गठबन्धन बैठक, फाइल तस्बिर
काठमाडौं– स्थानीय तहको निर्वाचनमा तालमेल गरेर जाने सैद्दान्तिक सहमति गरेका सत्तारुढ गठबन्धनका शीर्ष नेताहरुको बैठकले स्थानीय तहको बाँडफाँटबारे निर्णय गर्न कार्यदललाई जिम्मेवारी दिएको छ।
आइतबार बिहान प्रधानमन्त्रीको सरकारी निवास बालुवाटारमा बसेको शीर्ष नेताहरुको बैठकले यस्तो निर्णय गरेको बैठकमा सहभागी राष्ट्रिय जनमोर्चाका नेता हिमाल पुरीले जानकारी दिए।
‘बिहान ५ दलका नेताहरुको बैठक बसेको छ। कार्यदलको बैठक बसेर छिटो पदहरुको बाँडफाँट गर्ने भन्ने कुराकानी भएको छ,’ उनले भने, ‘आजै कार्यदलको बैठक बसेर यसबारेमा निर्णय गर्नेछ।’
उनका अनुसार आज (आइतबार) दिउँसो १ बजे कार्यदलको बैठक बस्ने तय भएको छ। गठबन्धन दलका शीर्ष नेताहरुको बैठकमा अब कार्यदलले नै लगातार काम गर्ने सहमति भएको पनि उनले जानकारी दिए।
‘जिल्लाहरुमा आधार तयार पारेर पठाएका थियौं। त्यसका बारेमा बिहानको बैठकमा छलफल भएको छ। जिल्लाबाट आएका रिर्पोटमाथि हाम्रो छलफल चल्छ,’ उनले भने, ‘कार्यदलले अब यसमै काम गरेर छिटो स्थानीय तहमा कहाँ कसरी बाँडफाँट गर्ने भन्ने टुंगो लगाउने छ।’
कार्यदलले बाँडफाँटका विषयमा आवश्यक निर्णय गरिसकेपछि उक्त निर्णय शीर्ष नेताहरुलाई पेस गरिने छ।
महानगर र उपमहानगरको टुंगो केन्द्रले लगाउने यसअघि नै निर्णय भइसके पनि यसमा अहिलेसम्म सहमति जुट्न सकेको छैन।कार्यदलले महानगर र उपमहानगरको विषयमा पनि छलफल गरेर शीर्ष नेताहरुलाई जानकारी दिने बताइएको छ।
निर्वाचन आयोगले उम्मेदवारको मनोनयन दर्ता गर्ने समय बैशाख ११ र १२ गतेका लागि तोकेको छ। मनोनयन दर्ताको समय नजिक आइसक्दा पनि गठबन्धन दलले भने बाँडफाँटको टुंगो लगाउन सकेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1751526495.png)
-1749826086.png)
