काठमाडौं– नेकपा एमालेका स्थानीय कमिटीले ६ वटै महानगरमा मेयर उम्मेदवार सिफारिस गरेका छन्। तीन महानगर कमिटी सर्वसम्मत उम्मेदवार छान्न सफल भएका छन्। ललितपुर महनागरमा हरिकृष्ण ब्यन्जनकार, भरतपुरमा विजय सुवेदी र वीरगञ्जमा विजय सरावगी सर्वसम्मत रुपमा उम्मेदवार सिफारिस भएका हुन्।
सबैभन्दा धेरै पोखरा महानगरपालिकको मेयरका लागि १२ जना सिफारिस छन्। सर्वसम्मत रुपमा टुंगिन नसकेपछि स्थानीय कमिटीले मतदान गर्ने तयारी गरेको थियो । त्यसले समस्या निम्तिने भएपछि केन्द्रले छान्नेगरी सिफारिस गरिएको हो।
विराटनगरमा पाँच आंकाक्षी
प्रदेश १ को एकमात्र महानगरपालिका विराटनगरको मेयरका लागि एमाले महानगर कमिटीले ५ जनाको नाम सिफारिस गरेको छ। केन्द्रीय सदस्य रामलाल साह, प्रदेश कमिटी सदस्यद्वय पर्शुराम नामले चिनिने कृष्ण बस्नेत र महेश भट्टराई, जिल्ला कमिटी उपाध्यक्ष बाबुराम कार्की र महानगर अध्यक्ष सागर थापाको नाम सिफारिस भएको हो।
महानगर उपप्रमुखमा प्रदेश कमिटी सदस्य विमला घिमिरे दाहाल, जिल्ला सदस्य अन्जु उपाध्यय र महानगर कमिटी उपाध्यक्ष शिल्पा कार्की सिफारिस भएका छन्।
ललितपुरमा ब्यन्जनकार
ललितपुर महनगरमा एमालेले २०७४ सालको निर्वाचनमा थोरै मतले पराजित भएका हरिकृष्ण ब्यन्जनकारलाई फेरि उम्मेदवार बनाउने भएको छ। उपमेयरमा भने दुई जनाको नाम सिफारिस भएको छ।
उपमेयरमा मञ्जरी शाक्य आस्था र सरस्वती खड्काको नाम सिफारिस भएको ललितपुर एमालेले जनाएको छ। गत निर्वाचनमा नेपाली कांग्रेसका उम्मेदवार चिरिबाबु मर्हजनले ३२९ मतले व्यञ्जनकारलाई पराजित गरेका थिए।
काठमाडौं शाक्यसहित पाँच
नेकपा एमालेबाट काठमाडौं महानगरपालिकाको मेयर तथा उपमेयर पदमा उम्मेदवारका लागि ९ जना आकांक्षीहरुको नाम सिफारिस भएको छ।
मेयरका लागि काठमाडौंका हालका मेयर विद्यासुन्दर शाक्यसहित ५ जनाको नाम सिफारिस भएको छ। मेयरका लागि शाक्यसहित केशव स्थापित, रामवीर मानन्धर, निर्मल देउला र इन्दिरा पन्तको नाम सिफारिस भएको हो।
यस्तै, उपमेयरका लागि रत्ना गुरुङ, पेम्बा लामा, निना काफ्ले र शान्ति अधिकारीको नाम सिफारिस भएको हो।
भरतपुरमा विजय सुवेदी
नेकपा एमालेले भरतपुर महानगरपालिकाको मेयरमा विजय सुवेदीलाई उम्मेदवार बनाउने सर्वसम्मतबाट निर्णय गरेको छ। एमाले उपमहासचिव प्रदीप ज्ञवालीसमेत सहभागी नगर कमिटीको बैठकले सर्वसम्मत रुपमा सुवेदीलाई उम्मेदवार बनाउने निर्णय गरेको हो।
सुवेदी २०७४ को प्रदेशसभा निर्वाचनमा चितवन क्षेत्र नम्बर २ ‘ख’ बाट निर्वाचित भएका थिए। तीन कार्यकाल नेकपा एमाले चितवनको जिल्ला नेतृत्व हाँकिसकेका सुवेदी अहिले पार्टीको बागमती प्रदेश कमिटी सचिव छन्। उपमेयरको टुंगो भने अझै लगाइएको छैन।
वीरगञ्जमा आगन्तुक सरावगीलाई स्वागत
नेकपा एमालेबाट वीरगञ्ज महानगरपालिकाको मेयर उम्मेदवारमा विजयकुमार सराबगी सिफारिस भएका छन्। एमालेको वीरगञ्ज महानगर कमिटीको बुधबारको बैठकले उनलाई स्थानीय तहको निर्वाचनमा एमालेले मेयर उम्मेदवारका लागि सिफारिस गरेको हो।
२०७४ सालको निर्वाचनमा तत्कालीन संघीय समाजवादी फोरमबाट निर्वाचित उनी गत फागुन २८ मा एमाले प्रवेश गरेका थिए।
गत निर्वाचनमा उक्त महानगरमा कमजोर देखिएको एमालेले उनलाई मेयरको उम्मेदवार बनाउनकै लागि पार्टीमा स्वागत गरेको थियो। उपमेयरको भने टुंगो लागेको छैन।
पोखरामा आकांक्षीको लर्को
२०७४ को निर्वाचनमा कांग्रेस र माओवादीको गठबन्धन हुँदा समेत फराकिलो अन्तरले चुनाव जितेको एमालेलाई यसपल्ट मेयरको उम्मेदवार छनोटमा सकस भएको छ। महानगरमध्ये एमालेले जीत हासिल गर्न सबैभन्दा बढी सम्भावना रहेको पोखरा महानगरको मेयरका लागि १२ जना र उपमेयरका लागि ११ जना दाबेदार छन्।
मेयरको उम्मेदवारमा केन्द्रीय सदस्य एवं प्रदेश सांसद कृष्णबहादुर थापा, राजीव पहारी, केन्द्रीय सदस्य मिना गुरूङ, भीम कार्की, व्यवसायी पुष्पज्योति ढुङ्गाना, पुष्पराज अधिकारी, प्रा.डा. विश्वकल्याण पराजुली, रश्मी आचार्य, दीपक पौडेल, दर्शन लामा, बालकृष्ण काउछा मगर र सावित्री भण्डारीले दाबी गरेका छन्।
यस्तै, उपमेयरमा तेजनारायण अधिकारी, सञ्जीवबहादुर कोइराला, बलराम गायक गन्धर्व, हरिमाया गुरुङ, बैनबहादुर क्षेत्री, जीवन प्रसाद आचार्य, टिकाराम पंगेनी, बामदेव ढु्ंगाना, शोभामोहन पौडेल, देवका पहारी त्रिपाठी र सुष्मा पौडेलको दाबी छ।
सुरुमा मेयर र उपमेयरका आकांक्षीबीच निर्वाचन गराएर उम्मेदवार टुंगो लगाउने तयारी थियो। तर, मतदान हुँदा झन् समस्या चर्किने भएपछि सबै आकांक्षीको नाम पार्टी केन्द्रमा सिफारिस गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768114680.png)
-1768105924.png)
-1764146706.png)
