प्रहरीमा १६ पाने ‘आतंक’ : लोकमान शैलीमा उत्रिँदै अख्तियार प्रमुख प्रेम राई

समाचार

दुर्गा दुलाल सोमबार, चैत २१, २०७८ १४:२७

काठमाडौं– अख्तियार दुरुपयोग अनुसन्धान आयोगले अहिले प्रहरीका उच्च अधिकारीलाई धमाधम १६ पन्ने फारम भराउन थालेको छ। प्रहरी अधिकारीहरु विरुद्ध पदमा बसेर अकूत सम्पत्ति कमाएको भन्ने बेनामी उजुरी पर्न थालेपछि अख्तियारले धमाधम उनीहरुलाई १६ पन्ने फारम भराएर अनुसन्धान प्रक्रिया अघि बढाएको हो।

तत्कालीन प्रमुख आयुक्त लोकमानसिंह कार्कीले आफ्ना विरोधीहरुलाई तह लगाउन १३ पन्ने फारम भराएर हैरानी दिने गरेको भन्ने व्यापक गुनासो उठेको थियो। त्यही शैलीमा अहिले सामान्य बेमानी उजुरी पर्नेबित्तिकै अख्तियारले १६ पन्ने फारम भराउन थालेको एक उच्च प्रहरी अधिकारीले नेपाल लाइभलाई बताए।

उच्च स्रोतका अनुसार अख्तियारले बहालवाला प्रहरी नायव महानिरीक्षक (डीआईजी) वसन्त लामालाई समेत १६ पन्ने फारम भराइएको छ। प्रहरी अतिरिक्त महानिरीक्षक (एआईजी)को बढुवा मुखमा लामालाई १६ पन्ने भराउनुले कतिपयले भने नियोजित रुपमा समेत अर्थ्याउने गरेका छन्। १६ पन्ने फारम पर्ने क्रममा लामाले आफ्नो बैंक खातामा जम्मा भएको काठमाडौं उपत्यकाकै घरजग्गा बेचेवापत आएको भनेर स्रोत खुलाएको अख्तियार स्रोतले नेपाल लाइभलाई जानकारी दियो।

‘लामालाई अहिले नै निर्दोष हुन् भनेर घोषणा गर्न त मिल्दैन। यद्यपि, घरजग्गा बेचेवापतको रकम खातामा जम्मा भएको चाल पाएर उनलाई हैरानी दिने तथा बढुवामा पछि पार्ने उद्देश्यले पनि १६ पन्ने भराएको भनेर आशंका गर्ने ठाउँ छ’, स्रोत भन्छ।

लामा मात्रै होइन प्रहरीका डीएसपी, एसपीसम्मले १६ पन्ने फारम भरेका छन्। एसपी योगबहादुर पाललाई पनि अख्तियारले केही समयअघि मात्रै १६ पन्ने फारम भराएको स्रोतले जानकारी दियो। राष्ट्रिय अनुसन्धानबाट नेपाल प्रहरीमा स्थानान्तरण भएर आएका पाल भने पटक पटक विवादमा पर्दै आएका प्रहरी अधिकृत हुन्।

त्यसैगरी, अख्तियारले महानगरीय प्रहरी परिस काठमाडौंमा कार्यरत डीएसपी सुधीरराज शाहीलाई समेत १६ पन्ने फारम भराएको छ। शाहीको १६ पन्नेको साइनो भने काठमाडौंमा भएको प्रर्दशनमा नेकपा एमाले कार्यकर्तामाथिको दमन रहेको जानकारहरु बताउँछन्।

शेरबहादुर देउवा प्रधानमन्त्री भएपछि पेट्रोलियम पदार्थको मूल्यवृद्धि लगायत सर्वोच्चले प्रतिनिधि सभा विघटन बदर गर्ने गरेको फैसलाविरुद्ध समेत प्रर्दशनमा उत्रिएका एमाले कार्यकर्तामाथि डीएसपी शाहीको टोलीले दमन गरेको भन्दै त्यसैको प्रतिशोध साँध्न १६ पन्ने फारम भराइएको जानकार स्रोतले बतायो। प्रदर्शनमा डीएसपी शाहीको टोलीले हस्तक्षेप गरेको भन्दै त्यसको केही दिनभित्रै अख्तियारले शाहीलाई उजुरी परेको भन्दै १६ पन्ने फारम भर्न बोलाएको स्रोतको भनाइ छ।

