काठमाडौं- नेकपा (एकीकृत समाजवादी) सम्मानित नेता झलनाथ खनालले माओवादीसँगको एकीकरणपछि नेकपा एमाले भन्ने पार्टी समाप्त भएको बताएका छन्।
शनिबार काठमाडौंमा आयोजना भएको नेकपा समाजवादी निकट समाजवादी प्रेस संगठन नेपालको केन्द्रिय कमिटी प्रथम बिस्तारित बैठकमा पूर्व प्रधानमन्त्री खनालले एमाले इतिहास भएको भन्दै अहिले एमालेको नाममा केपी शर्मा ओलीको नेतृत्वमा रहेको पार्टी दक्षिणपन्थी अवसरवादको गुट भएको आरोप लगाए।
खनालले नयाँ गुटले अहिले पनि देशभर नेकपा एमाले हौँ भनेर भ्रम छर्ने काम गरेको पनि बताए।
'निर्वाचनको पूर्व घडी तिरको सेरोफेरोमा हामीले एमाले र नेकपा माओवादी केन्द्रसँग एकीकरण गर्यौं। एकीकरण गरेपछि त्यतिबेला त नेकपा एमाले त सिध्यो नि। त्यो त इतिहासको वस्तु भयो, त्यो इतिहासको वस्तु भइसकेपछिको अवधिमा उत्प्रेषणको अधिकारबाट सर्वोच्च अदालतबाट व्युँताइएको पार्टीको नाम हो अहिले केपी ओलीको नेतृत्वमा रहेको पार्टी। यो गुट हो । यो नयाँ प्रकारले जन्म भएको गुटले देशभर यो नेकपा एमाले हो भनेर भ्रम छरिरहेको छ' उनले भने।
उनले एमालेमा रहेका नेता तथा कार्यकर्तालाई नेकपा एकीकृत समाजवादीमा आउन आग्रह गरे। नेकपा एमालेले आगामी चुनावमा दुई तिहाई सिट नभएर दुई तीन सिट मात्र ल्याउने उनको दाबी थियो।
उनले तीन वर्षसम्म चलेको नेकपालाई भत्काउने काम भएको बताए।
'तत्कालीन नेपाल कम्युनिष्ट पार्टी (नेकपा) लाई भत्काउनको लागि पार्टी विभाजन गर्ने कामहरु गरियो। तीन वर्षसम्म चलिसकेको एकीकृत पार्टीलाई विभाजित गरियो र त्यो विभाजन पछाडि उत्प्रेषणको अधिकारबाट एउटा नयाँ गुटको जन्म भयो। हामीले लामो समयदेखि लगाएर बनाएको नेकपा जुन थियो त्यो नवौँ महाधिवेशनसम्म लगातार जारी रह्यो। त्यसले महत्वपूर्ण ऐतिहासिक भूमिका पनि खेल्यो' उनले भने।
खनालले आफ्नो पार्टी नेपालको इतिहासमै छोटो समयमै राष्ट्रव्यापी बनेको पनि दाबी गरे। उहाँले नेपालको इतिहासमै ६ महिनाभित्रको समयमा अहिलेसम्म कुनै पार्टीले आफूलाई राष्ट्रव्यापी बनाउन नसकेको पनि दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
