काठमाडौं– कतार विश्वकप २०२२ पछि रोनाल्ड कोम्यानले पुनः नेदरल्यान्ड्सको प्रशिक्षकको जिम्मेवारी सम्हाल्ने भएका छन्। रोयल डच फुटबल एसोसिएसनले बुधबार विश्वकपपछि कोम्यानलाई राष्ट्रिय टोलीको जिम्मेवारी दिने जनाएको हो।
सन् २०१८ को विश्वकपमा छनोट हुन नसकेपछि कोम्यानले नेदरल्यान्ड्सको जिम्मेवारी सम्हालेका थिए। उनले नै नेदरल्यान्ड्सलाई युरोकप २०२० मा छनोट गराएका थिए।
उनकै प्रशिक्षणमा नेदरल्यान्ड्सले नेसन्स लिगको फाइनल पनि खेलेको थियो। तर, फाइनलमा नेदरल्यान्ड्स पोर्चुगलसँग १–० ले पराजित भएको थियो।
डच फुटबल एसोसिएसनले आगामी कतार विश्वकप २०२२ सम्म कोम्यानलाई प्रमुख प्रशिक्षकको रुपमा राख्न चाहन्थ्यो। उसले एभर्टनबाट बर्खास्त भएको ३ महिना नबित्दै साढे ४ वर्षका लागि सम्झौता गरेको थियो। तर, कोम्यान नेदरल्यान्ड्को टोलीमा साढे २ वर्ष मात्र बसे।
प्रशिक्षण करिअरको २४ वर्षमा कोम्यानले ११ वटा क्लब र एउटा राष्ट्रिय टोलीको प्रशिक्षक एवं सहायक प्रशिक्षकको रुपमा काम गरे। यद्यपि, उनको प्रशिक्षक करिअर औषत नै रह्यो। डच राष्ट्रिय टोलीका साथै आयाक्स र फेयुनर्डबाहेकका अन्य टोलीमा उनले २ सिजन निरन्तरता दिन सकेनन्। इङ्लिस क्लब एभर्टनमा अपरिपक्व निर्णयका कारण बर्खास्तीमा परे।
कोम्यान २०२० मा क्याटलान क्लब बार्सिलोना जानका लागि नेदरल्यान्ड्सको जिम्मेवारीबाट पछि हटेका थिए। तर, बार्सिलोनामा आशातित प्रदर्शन गर्न नसकेपछि कोम्यान गत अक्टोबरमा बर्खास्तीमा परेका थिए।
कोम्यान्सले साढे एक वर्षअगाडि आफूले असन्तुष्ट भएर राष्ट्रिय टिमको जिम्मेवारी नछाडेको बताएका छन्। उनले फेरि फर्किन पाउँदा खुशी लागेको पनि बताएका छन्।
‘फेरि सँगै काम गर्नका लागि म उत्साहित छु। साढे एक वर्ष अगाडि पनि मैले असन्तुष्ट भएर राष्ट्रिय टिमको जिम्मेवारी छाडेको थिइनँ। नतिजा, खेलाडीसँगको सम्बन्ध राम्रो थियो। म पनि खुसी थिएँ। हामी फेरि त्यही यात्रालाई निरन्तरता दिनेछौं,’ कोम्यानलाई उद्धृत गर्दै एसोसिएसनले भनेको छ।
लुइस भान हालले कतार विश्वकप २०२२ पछि प्रशिक्षक पदको जिम्मेवारी छाड्ने बताइसकेका छन्। भानले गत साता मात्र आफू ‘प्रोस्टेट क्यान्सर’बाट ग्रसित भएको खुलासा गरेका थिए। उनी हाल क्यान्सरसँग जुधिरहेका छन्।
७० वर्षीय भान हालले पछिल्लो अन्तर्राष्ट्रिय ब्रेकमा पनि खेलाडीसँग यो कुरा लुकाएको बताएका छन्। उनी अहिलो नेदरल्यान्ड्सको प्रशिक्षकका रूपमा तेस्रो कार्यकाल सम्हालिरहेका छन्। सन् २०१४ मा नेदरल्यान्ड्सलाई तेस्रो स्थानसम्म पुर्याउन सफल भानले टोलीलाई कतार विश्वकपमा स्थान सुरक्षित गराएका थिए।
भानले दुई वर्ष युनाइटेडको प्रशिक्षण सम्हाल्दा क्लबले २०१६ मा एफए कपको उपाधि जितेको थियो। उनले छाडेपछि जोजे माउरिन्होले युनाइटेडको जिम्मेवारी सम्हालेका थिए। भानले बार्सिलोना, आयाक्स, एजेड अल्कमार र बायर्न म्युनिखबाट लिग उपाधि जितेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
