काठमाडौं–यस पटकको स्थानीय तह निर्वाचनमा भरतपुर महानगरपालिकाको मेयरमा कांग्रेसको दाबी नछाड्न सभापति शेरबहादुर देउवालाई दबाब परेको छ।
शनिबार बसेको केन्द्रीय कार्यसम्पादन समितिको बैठकमा महामन्त्रीद्वय विश्वप्रकाश शर्मा र गगन थापाले भरतपुर यसपटक छाड्न हुने जिकिर गरेका हुन्। शनिबार दिउँसो आयोजित एक कार्यक्रममा पनि महामन्त्री शर्माले स्थानीय कार्यकर्ताको भावना कुल्चिएर भरतपुर यसपटक माओवादीलाई दिन नसकिने बताएका थिए।
शनिबारको बैठकले ६ महानगर र ११ उपमहानगरमा उम्मेदवार टुंगोमा पु¥याउन सकेन। बैठक अधिकांश समय भरतपुरकै विषयमा केन्द्रित भएको एक नेताले बताए।
तर प्रधानमन्त्री एवं पार्टी सभापति शेरबहादुर देउवाले उपमेयर लिने भन्दै मेयर माओवादीलाई दिने संकेत गरे।
महामन्त्री शर्माको प्रस्ताव–मित्रवत प्रतिस्पर्धा गराऔं
बैठकमा महामन्त्री शर्माले भरतपुरमा तेस्रो विकल्पमा जानुपर्ने प्रस्ताव राखेका थिए। उनले त्यहाँ कांग्रेसबाटै उम्मेदवार उठाउनुपर्ने बताउँदै यस्तो विकल्प पार्टीको हितमा हुने बताए। २०७४ मा कांग्रेसले नेकपा माओवादी केन्द्रकी नेता रेनु दाहाललाई समर्थन गरेको तर यसपटक भरतपुरमा कांग्रेसबाटै उठाउनु पर्ने उनको तर्क थियो। ‘यसपटक मेयर कांग्रेसकै हुनुपर्छ,’ उनले भने, ‘माओवादीले यसपटक पनि कांग्रेसले सघाओस् भन्ने चाहन्छ, तर मेयर छोड्नु हुन्न।’
महामन्त्री शर्माले भरतपुरमा माओवादीले मेयर छाड्न नसक्ने हो भने मित्रवत प्रतिस्पर्धा गर्न सकिने भएकाले यो विकल्पमा जानुपर्ने बताए।
‘नयाँ र तेस्रो विकल्प भनेको दुवैले नछाड्ने अर्थात् मित्रवत् प्रतिस्पर्धा,’ उनले बैठकमा भनेका थिए।
देशभर एक्लै लड्नुपर्छ भन्नेमा आफू रहे पनि पार्टीको निर्णय स्वीकार गरेर अघि बढेको उनले बताए । ‘स्थानीय स्थिति, स्थानीय भावना र स्थानीय आवश्यकताले भन्छ,’ उनले भने, ‘भरतपुरको मेयर कांग्रेसको बन्नुपर्छ, तालमेल भए तालमेलबाट नभए मित्रवत् प्रतिस्पर्धा।’
अर्का महामन्त्री गगन थापाले पनि शर्माको कुरामा समर्थन गरेका थिए। महामन्त्री थापाले महानगर र उपमहानगरपालिकाको तालमेलबारे निर्णय गर्नुअघि नगर कमिटी र जिल्लाको राय लिनुपर्ने सुझाव दिए।
भरतपुर माओवादीलाई नै दिने संकेत
बैठकमा उठेका प्रश्नको जवाफ दिँदै देउवाले भरतपुर माओवादीलाई नै दिनु पर्ने संकेत गरे। भरतपुर महानगर कमिटीकै सभापतिले उपमेयर लड्न तयार छु भनिसकेको भन्दै उनले यसको बचाउ गरे। भरतपुर नगर सभापति चित्रसेन अधिकारी हुन्। संस्थापन इतर समूहका उनी वडा नम्बर २१ का वडाध्यक्षसमेत हुन् ।
कांग्रेसको भरतपुर नगर र चितवन जिल्ला कमिटीले कुनै हालतमा मेयर नछाड्ने निर्णय गरेको छ। तर देउवाले नगर र जिल्लाको निर्णयलाई उल्लेख नगरी नगर कमिटीका सभापतिले आफूलाई उपमेयर लड्छु भनिसकेको दावी गरे। उनले मेयर माओवादीलाई दिने संकेत गरेर महामन्त्रीद्वयलाई जवाफ दिएको कार्यसम्पादन समितिका एक सदस्यले जानकारी दिए। ‘पार्टी सभापति माओवादीलाई नै दिन तयार देखिनुभएको छ,’ ती सदस्यले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768546075.png)
-1764146706.png)
-1768395492.png)
