन्धमा सञ्चार माध्यममा आएको हल्लाका पछाडि नलाग्न कास्की कांग्रेसले पार्टी सदस्यहरुलाई अपिल गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
