धनगढी– सुदूरपश्चिम प्रदेश सरकारमा नेपाली कांग्रेस पनि सहभागी हुने भएको छ। प्रदेश सभाको सबैभन्दा ठूलो तथा प्रमुख सत्ता घटक दल नेकपा एकीकृत समाजवादी र कांग्रेसबीच बुधबार भएको बैठकमा कांग्रेसलाई पनि सरकारमा सहभागी गराउने सहमति जुटेको छ।
बुधबार एकीकृत समाजवादीकी प्रदेश अध्यक्ष गरिमा शाह तथा प्रदेश सभा संसदीय दलका नेता दीर्घ सोडारी र नेपाली कांग्रेस सुदूरपश्चिम प्रदेश समितिका सभापति वीरबहादुर बलायरबीच छलफल भएको थियो। उक्त छलफलमा कांग्रेसलाई सरकारलाई सहभागी गराउन सहमति जुटेको कांग्रेस प्रदेश समितिका सभापति बलायरले जानकारी दिए।
'आजको छलफलमा समाजवादीका नेताहरुले सरकार विस्तार गर्ने कुरामा सहमति जनाउनुभयो। केही दिनमा हामी (नेपाली कांग्रेस) पनि सरकारमा सामेल हुन्छौं,' बलायरले भने।
सुदूरपश्चिम प्रदेश सरकारको नेतृत्व नेकपा माओवादी केन्द्रले गरिरहेको छ। केन्द्रमा केपी शर्मा ओलीको तत्कालीन सरकारलाई विस्थापित गरेपछि प्रदेशमा पनि गठबन्धन सरकार बनाउन थालिएको थियो। अन्य प्रदेशमा गठबन्धन सरकार गठन भएपनि सुदूरपश्चिममा भने कांग्रेस सत्ता बाहिरै थियो।
यसअघि कांग्रेसलाई सरकारमा समावेश गराउन खोज्दा समाजवादीले नै असहमति जनाएको विषय बाहिरिएको थियो। अब भने समाजवादीसँगै सहमति भएपछि कांग्रेस सरकारमा सहभागी हुने 'पक्का' भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
