काठमाडौं– नेकपा एमालेका अध्यक्ष केपी शर्मा ओलीले आफूहरु सरकारमा छँदा विकास निर्माणका आयोजना सञ्चालनको लागि पर्याप्त पैसा भएको, तर अहिले नभएको बताएका छन्। शनिबार नेकपा एमालेको उद्योग व्यवसायी विशेष जिल्ला कमिटीको अधिवेशनलाई सम्बोधन गर्दै उनले यसप्रति सरकार गम्भीर हुनुपर्ने बताए।
आज 'लिक्युडिटी' सम्बन्धी गम्भीर समस्या भएको र लगानीका निम्ति बैंकहरुसँग ऋण दिने पैसा नभएको उनको भनाइ छ। यसप्रति आफू छक्क परेको उनले बताए। आफूहरु सरकारमा छँदा तुइन विस्थापित गरेर झोलुंगे पुल र पक्की पुल बनाउन, हुलाकी राजमार्ग बनाउन, पूर्व–पश्चिम राजमार्ग चौडा गर्न, मदन भण्डारी राजमार्ग सुरु गर्न, पुल बनाउन, कालोपत्रे गर्न पैसा भएको उनको भनाइ छ।
आफ्नो सरकारले गरेका काम भन्दै ओलीले थपे, 'टनेल युगमा नेपाललाई प्रवेश गराएको छ। यत्रो धेरै पुनर्निर्माणको काम भए। एकै दिन ३९६ वटा हस्पिटलको शिलान्यास गर्यौँ। २१० वटा रणनीतिक बाटो र पालिका सदरमुकाम जोड्ने बाटोको शिलान्यास गर्यौँ। हवाई मैदानहरु निर्माण गर्यौँ। त्यसका लागि पैसा पुगेको थियो। हामीले सरकार छोड्यौँ। पैसा के भएको, साट्सुट्ट जादुगरले जस्तो छैन पैसा। बैंकमा पैसा छैन। उद्योगी व्यवसायीहरुसँग पैसा छैन। उद्योगहरुसँग पैसा छैन। आयातनिर्यातकर्ताहरुसँग पैसा छैन।'
ओलीले यस खालको स्थिति कसरी बन्छ भन्ने अचम्म लागेको ओलीको भनाइ छ। 'सबै आयोजना कटौती भइरहेको छ। हामी आयोजनाहरु थप्दै जान्छौँ, निर्माण गर्दै जान्थ्यौँ। भइरहेको थियो', उनले भने, 'अहिले ठेकेदारले काम सके, भुक्तानी दिन पैसा छैन। के भएको?'
उनले भित्रभित्र पुँजी पलायन भइरहेको बताए। तर, सरकार गम्भीर नभएको उनको आरोप छ। 'के कारणले लिक्युडिटीको समस्या? यतापट्टि सकारको ध्यान छैन', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
