काठमाडौं– प्रधानमन्त्री शेरबहादुर देउवा औपचारिक भ्रमणका लागि भारत पुगेका छन्। तीन दिने भ्रमणको सिलसिलामा शुक्रबार दिउँसो दिल्ली पुगेका देउवाले राजनीतिक भेटघाट सुरु गरिसकेका छन्।
शुक्रबार विमानस्थलमा ओर्लिएदेखि देउवा भेटघाटमा सक्रिय भए।
देउवालाई इन्दिरागान्धी अन्तर्राष्ट्रिय विमानस्थलमा भारतका रक्षा राज्यमन्त्री अजय भट, भारतका लागि नेपालका राजदूत शङ्करप्रसाद शर्मा, नेपालका लागि भारतका राजदूत विनयमोहन क्वात्रा, भारतको बाह्यमामिला मन्त्रालय र यहाँस्थित नेपाली दूतावासका उच्च अधिकृतहरूले स्वागत गरे।
विमानस्थलबाट देउवा आईसीटी मौर्या होटेल पुगे। होटलबाटै देउवाको पहिलो राजनीतिक भेटवार्ता सुरु भयो। भारतका विदेशमन्त्री एस जयशंकरले होटलमै पुगेर प्रधानमन्त्री देउवासँग शिष्टाचार भेट गरे।
त्यसपछि देउवा भारतीय जनता पार्टी (भाजपा)को प्रधान कार्यालय पुगे। त्यहाँ भाजपाका अध्यक्ष जेपी नड्डासहित नेताहरुले देउवाको स्वागत गरे। देउवाले भाजपाका नेताहरूसँग समसामयिक विषयमा विचारविमर्श समेत गरे।
.jpg)
देउवाको सम्मानमा शुक्रबार भारतस्थित नेपाली दूतावासले स्वागत समारोह तथा रात्रिभोज आयोजना गर्यो। देउवा बाह्रखम्बास्थित नेपाली दूतावास पुगेर रात्रिभोजमा सरिक भए।
भोलि (शनिबार) भारतका प्रधानमन्त्रीको कार्यालय हैदरावाद हाउसमा प्रधानमन्त्री देउवाले आफ्ना समकक्षी नरेन्द्र दामोदरदास मोदीसँग प्रतिनिधिमण्डलस्तरीय वार्ता गर्नेछन्। प्रधानमन्त्री मोदीले आफ्ना नेपाली समकक्षीको सम्मानमा शनिबार दिवाभोजको आयोजना गर्ने कार्यक्रम छ।
प्रतिनिधिमण्डलस्तरीय वार्तापछि ३५ किलोमिटर लामो जयनगर–कुर्था रेलसेवा तथा भारत सरकारको सहयोगमा निर्मित सोलु करिडोर प्रसारण लाइनको शुभारम्भ, नेपालमा निर्माणाधीन १३२ वटा स्वस्थ्य सेवा केन्द्रको प्रगतिबारे दुवै प्रधानमन्त्रीले श्रव्यदृश्यका माध्यमबाट जानकारी लिने कार्यक्रम छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
