काठमाडौं– नयाँ वर्ष २०७९ को पहिलो दिन वैशाख १ गते सैयौं ओशो सन्यासी तथा ओशो प्रेमीहरुले काठमाडौंको टुँडिखेलमा नाचगान र ध्यान गरेर मनाए।
ध्यान, नृत्य र उत्सवका साथ नयाँ वर्षको सुरुवात गर्ने लक्ष्यसहित ओम नेपाल मिडियाको आयोजना र ओशो तपोवनको सहकार्यमा आयोजित समारोहको औपचारिक उद्घाटन उपराष्ट्रपति नन्दबहादुर पुनले गरेका थिए।
समारोहलाई सम्बोधन गर्दै ओशो तपोवनका संस्थापक बोधिसत्व स्वामी आनन्द अरुणले नेपाल देव भूमि, अध्यात्म भूमि र पुण्य भूमि रहेको उल्लेख गर्दै नेपालले आफ्नो गरिमा पुनः प्राप्त गर्न सकोस् भन्दै शुभ कामना दिए। उनले कोरोनापछि संसारभरि नै मानसिक समस्या बढ्दै गएकाले योग र ध्यान मानवीय जीवनमा अनिवार्य बन्न पुगेको जनाए।
स्वामी अरुणले भारत सरकारको पहलमा २१ जुनलाई विश्व योग दिवसको रुपमा मनाउन थालिए जस्तै बुद्ध पूर्णिमालाई विश्व ध्यान दिवसको रुपमा मनाउन आग्रह गरे।
'संयुक्त राष्ट्र संघमा यससम्बन्धी प्रस्ताव लैजान मैले नेपाल सरकारलाई आग्रह गर्दै आएको छु। त्यसो भयो भने अन्तर्राष्ट्रिय ध्यान केन्द्रको रुपमा संसारभरि नेपालको पहिचान हुनेछ,' उनले भने।
स्वामी अरुणले ओशो तपोवनबाट प्रशिक्षित प्रशिक्षकहरुले संसारभरि ध्यान केन्द्रहरु खोलेर योग र ध्यानको प्रशिक्षण दिइरहेको बताए। 'नेपालमा मात्रै हामी १ लाख ओशो सन्यासीहरु छौं र १०० भन्दा बढी शाखाहरु छन्। प्रत्येक सन्यासीले आफ्नो जन्मदिनमा ५ ओटा बिरुवा रोप्ने अभियान संचालन गरेका छौं,' उनले भने।
उक्त समारोहलाई सम्बोधन गर्दै संचार तथा सूचना प्रविधिमन्त्री ज्ञानेन्द्र बहादुर कार्कीले मानसिक तनावले मानवको अमूल्य जीवनलाई निरर्थक बनाउने भएकाले योग र ध्यानको अभ्यास गर्न सुझाव दिए। उनले स्वामी अरुण त्याग, तपस्या र विद्वत्ताको त्रिवेणी भएको बताउदै उनको सपना पुरा गर्न आ–आफ्नो ठाउंबाट योगदान गर्न आग्रह गरे।
कार्यक्रममा पद्मश्री सम्मानबाट सम्मानित प्रख्यात भारतीय लोक गायक प्रह्लाद टिपण्या र उनको टोलीले कबिर भजन सुनाएका थिए। त्यस्तै चर्चित कलाकार तथा ओशो सन्न्यासीहरु मनोज गजुरेल, बेनिशा पौडेलले साथै कुटुम्ब ब्याण्डले रोचक प्रस्तुति दिएका थिए। कार्यक्रममा सबै सन्यासी तथा पाहुनाहरुले आधा घण्टा सामूहिक कुण्डलिनी ध्यान गरेका थिए।
.jpg)
धरान घर भै हाल हात्तिबन बस्ने स्वामी ध्यान आकाश पनि ध्यान उत्सवमा सहभागी थिए। स्वामी ध्यान आकाश व्यस्त जीवनशैलीबाट केही समय निकालेर भएपनि ध्यान योग गर्नुपर्ने बताउँछन्। उनले भने, 'हामीले मोबाइलमा, टेलिभिजनमा घन्टौं बिताइ रहेका हुन्छौं। यदि त्यसबाट केहि समय निकालेर ध्यान गर्यौं भने हाम्रो जीवनमा ठूलो क्रान्ति हुनेछ।'
उत्सवका एक जना आयोजक, स्वामी आनन्द देव (गैर आवासीय नेपाली संघका पूर्व अध्यक्ष भवन भट्ट) ले राजनीति तथा समाजलाई सफा गर्ने एक मात्र माध्यम ध्यान भएको बताए। उनले ध्यानलाई जीवनको केन्द्रविन्दु बनाउन पनि आग्रह गरे।
समारोहमा नेकपा माओवादी केन्द्रका नेता नारायणकाजी श्रेष्ठ, गैर आवासीय नेपाली संघका संस्थापक अध्यक्ष डा उपेन्द्र महतो, नेपाल विद्युत प्राधिकरणका कार्यकारी निर्देशक कुलमान घिसिङ पनि सहभागी भएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
