काठमाडौं– सत्ता गठबन्धनमा भागबण्डा हुन नसकिरहेका बेला नेकपा एकीकृत समाजवादीका अध्यक्ष माधवकुमार नेपालले शनिबार सार्वजनिक रुपमै असन्तुष्टि पोखे। उनले आफ्नो शक्तिको अवमूल्यन नगर्न गठबन्धनकै अन्य दललाई चेतावनी दिए।
'हामीले भन्ने गरेका छौँ, आफ्नो शक्तिको अति मूल्यांकन गर्ने काम नगर्नुस्। र, हाम्रो शक्तिको अवमूल्यन गर्ने काम पनि नगर्नुस्। हाम्रो शक्ति निर्णायक शक्तिको रुपमा रहने गरेको छ', शनिबार सो पार्टीको प्रदेश सम्पर्क कमिटी भेलालाई काठमाडौंमा सम्बोधन गर्दै उनले भने। गठबन्धनको भागबण्डामा आफूलाई अपमान गरेको महसुस भएपछि नेपालले सार्वजनिक रुपमा तितो पोखेका हुन्।
आफ्नो पार्टी निर्णायक शक्ति भएकाले नै 'केपी ओली समूहलाई घोडाबाट बादशाहलाई झारे जसरी' सत्ताको उचाइबाट भूइँमा पछार्न निर्णायक भूमिका खेलेको नेपालको भनाइ छ। 'यो चेतना भया। यो होस होस्। यो ख्याल गर्नुस्', उनले गठबन्धनका दललाई नै चेतावनी दिए।
पोखराको मेयरमा दाबी
महानगरमध्ये पोखरा महानगरपालिकाको मेयर एकीकृत समाजवादीले दाबी गरेको छ। गठबन्धनका अन्य दलमा जनता समाजवादी पार्टीलाई वीरगञ्ज, नेकपा माओवादी केन्द्रलाई भरतपुर दिने विषयमा कांग्रेस सभापति शेरबहादुर देउवा सकारात्मक छन्। तर, एकीकृत समाजवादीलाई महागरककै मेयर दिनेमा देउवा मात्रै होइन, गठबन्धनका अन्य दलसमेत सकारात्मक नभएको संकेत नेपालले गरेका छन्।
त्यसलाई लक्षित गरेर उनले भनेका छन्, 'पोखरामा मात्रै हाम्रा झन्डै ८ हजार पार्टी कार्यकर्ताहरु छन्। ७/८ हजार कार्यकर्ता हुनु सजिलो कुरा हो? मतदाता होइन, कार्यकर्ता। संगठित र सक्रिय कार्यकर्ता। जनवर्गीय संगठनको पनि जोड्ने हो भने १२ हजार पुग्ने रहेछन्। अनि एकीकृत समाजवादीको केही अर्थ छैन भनेर गफ हाँक्ने?'