पूर्वगृह सचिव समेत रहेका अख्तियार प्रमुख प्रेमकुमार राई एमाले अध्यक्ष केपी शर्मा ओलीका निकट हुन्। ओलीले नै अध्यादेशमार्फत् राईलाई अख्तियार प्रमुख नियुक्त गरेका थिए। उनै राईको निर्देशनपछि डीएसपी शाहीलाई अख्तियारले १६ पन्ने भराएको जानकार स्रोतको दाबी छ।

प्रदेश २ को तराईको जिल्ला धनुषाका एसपी वसन्त रजौरेलाई पनि अख्तियारले १६ पन्ने फारम भराएको छ। सामान्य बेनाम उजुरी पर्नासाथ अख्तियारले बहालवाला प्रहरीलाई १६पन्ने फारम भराएर हैरानी दिने गरेको गुनासो समेत उठ्ने गरेको छ।

१३ पन्ने फारमलाई नवीन घिमिरे अख्तियार प्रमुख भएको बेला १६ पन्ने बनाइएको थियो। १६ पन्ने बनाउने क्रममा सम्पादकसँगको एक अन्तरक्रिया कार्यक्रममा बोल्दै अख्तियारका तत्कालीन प्रमुख आयुक्त घिमिरेले भनेका थिए, ‘इन्टेलिजेन्स समूहले गरेको अनुसन्धानका क्रममा अकूत सम्पत्ति आर्जन गरेको तथ्यहरू भेटिएमा मात्रै १६ पन्ने विवरण भराइने छ। हचुवाका भरमा कसैलाई पनि १६ पन्ने भराएर दु:ख दिने काम हुँदैन।’

तर, कतिपयले भने १६ पन्नेको दुरुपयोग गरेर हैरानी दिने उद्देश्यले भराउन थालिएको आरोप लगाउने गरेका छन्। सार्वजनिक पद धारण गरेका व्यक्तिले पदमा रहँदा वैधानिक रुपमा जति आम्दानी गरेको हुनुपर्ने हो, त्योभन्दा अस्वाभाविक सम्पत्ति देखियो वा उसको जीवनशैली त्यो भन्दा बढी अस्वाभाविक देखियो भने बल्ल १६ पन्ने भराउनु पर्ने हुन्छ।

सार्वजनिक पद धारण गरेको व्यक्तिले अकूत सम्पत्ति कमाएको आरोपमा अनुसन्धान गर्नका लागि अख्तियारले १६ पन्ने फारम भराउँदै आएको छ। यो फारममा व्यक्तिको सम्पत्ति विवरण, सम्पूर्ण आयव्ययको विवरण भर्नुपर्छ। आफ्नो परिवारको सम्पत्ति, सम्पत्तिको स्रोत, श्रीमान/श्रीमतीदेखि छोराछोरीलगायत सबैको शिक्षा स्वास्थ्य, रोजगार/बेरोजगार, आम्दानीको स्रोत खर्च लगायत भर्नुपर्छ।

१६ पन्ने विवरण भरेपछि उनीहरुमाथि अख्तियारले अनुसन्धान प्रक्रिया अघि बढाउँछ। १६ पन्ने फारममा भरेको विवरण अनुसार आयव्यय मिलेको छ/छैन। आम्दानी भन्दा खर्च बढी छ/छैन? आम्दानीको स्रोत देखाउन सकेको छ/छैन? जस्ता प्रश्नको उत्तर अख्तियारले खोजेर दोषी देखिने ठाउँ भए कारबाही प्रक्रिया अघि बढाउन सुरु गर्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।