शुक्रबार मात्रै माओवादी केन्द्रका अध्यक्ष प्रचण्डले पार्टीको शीर्ष तहको बैठकमा एकीकृत समाजवादीका अध्यक्ष नेपालले आफू एमालेकै अध्यक्ष रहेको महसुस गर्ने गरेको टिप्पणी गरेका थिए। उक्त बैठकमा रहेका एक नेताका अनुसार प्रचण्डको भनाइको आशय थियो, 'माधवजीले अलिक बढी मागिहाल्नुहुन्छ। उहाँ नयाँ पार्टी एकीकृत समाजवादीको अध्यक्ष भन्दापनि एमाले नै सम्झिएर धेरै भाग माग्नुहुन्छ।'
यही भनाइको प्रतिउत्तर शनिबार नेपालले दिए। नेपालले अरु पार्टीले २०७४ सालको चुनावमा आ-आफ्नै पार्टीको तर्फबाट भाग लिएको भएपनि आफ्नो पार्टीले एमालेको रुपमा भाग लिएको स्मरण गराए। त्यसकारण एमालेको सफलतामा आफूहरुको हक लाग्ने बताए। 'हाम्रो हक एमालेले प्राप्त गरेको सफलतामा लाग्छ। पहिलो हक लाग्छ। अरुले चाहेर पनि एमालेको मान्छे तान्न सक्दैन। जति हामी आकर्षित गर्न सक्छौँ', उनले भने।
पोखरा महानगरपालिकाको मेयर छाड्ने अवस्थामा नेपाली कांग्रेसका स्थानीय नेताहरु छैनन्। उनीहरुले कांग्रेस सभापति शेरबहादुर देउवालाई भेटेरै पोखराको मेयर नछाड्ने अवगत गराइसके। एकीकृत समाजवादीलाई दिँदा एमालेले जित्ने ब्रिफिङ उनीहरुले देउवालाई गरेका छन्।
एमालेले जितेका पालिकामा ५० प्रतिशत आकांक्षा
आफ्नो पार्टीको संगठन ७७ जिल्ला, ७५३ पालिकामै रहेको एकीकृत समाजवादीको दाबी छ। महासचिव बेदुराम भुसालका अनुसार ६ हजार ७ सय ४३ वडामा एकीकृत समाजवादीको संगठन बिस्तार भएको छ। अहिले सबै ठाउँमा आफ्नो प्रतिनिधि उठाउने तयारी गरे पनि तालमेल गर्दा छाड्न तयार रहेको उनले नेपाल लाइभलाई बताएका छन्।
एमालेले जितेका पालिकामध्ये ५० प्रतिशतमा एकीकृत समाजवादीको दाबी रहने उनले प्रष्ट्याए। 'एमालेले जितेको सिटमध्ये ५० प्रतिशत हाम्रो हो भनेका छौं। किनभने त्यहाँबाट आधा शक्तिकै रुपमा विभाजित भएका छौं। तर, जति दाबी छ त्यति नै प्राप्त हुन्छ भन्ने पनि हुँदैन।'
एमालेले गएको निर्वाचनमा काठमाडौं र पोखरा गरी दुईवटा महानगरपालिका जितेको थियो। त्यसको ५० प्रतिशत एउटा हुने सोझो हिसाब एकीकृत समाजवादीको छ। राजधानी रहेको काठमाडौं महानगरपालिका गठबन्धनको नेतृत्व गरिरहेको कांग्रेसले दिने सम्भावना कम देखेपछि एकीकृत समाजवादीले पोखरा दाबी गरेको हो।
उपमहानर, नगर र गाउँपालिकामा पनि यही सिद्धान्तका आधारमा एकीकृत समाजवादीले भागबण्डा मागिरहेको छ।
समाजवादी रोज्ने कति?
२०७४ को स्थानीय निर्वाचनमा एमाले २ सय ९४ पालिका जितेको थियो। कांग्रेसले २ सय ६६, माओवादी केन्द्रले १ सय ६, तत्कालीन संघीय समाजवादी पार्टी हालको जनता समाजवादी पार्टीले ३४ पालिकामा जितेको थियो । जनमोर्चाले ३, बाबुराम भट्टराई नेतृत्वको तत्कालीन नयाँ शक्ति पार्टीले २ र स्वतन्त्र ४८ पालिकामा चुनाव जितेका थिए।
एमालेले जितेकाका ५० प्रतिशत दाबी गर्दा एकीकृत समाजवादीको भागमा १ सय ४७ पर्छ। जुन गत निर्वाचनमा माओवादी केन्द्रले जितेको भन्दा धेरै हुन्छ। यस हिसाबले गठबन्धनभित्रको कांग्रेसपछिको शक्तिशाली एकीकृत समाजवादी ठहरिन्छ। गठबन्धनमा नेपालले गर्ने यही ५० प्रतिशतको तर्क चित्त नबुझेर प्रचण्डले 'एमालेकै अध्यक्ष महसुस गरेको' टिप्पणी गरेका हुन्।
एमालेबाट फुट्दा पालिकामा एकीकृत समाजवादीका पक्षमा ठूलो संख्या देखिएन। एकीकृत समाजवादीले दाबी गरिरहेको पोखरा महानगर रहेको गण्डकी प्रदेशमै फुटको असर कमजोर रह्यो। गण्डकी प्रदेशभरि एकीकृत समाजवादी रोज्ने पालिका प्रमुख र उपप्रमुखमा स्याङ्जाको आँधीखोला गाउँपालिका उपाध्यक्ष प्रमिला पौडेलले एक्ली रहिन्।
बागमती प्रदेशमा काठमाडौंको कागेश्वरी मनोहरा नगरपालिकाको प्रमुख कृष्णहरि थापा, रामेछापको मन्थली नगरपालिकाका प्रमुख रमेशकुमार बस्नेत, काभ्रेको मण्डन–देउपुर नगरपालिका प्रमुख टोकबहादुर वाइबा, मकवानपुरको इन्द्रसरोवर गाउँपालिका प्रमुख जीवन लामा, कैलाश गाउँपालिका प्रमुख टङ्क मोक्तान, धादिङको धुनीबेसी नगरपालिका प्रमुख बालकृष्ण आचार्य र गल्छी गाउँपालिका अध्यक्ष कृष्णहरि श्रेष्ठ एकीकृत समाजवादी पार्टीमा रहेका छन्।
एकीकृत समाजवादी रोज्ने सुदूरपश्चिका पालिकाहरुमा अछामको साँफेबगर नगरपालिका प्रमुख कुलबहादुर कुँवर, कञ्चनपुरको बेदकोट नगरपालिका प्रमुख अशोककुमार चन्द, पुनर्वास नगरपालिका प्रमुख जीवनराम थापा, डडेलधुराको नवदूर्गा गाउँपालिका अध्यक्ष कबिन्द्र बहादुर विष्ट, अमरगढी नगरपालिका उपप्रमुख संगीता भण्डारी, बैतडीको पुर्चौडी नगरपालिका प्रमुख रणबहादुर कुँवर, अछामको चौरपाटी गाउँपालिका अध्यक्ष हर्कबहादुर साउद, बैतडीको सिगास गाउँपालिका अध्यक्ष हरिसिंह धामी, बझाङको केदारस्यूँ गाउँपालिका अध्यक्ष इन्द्रबहादुर भण्डारी र उपाध्यक्ष निशा धामी रहेका छन्।
प्रदेश १ मा उदयपुरको त्रियुगा नगरपालिका प्रमुख बलदेव चौधरी र इलामको सूर्योदय नगरपालिका प्रमुख रणबहादुर राईले एकीकृत समाजवादी रोजेका छन्।
कर्णालीमा डोल्पाको ठूलीभेरी नगरपालिकाका प्रमुख गणेशबहादुर शाही, दैलेखको महाबु गाउँपालिका अध्यक्ष जङ्गबहादुर शाही, सल्यानको सिद्धकुमाख गाउँपालिका अध्यक्ष चित्रबहादुर चलाउने, कालिकोटको नरहरिनाथ गाउँपालिका प्रमुख धीरबहादुर विष्ट, शुभकालिका गाउँपालिका अध्यक्ष खडानन्द चौलागाई एकीकृत समाजवादीमा छन्।
सत्तारुढ गठबन्धनले स्थानीय आवश्यकता र अवस्थाअनुसार तालमेल गर्ने भनेर तल्लो तहका संयन्त्रलाई निर्देशन दिइएको छ। तर, गठबन्धनका दलहरुले धेरै ठाउँमा एकीकृत समाजवादीलाई दिन अस्वीकार गरेको रिपोर्ट अध्यक्ष नेपालले प्राप्त गरेका छन्। गठबन्धनकै दलहरुले पेल्न थालेको महसुस भएपछि नेपाल सार्वजनिक रुपमा तितो पोख्न थालेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
